ໃນວາລະກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX, ວັນທີ 18 ພະຈິກ 2024 ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ໃຫ້ຮູ້ວ່າ: ການຈັດຕັ້ງປະຕິບັດແຜນງົບປະມານ 10 ເດືອນ ປີ 2024 ກະຊວງການເງິນ ສາມາດຈັດຕັ້ງປະຕິບັດລາຍຮັບ ທັງໝົດໄດ້ 46.174 ຕື້ກີບ ເທົ່າກັບ 92% ຂອງແຜນການປີ ຫລື ເທົ່າກັບ 15,72% ຂອງ GDP, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 40% ເປັນເງິນປະມານ 13.083 ຕື້ກີບ. ໃນນັ້ນ, ມີລາຍຮັບພາຍໃນປະຕິບັດໄດ້ 43.170 ຕື້ກີບ ເທົ່າກັບ 96% ຂອງແຜນການປີ, ທຽບໃສ່ໄລຍະດຽວ ກັນຂອງປີຜ່ານມາເພີ່ມຂຶ້ນ 35% ເປັນເງິນປະມານ 11.293 ຕື້ກີບ ປະກອບມີລາຍຮັບສູນກາງ 29.900 ຕື້ກີບ ເທົ່າກັບ 87% ແລະ ລາຍຮັບທ້ອງຖິ່ນ 13.270 ຕື້ກີບ ເທົ່າກັບ 125% ຂອງແຜນການປີ.
ຄາດຄະເນສູ້ຊົນເກັບລາຍຮັບທັງໝົດໃນປີ 2024 ຈະໃຫ້ໄດ້ 55.117 ຕື້ກີບ ເທົ່າກັບ 110% ຂອງແຜນການປີ ເປັນເງິນ 5.011 ຕື້ກີບ ເທົ່າກັບ 18,76% ຂອງ GDP (ມະຕິສະພາ 17%) ໃນນີ້ ບໍ່ລວມລາຍຮັບວິຊາການ ແລະ ກອງທຶນທີ່ສະເໜີດັດແກ້ 941 ຕື້ກີບ.
ພ້ອມນີ້, ທ່ານ ສັນຕິພາບ ພົມວິຫານ ຍັງໄດ້ຍົກໃຫ້ເຫັນສິ່ງທີ່ພົ້ນເດັ່ນ ໃນການຈັດຕັ້ງປະຕິບັດ ລາຍຮັບເຂົ້າງົບປະມານມີທ່າອ່ຽງເພີ່ມຂຶ້ນ ເມື່ອທຽບໃສ່ໄລຍະດຽວກັນ ຍ້ອນການຂະຫຍາຍຕົວຂອງເສດຖະກິດພາຍໃນ, ການເປີດປີທ່ອງທ່ຽວລາວ ຕິດພັນກັບການເປັນປະທານອາຊຽນທີ່ ສປປ ລາວ ເປັນເຈົ້າພາບ, ສັດສ່ວນການລົງທຶນຂອງຕ່າງປະເທດ ກໍມີແນວໂນ້ມເພີ່ມຂຶ້ນ, ຫລາຍກິດຈະການ ກໍມີທ່າຂະຫຍາຍຕົວ ບວກກັບການຈັດຕັ້ງປະຕິບັດບັນດາມາດຕະການ ແລະ ນິຕິກຳ ທີ່ເປັນການຜັນຂະ ຫຍາຍວາລະແຫ່ງຊາດ, ການອັດຊ່ອງວ່າງການຮົ່ວໄຫລຂອງງົບປະມານ, ການປັບປຸງນິຕິກຳ, ການບັງ ຄັບໃຊ້ກົດໝາຍ ແລະ ການຄຸ້ມຄອງການເກັບລາຍຮັບເປັນທັນສະໄໝ ເຮັດໃຫ້ການເກັບລາຍຮັບເພີ່ມຂຶ້ນ ທຽບໃສ່ໄລຍະດຽວກັນຂອງປີຜ່ານມາ ເປັນຕົ້ນ ການຂະຫຍາຍຕົວຂອງເສດຖະກິດ ເຫັນວ່າເປັນປັດໄຈພື້ນຖານ ເຮັດໃຫ້ຫລາຍກິດຈະການມີທ່າອ່ຽງທີ່ເພີ່ມຂຶ້ນ ເປັນຕົ້ນ ລາຍຮັບກິດຈະການຂົນສົ່ງ 142%, ໂຮງແຮມ-ບ້ານພັກ ເພີ່ມຂຶ້ນ 97%, ພາຫະນະ 91%, ບັນເທີງ ແລະ ຫວຍ 85%, ໄຟຟ້າ 60%, ການຄ້າ 60%, ນໍ້າມັນເຊື້ອໄຟ 57%, ທະນາຄານ ແລະ ການປະກັນໄພ 44%, ບໍ່ແຮ່ 45%, ຜະລິດເຄື່ອງດື່ມ 37% ແລະ ອື່ນໆ; ສາມາດຄຸ້ມຄອງເກັບລາຍຮັບ ທີ່ເປັນສະກຸນເງິນຕາຕ່າງປະເທດໄດ້ 438,9 ລ້ານໂດລາສະຫະລັດ ແລະ 1.251,3 ລ້ານບາດ ລວມເປັນເງິນກີບ 10.155 ຕື້ກີບ ເທົ່າກັບ 21% ຂອງແຜນລາຍຮັບທັງໝົດ ແລະ ເປັນເງິນໂດລາເພີ່ມຂຶ້ນ 32% ແລະ ເງິນບາດເພີ່ມຂຶ້ນ 11% ທຽບໃສ່ໄລຍະດຽວກັນຂອງປີຜ່ານມາ. ສ່ວນຄ່າຜິດດ່ຽງຈາກອັດຕາແລກປ່ຽນ ເຫັນວ່າບໍ່ມີຜົນຕໍ່ການເພີ່ມຂຶ້ນ ຂອງການເກັບລາຍຮັບ ເນື່ອງຈາກອັດຕາແລກປ່ຽນ ສະເລ່ຍຢູ່ໃນລະດັບໃກ້ຄຽງກັນໃນເວລາການສ້າງແຜນ. ພ້ອມນີ້, ຍັງໄດ້ປະຕິບັດການເພີ່ມອັດຕາອາກອນຊົມໃຊ້ ຂອງບາງປະເພດສິນຄ້າ;ສາ ມາດເອົາພາຫະນະເຂົ້າສູ່ລະບົບຄຸ້ມຄອງເກັບລາຍຮັບອາກອນ; ນຳໃຊ້ລະບົບຈັດເກັບຄ່າທຳນຽມ ແລະ ຄ່າບໍລິການລວມສູນຢູ່ 7 ດ່ານໃຫຍ່ດ້ວຍລະບົບທັນສະໄໝ; ອັດຊ່ອງວ່າງຮົ່ວໄຫລ ດ້ວຍການປາມປາບການລັກລອບໜີພາສີດ້ວຍການຕິດຕາມກວດກາ.
ສຳລັບການຈັດຕັ້ງປະຕິບັດລາຍຈ່າຍ 10 ເດືອນ 2024 ປະຕິບັດໄດ້ 41.512 ຕື້ກີບ ເທົ່າກັບ 68% ຂອງແຜນການປີ. ໃນນັ້ນ, ຂັ້ນສູນກາງປະຕິບັດໄດ້ 32.420 ຕື້ກີບ ເທົ່າກັບ 67% ແລະ ຂັ້ນທ້ອງຖິ່ນປະຕິບັດໄດ້ 9.092 ຕື້ກີບ ເທົ່າກັບ 70% ຂອງແຜນການປີ; ຄາດຄະເນລາຍຈ່າຍໝົດປີ ຈະສູ້ຊົນປະຕິບັດບໍ່ເກີນກອບເພດານແຜນລາຍຈ່າຍ ທີ່ສະພາແຫ່ງຊາດຮັບຮອງ ບົນຈິດໃຈປະຢັດ ແລະ ຕ້ານການຟຸມເຟືອຍ, ໃນນີ້ ຍັງບໍ່ທັນລວມການຂໍດັດແກ້ລາຍຈ່າຍວິຊາການ ແລະ ກອງທຶນ 941 ຕື້ກີບ.
ສຳລັບທິດທາງລວມ, ກະຊວງການເງິນ ໄດ້ຄົ້ນຄວ້າຄາດໝາຍແຜນງົບປະມານ ປີ 2025 ບົນພື້ນຖານການສ້າງແຜນລາຍຮັບພາຍໃນກຸ້ມລາຍຈ່າຍພາຍໃນ ແລະ ສ່ວນເຫລືອສະສົມໄວ້ ເພື່ອຊຳລະໜີ້ສິນພາຍໃນ ແລະ ຕ່າງປະເທດໃຫ້ຫລຸດລົງ, ຫລຸດຜ່ອນການກູ້ຢືມໃໝ່ ທີ່ເປັນການສ້າງໜີ້ ສຳລັບຄາດໝາຍແຜນງົບປະມານຄາດຄະເນ ສູ້ຊົນເກັບລາຍຮັບທັງໝົດ ໃນປີ 2025 ຈຳນວນ 68.100 ຕື້ກີບ ທຽບໃສ່ແຜນຂອງປີຜ່ານມາເພີ່ມຂຶ້ນ 36% (ເປັນເງິນ 17.993 ຕື້ກີບ) ເທົ່າກັບ 18,16% ຂອງ GDP. ສະເພາະລາຍຮັບພາຍໃນ ຈໍານວນ 62.700 ຕື້ກີບເພີ່ມຂຶ້ນ 39% (ເປັນເງິນ 17.630 ຕື້ກີບ) ເທົ່າກັບ 16,72% ຂອງ GDP (ມູນຄ່າ GDP ເທົ່າກັບ 374.921 ຕື້ກີບ). ສ່ວນຄາດໝາຍເພດານ ລວມຍອດລາຍຈ່າຍງົບປະມານແຫ່ງລັດ ທັງໝົດ 71.850 ຕື້ກີບ ເທົ່າກັບ 19.16% ຂອງ GDP ໃນນີ້ລາຍຈ່າຍງົບປະມານປົກກະຕິພາຍໃນ 53.550 ຕື້ກີບ ເທົ່າກັບ 14,28% ຂອງ GDP.
