ຂ່າວຕ່າງປະເທດລາຍງານ ໃນທ້າຍອາທິດຜ່ານມາວ່າ: Deoleo ຜູ້ຜະລິດນ້ຳມັນໝາກກອກລາຍໃຫຍ່ທີ່ສຸດໃນໂລກຈາກປະເທດແອັດສະປາຍ ເຈົ້າຂອງຍີ່ຫໍ້ນ້ຳມັນໝາກກອກ Bertolli ແລະ Carbonell ເປີດເຜີຍວ່າ: ໃນໄລຍະທີ່ຍາກລຳບາກທີ່ສຸດໃນປະຫວັດສາດຂອງອຸດສາຫະກຳໃກ້ຈະສິ້ນສຸດແລ້ວ ແລະ ຄາດວ່າໃນໄລຍະບໍ່ເທົ່າໃດເດືອນຂ້າງໜ້າ ລາຄານ້ຳມັນໝາກກອກຈະຫຼຸດລົງເກືອບເຄິ່ງໜຶ່ງຈາກລະດັບສູງສຸດ.
ສະພາບອາກາດທີ່ຮ້າຍແຮງ ແລະ ຄວາມແຫ້ງແລ້ງທີ່ແກ່ຍາວໃນເອີຣົບໃຕ້ ເນື່ອງຈາກການປ່ຽນແປງຂອງສະພາບດິນຟ້າອາກາດ ສົ່ງຜົນກະທົບຢ່າງໜັກຕໍ່ການເກັບກ່ຽວໝາກກອກໃນໄລຍະຫຼາຍປີທີ່ຜ່ານມາ ແລະ ເຮັດໃຫ້ລາຄານໍ້າມັນໝາກກອກເພີ່ມສູງຂຶ້ນຈົນສ້າງຄວາມກັງວົນໃຫ້ກັບບັນດາຜູ້ຊ່ຽວຊານ ແລະ ຜູ້ບໍລິໂພກ.
ການຂາດແຄນນໍ້າມັນໝາກກອກ ຊຶ່ງຖືເປັນວັດຖຸດິບຫຼັກຂອງອາຫານເມດິເຕີເຣນຽນ ເຮັດໃຫ້ອຸດສາຫະກຳຕ້ອງປະສົບກັບວິກິດ ແລະ ສ້າງຄວາມກັງວົນກ່ຽວກັບຄວາມບໍ່ໝັ້ນຄົງທາງດ້ານອາຫານ.
ເຖິງຢ່າງໃດກໍຕາມ, ລາຄານ້ຳມັນໝາກກອກເລີ່ມຫຼຸດລົງແລ້ວ ພາຍຫຼັງມີການຄາດຄະເນວ່າປີ 2024 – 2025 ຜະລິດຕະພັນຈະປັບຕົວດີຂຶ້ນ ໂດຍສະເພາະໃນປະເທດຜູ້ຜະລິດຫຼັກເຊັ່ນ: ແອັດສະປາຍ, ເກຣັກ, ຕຸຍນິຊີ.
