ຂປລ. ພິທີສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ກູບາ ຄົບຮອບ 50 ປີ (04/11/1974 – 04/11/2024) ຈັດຂຶ້ນໃນຕອນຄໍ່າວັນທີ 4 ພະຈິກ 2024 ຢູ່ນະຄອນຫລວງວຽງຈັນ ໂດຍການເຂົ້າຮ່ວມເປັນແຂກກິດຕິມະສັກຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ, ມີ ສະຫາຍ ເອັສເຕບານ ລາໂຊ ເຮີນານເດສ ກໍາມະການກົມການເມືອງສູນກາງພັກກອມມູນິດກູບາ, ປະທານສະພາແຫ່ງຊາດ ອໍານາດປະຊາຊົນ ແຫ່ງ ສ ກູບາ, ຜູ້ຕາງໜ້າພິເສດ ແຫ່ງ ສາທາລະນະລັດກູບາ; ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດລາວ; ສະຫາຍ ສະເຫລີມໄຊ ກົມມະສິດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນ ຕີກະຊວງການຕ່າງປະເທດ, ພ້ອມດ້ວຍບັນດາລັດຖະມົນຕີ, ເຈົ້າຄອງນະຄອນຫລວງວຽງຈັນ, ຮອງລັດຖະມົນຕີ, ເອກອັກຄະລັດຖະທູດ ສ ກູບາ ປະຈໍາ ສປປ ລາວ, ບັນດາແຂກຖືກເຊີນ ແລະ ພະນັກ ງານກ່ຽວຂ້ອງສອງຝ່າຍ ເຂົ້າຮ່ວມ.
ໃນພິທີອັນມີຄວາມໝາຍສຳຄັນນີ້, ສອງຝ່າຍ ໄດ້ຜັດປ່ຽນກັນຂຶ້ນກ່າວມີຄຳເຫັນ, ເຊິ່ງຕາງໜ້າໃຫ້ ພັກ-ລັດຖະບານ ແຫ່ງ ສປປ ລາວ ໂດຍ ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດລາວ ແລະ ຕາງໜ້າຝ່າຍກູບາ ໂດຍ ສະຫາຍ ເອັສເຕບານ ລາໂຊ ເຮີນານເດສ ກໍາມະການກົມການເມືອງສູນກາງພັກກອມມູນິດກູບາ, ປະທານສະພາແຫ່ງຊາດ ອໍານາດປະຊາຊົນ ແຫ່ງ ສ ກູບາ, ຜູ້ຕາງໜ້າພິເສດ ແຫ່ງ ສາທາລະນະລັດ ກູບາ ເຊິ່ງສອງຝ່າຍ ໄດ້ຫວນຄືນມູນເຊື້ອແຫ່ງການພົວພັນຮ່ວມມື ລະຫວ່າງ ສປປ ລາວ ແລະ ສ ກູບາ ຕະຫລອດໄລຍະ 50 ປີ ທີ່ຜ່ານມາ ບົນພື້ນຖານແຫ່ງສາຍພົວພັນມິດຕະພາບ ແລະ ຄວາມສາມັກຄີທີ່ເປັນມູນເຊື້ອຍາວນານ ນັບຕັ້ງແຕ່ໄລຍະທີ່ປະຊາຊົນລາວດໍາເນີນ ການປະຕິວັດຊາດ ປະຊາທິປະໄຕ ຕ້ານການຮຸກຮານຂອງຈັກກະພັດຕ່າງດ້າວ ເພື່ອຄວາມເປັນເອກະລາດແຫ່ງຊາດ ໃນຊຸມປີ 1960-70 ກໍຄື ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນປັດຈຸບັນ ແລະ ຕີລາຄາສູງຕໍ່ສາຍພົວພັນມິດຕະ ພາບ ແລະ ການຮ່ວມມືຖານອ້າຍນ້ອງ ລະຫວ່າງ ສອງພັກ, ສອງສະພາແຫ່ງຊາດ, ສອງລັດຖະບານ ແລະ ປະຊາຊົນສອງຊາດ ທີ່ສືບຕໍ່ໄດ້ຮັບການເສີມຂະຫຍາຍຂຶ້ນຢ່າງບໍ່ຢຸດຢັ້ງ, ອັນໄດ້ປະກອບສ່ວນສຳ ຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມທິດສັງຄົມນິຍົມຢ່າງໜັກ ແໜ້ນ, ເຖິງວ່າສອງປະເທດ ຈະມີທີ່ຕັ້ງຢູ່ຫ່າງໄກກັນປານໃດກໍຕາມ ແຕ່ການພົວພັນຮ່ວມມືຍັງສືບຕໍ່ໄດ້ຮັບການເສີມຂະຫຍາຍກວມເອົາຫລາຍຂົງເຂດວຽກງານ, ໄດ້ມີການແລກປ່ຽນການພົບປະຢ້ຽມຢາມຄະນະຜູ້ແທນຂັ້ນສູງຂອງ ສອງພັກ, ສອງສະພາແຫ່ງຊາດ, ສອງລັດ ກໍຄື ບັນດາກະຊວງ, ອົງການ ນັບທັງອົງການຈັດຕັ້ງມະຫາຊົນ ຂອງສອງປະເທດ ຢ່າງເປັນປະຈໍາ, ພິເສດ ພັກ-ລັດຖະບານ, ສະພາແຫ່ງຊາດ ອໍານາດປະຊາຊົນ ແລະ ປະຊາຊົນກູບາອ້າຍນ້ອງ ໄດ້ໃຫ້ການສະໜັບສະໜູນ ແລະ ຊ່ວຍເຫລືອໃຫຍ່ຫລວງແກ່ປະຊາຊົນລາວ ເປັນຕົ້ນ ການສົ່ງທີມຄະນະແພດມາຊ່ວຍ ສປປ ລາວ, ທັງໃນໄລຍະສົງຄາມຢູ່ເຂດທີ່ໝັ້ນການປະຕິວັດເມືອງວຽງໄຊ ກໍຄື ພາຍຫລັງການສະຖາປະນາ ສປປ ລາວ, ການສະໜອງຄູສອນພາສາແອັດສະປາໂຍນ ແລະ ຄູຝຶກກິລາອີກຈຳນວນໜຶ່ງແກ່ ສປປ ລາວ, ຊ່ວຍສ້າງຊັບພະ ຍາກອນມະນຸດແກ່ ສປປ ລາວ ເປັນຈຳນວນຫລາຍຮ້ອຍຄົນ ແລະ ຫລາຍສະຫາຍ ກໍໄດ້ມີໜ້າທີ່ຕຳແໜ່ງສຳຄັນໃນກົງຈັກ ພັກ-ລັດຖະບານລາວ. ພ້ອມນີ້, ຝ່າຍລາວ ໄດ້ສະແດງຄວາມຊົມເຊີຍທີ່ເຫັນວ່າ ການພົວພັນຮ່ວມມື ລະຫວ່າງ ສອງສະພາແຫ່ງຊາດ ລາວ-ກູບາ ໄດ້ຮັບການເສີມຂະຫຍາຍຢ່າງຕໍ່ເນື່ອງ, ໄດ້ຮ່ວມກັນຈັດຕັ້ງປະຕິບັດບົດບັນທຶກຊ່ວຍຈໍາ ວ່າດ້ວຍການຮ່ວມມື ລະຫວ່າງ ສອງອົງການນິຕິບັນຍັດ, ມີການໄປມາຫາສູ່ກັນຂອງຄະນະຜູ້ແທນສະພາ, ພົບປະປຶກສາຫາລື ແລະ ແລກປ່ຽນບົດຮຽນ, ຂໍ້ມູນຂ່າວສານ ແລະ ສະໜັບສະໜູນກັນໃນເວທີລັດຖະສະພາພາກພື້ນ ແລະ ສາກົນ ເປັນຕົ້ນແມ່ນ AIPA, IPU ແລະ ອື່ນໆ. ພ້ອມກັນນີ້, ສອງຝ່າຍ ຢືນຢັນສືບຕໍ່ຮ່ວມມືກັນໃນຂະແໜງການທີ່ສອງຝ່າຍມີທ່າແຮງ ແລະ ມີຜົນປະໂຫຍດຮ່ວມກັນ ໂດຍສະເພາະ ດ້ານເສດຖະກິດ-ການຄ້າ, ສາທາລະນະສຸກ, ສຶກສາ-ກິລາ, ກະສິກໍາ ແລະ ອື່ນໆ, ສືບຕໍ່ສະໜັບສະໜູນຊ່ວຍເຫລືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ.
ໃນໂອກາດດຽວກັນ, ສອງຝ່າຍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດຂອງການຈັດກິດຈະກຳສະເຫລີມສະຫລອງ 50 ປີ ແຫ່ງສາຍພົວພັນການທູດ ລາວ-ກູບາ ໃນປີ 2024 ນີ້, ໂດຍສະເພາະ ການແລກປ່ຽນສານອວຍພອນຂອງການນຳຂັ້ນສູງ ລາວ-ກູບາ, ການສຳພາດສະຫາຍການນຳ ແລະ ບຸກຄົນທີ່ຕິດພັນກັບການເສີມຂະຫຍາຍການພົວພັນ ລາວ-ກູບາ, ປາຖະກະຖາໃນຫົວຂໍ້ສຳຄັນຕ່າງໆ, ປູກຕົ້ນໄມ້ມິດຕະພາບທີ່ສວນສາທາລະນະ ນະຄອນຫລວງວຽງຈັນ, ແຂ່ງຂັນຂຽນບົດຄວາມ-ຮູບພາບການພົວພັນຮ່ວມມືສອງຝ່າຍ ແລະ ອື່ນໆ. ໃນໂອກາດດຽວກັນນີ້, ສອງຝ່າຍ ໄດ້ ອວຍ ພອນໃຫ້ສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານຖານອ້າຍນ້ອງ ລະຫວ່າງ ສອງພັກ, ສອງລັດຖະບານ ແລະ ປະຊາຊົນສອງຊາດ ລາວ-ກູບາ ຈົ່ງໝັ້ນຄົງທະນົງແກ່ນຕະຫລອດໄປ.
ພິທີສະເຫລີມສະຫລອງໃນຄັ້ງນີ້, ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ ອັນອົບອຸ່ນ ແລະ ສະໜິດແໜ້ນ, ໃນງານຍັງໄດ້ມີການວາງສະແດງຮູບພາບການພົວພັນຮ່ວມມືຂອງບັນດາອະດີດການນຳ ລາວ-ກູບາ ແຕ່ອະດີດເຖິງປັດຈຸບັນ, ສ່ອງແສງໃຫ້ເຫັນເຖິງສາຍພົວພັນມິດຕະພາບ ແລະ ຄວາມສາມັກຄີທີ່ເປັນມູນເຊື້ອມາຍາວນານ ລະຫວ່າງ ສປປ ລາວ ແລະ ສ ກູບາ.
ຂ່າວ: ກົມການຂ່າວ
ພາບ: ຂັນໄຊ
