ວັນທີ 12 ພະຈິກຜ່ານມາ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຈໍາປາສັກ ນໍາໂດຍ ທ່ານ ວັນນະໄຊ ຊາດຕະກຸນ ຫົວໜ້າພະແນກ ຖວທ ແຂວງ ແລະ ສະຖານີວິທະຍຸ-ໂທລະພາບ ສູນກາງປະເທດຈີນ ປະຈໍາລາວ ນໍາໂດຍທ່ານ ນາງ ແສງແກ້ວ ໂມ້ສ້ຽວຫຼິງ ຫົວໜ້າສະຖານີວິທະຍຸ-ໂທລະພາບ ສູນກາງປະເທດຈີນ ປະຈຳລາວ ໄດ້ພົບປະຫາລື ເພື່ອແລກປ່ຽນບົດຮຽນດ້ານວິຊາການສື່ມວນຊົນຮ່ວມກັນ.
ການພົບປະຫາລືຄັ້ງນີ້ ຈັດຂຶ້ນຢູ່ພະແນກ ຖວທ ແຂວງ ໂດຍມີການນໍາ ແລະ ພະນັກງານວິຊາການທີ່ກ່ຽວຂ້ອງທັງສອງຝ່າຍ ເຂົ້າຮ່ວມ. ໂອກາດນີ້, ທ່ານ ນາງ ແສງແກ້ວ ໂມ້ສ້ຽວຫຼິງ ໄດ້ມີຄໍາເຫັນວ່າ: ການມາເຄື່ອນໄຫວວຽກງານຢູ່ແຂວງຈໍາປາສັກ ຄັ້ງນີ້ ກໍເພື່ອຮ່ວມກັບ ສູນອາຊີ – ອາຟຣິກາ ຂອງສະຖານີວິທະຍຸ - ໂທລະພາບສູນກາງຈີນ ປະຈໍາລາວ ມາເຄື່ອນໄຫວສາຍຮູບເງົາເຄື່ອນທີ່ ເນື່ອງໃນໂອກາດເທດສະການຮູບເງົາດີເດັ່ນ ລາວ – ຈີນ ຄັ້ງທີ VI. ພ້ອມນີ້, ທ່ານ ນາງ ແສງແກ້ວ ໂມ້ສ້ຽວຫຼິງ ຍັງລາຍງານສະພາບການເຄື່ອນໄຫວ ແລະ ການພັດທະນາ ຂອງສະຖານີວິທະຍຸ - ໂທລະພາບ ສູນກາງປະເທດຈີນ ປະຈຳລາວ ໂດຍຫຍໍ້ ແຕ່ກ່ອນມີຊື່ວ່າ: ວິທະຍຸສາກົນ ແຫ່ງປະເທດຈີນ ຫຼື China Radio International (CRI), ແຕ່ຍ້ອນໄດ້ລວມເອົາວິທະຍຸ ແລະ ສະຖານີໂທລະພາບ ສູນກາງປະເທດຈີນ ເຂົ້າກັນຈິ່ງໄດ້ປ່ຽນຊື່ເປັນກຸ່ມສື່ມວນຊົນ ປະເທດຈີນ ຫຼື China Media Group (CMG) ແລະ ເຄື່ອນໄຫວໜ້າທີ່ວຽກງານ ຕາມພາລະບົດບາດຂອງສື່ມວນຊົນ, ນໍາສະເໜີຂ່າວຢ່າງເປັນກາງ ແລະ ຮັບໃຊ້ໜ້າທີ່ການເມືອງຂອງ 2 ພັກ, 2 ລັດ ຈີນ - ລາວ, ລາວ - ຈີນ.
ທ່ານ ວັນນະໄຊ ຊາດຕະກຸນ ກ່າວວ່າ: ການພົບປະໃນຄັ້ງນີ້ ເປັນການແລກປ່ຽນບົດຮຽນທາງດ້ານທິດສະດີ, ຕໍ່ໄປ, ຖ້າມີເງື່ອນໄຂ ຂໍໃຫ້ມີການແລກປ່ຽນບົດຮຽນໃນການຈັດຕັ້ງປະຕິບັດວຽກງານຕົວຈິງຮ່ວມກັນ ຈະເປັນຮູບແບບການຝຶກອົບຮົມ ຫຼື ອື່ນໆ ເພື່ອເຮັດໃຫ້ການພົວພັນຮ່ວມມືເຂົ້າສູ່ລວງເລິກ ແລະ ນັບມື້ແໜ້ນແຟ້ນຍິ່ງໆຂຶ້ນ.
ໃນວັນດຽວກັນ, ທ່ານ ນາງ ແສງແກ້ວ ໂມ້ສ້ຽວຫຼິງ ພ້ອມທີມງານ ກໍໄດ້ເຄື່ອນໄຫວຢ້ຽມຢາມສະຖານີວິທະຍຸກະຈາຍສຽງແຂວງຈໍາປາສັກ ແລະ ໄດ້ຈັດລາຍການອອກອາກາດສົດ ຮ່ວມກັບ ໂຄສົກວິທະຍຸກະຈາຍສຽງແຂວງ ຕື່ມອີກ.
(ຂ່າວ-ພາບ: ທູນທອງໃຈ)
