ໃນລະຫວ່າງວັນທີ 15-16 ພະຈິກ 2024 ນີ້, ກຳລັງກອງທັບປະຊາຊົນລາວ ນຳພາໂດຍ ທ່ານ ພັນໂທ ຄຳຜາຍ ອ້ວນວິໄລ ຮອງຫົວໜ້າກົມອົບຮົມ ກົມໃຫຍ່ເສນາທິການກອງທັບ, ຫົວໜ້າຄະນະເຝີກຊ້ອມກອບກູ້ໄພພິບັດ 3 ກອງທັບ ພ້ອມຄະນະ ແລະ ນັກເຝີກ ລວມທັງໝົດ 64 ສະຫາຍ ໄດ້ເດີນທາງເຂົ້າຮ່ວມເຝີກຊ້ອມກອບກູ້ໄພພິບັດຮ່ວມ 3 ກອງທັບ (ກຳປູເຈຍ, ລາວ, ຫວຽດນາມ ) ທີ່ຣາຊະອານາຈັກກໍາປູເຈຍ ເປັນເຈົ້າພາບ, ໃຫ້ການຕ້ອນຮັບຢູ່ດ່ານສາກົນໜອງນົກຂຽນ ໂດຍ ທ່ານ ພັນເອກ ທອນເມັງ ສະເຣີຍ ຫົວໜ້າປະຕິບັດການສາລະວັດທະຫານ ກອງທັບ ແຫ່ງຣາຊະອານາຈັກກໍາປູເຈຍ ພ້ອມຄະນະ. ພາຍຫຼັງເດີນທາງມາຮອດສູນເຝີກຊ້ອມສາລະວັດທະຫານພູຈຸມເສັນຣີກເຣີຍ ຖືກຕ້ອນຮັບຢ່າງເປັນທາງການໂດຍ ທ່ານ ພົນຈັດຕະວາ ເມ໋ຍ ສຸວັນ ຜູ້ອໍານວຍການ ສູນເຝີກຊ້ອມສາລະວັດທະຫານພູຈຸມເສັນຣີກເຣີຍ ກອງທັບ ແຫ່ງຣາຊະອານາຈັກກໍາປູເຈຍ ພ້ອມຄະນະ.
ການເດີນທາງເຂົ້າຮ່ວມເຝີກຊ້ອມກອບກູ້ໄພພິບັດຮ່ວມ 3 ກອງທັບ ໃນຄັ້ງນີ້, ແມ່ນປະຕິບັດຕາມແຜນການຮ່ວມມື ຂອງກະຊວງປ້ອງກັນປະເທດ ແຫ່ງ ສປປ ລາວ ກັບ ກະຊວງປ້ອງກັນປະເທດ ແຫ່ງ ສສ ຫວຽດນາມ ແລະ ກຳປູເຈຍ ທີ່ໄດ້ຕົກລົງກັນ ໃນກອງປະຊຸມສາມລັດຖະມົນຕີກະຊວງປ້ອງກັນປະເທດ ທີ່ ສສ ຫວຽດນາມ ໃນປີ 2023 ເພື່ອເສີມຂະຫຍາຍສາຍພົວພັນຮ່ວມມື ແລະ ຮັດແໜ້ນຄວາມສາມັກຄີ ຂອງ ສາມຊາດ, ສາມກອງທັບ ກໍາປູເຈຍ-ລາວ-ຫວຽດນາມ ໃຫ້ມີຄວາມແໜ້ນແຟ້ນຍີ່ງໆຂຶ້ນ. ທັງເປັນການພັດທະນາທາງດ້ານຄວາມຮູ້, ຄວາມສາມາດຜ່ານການແບ່ງປັນຂໍ້ມູນ, ການແລກປ່ຽນປະສົບການຕ່າງໆ ແລະ ສືບຕໍ່ຮ່ວມມື ໃຫ້ກັບພະນັກງານລຸ້ນສືບທອດ. ເຊິ່ງການເດີນທາງເຂົ້າຮ່ວມເຝີກຊ້ອມໃນຄັ້ງນີ້, ຈະດຳເນີນໄປຈົນຮອດວັນທີ 26 ພະຈິກ 2024 ນີ້ ຈຶ່ງຈະສຳເລັດ.
