ໃນວັນທີ 5 ພະຈິກ 2024 ນີ້, ສະຫາຍ ນາງ ໂງ ເຟືອງ ລີ (Ngo Phuong Ly) ພັນລະຍາເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ພ້ອມດ້ວຍຄະນະ ໄດ້ໄປຢ້ຽມຢາມຮ້ານຫັດຖະກໍາປ້າແສນ ຢູ່ບ້ານໂພນໝີ ເມືອງວຽງຄໍາ ແຂວງວຽງຈັນ ເຊິ່ງຄະນະຝ່າຍລາວ ນໍາໂດຍ ສະຫາຍ ນາງ ອາລຸນີ ກົມມະສິດ ພັນລະຍາ ສະຫາຍ ສະເຫລີມໄຊ ກົມມະສິດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ພ້ອມດ້ວຍພະນັກງານທີ່ກ່ຽວຂ້ອງຂອງທັງສອງຝ່າຍ ເຂົ້າຮ່ວມ.
ໃນການລົງຢ້ຽມຢາມ ຮ້ານຫັດຖະກໍາປ້າແສນ, ສະຫາຍ ນາງ ໂງ ເຟືອງ ລີ ແລະ ຄະນະ ໄດ້ຖືກຕ້ອນຮັບໂດຍ ສະຫາຍ ທອງສະຫວັນ ວົງສຳພັນ ຮອງເລຂາພັກແຂວງ, ປະທານສະມາຄົມມິດຕະພາບ ລາວ-ຫວຽດນາມ ແຂວງວຽງຈັນ, ພ້ອມດ້ວຍພະນັກງານທີ່ກ່ຽວຂ້ອງຂອງແຂວງວຽງຈັນ, ພ້ອມທັງໄດ້ຮັບຟັງການລາຍງານຫຍໍ້ ກ່ຽວກັບປະຫວັດຄວາມເປັນມາ ກໍຄື ສະພາບການຂະຫຍາຍຕົວຂອງຮ້ານຫັດຖະກໍາດັ່ງກ່າວ ແລະ ໄດ້ຢ້ຽມຊົມການຜະລິດສິນຄ້າຕົວຈິງ ຕື່ມອີກ.
ຈາກນັ້ນ, ພັນລະຍາເລຂາທິການໃຫຍ່ພັກກອມມູນິດຫວຽດນາມ ພ້ອມຄະນະ ຍັງໄດ້ເດີນທາງໄປຢ້ຽມຢາມເມືອງວັງວຽງ ແຂວງວຽງຈັນ ເພື່ອທ່ຽວຊົມທິວທັດທໍາມະຊາດ ຂອງຕົວເມືອງວັງວຽງ ເຊິ່ງຄະນະ ໄດ້ໄປຢ້ຽມຊົມຖໍ້ານາງຟ້າ ແລະ ໄດ້ຮັບປະທານອາຫານທ່ຽງທີ່ໂຮງແຮມ S Boutique VangVieng ກ່ອນຈະເດີນທາງກັບຄືນນະຄອນຫລວງວຽງຈັນ.
ໃນຕອນຄໍ່າຂອງວັນດຽວກັນ, ສະຫາຍ ນາງ ໂງ ເຟືອງ ລີ ແລະ ຄະນະ ຍັງຈະໄດ້ເຂົ້າຮ່ວມງານລ້ຽງຕ້ອນຮັບ ທີ່ ພັດຕະຄານ ເຊນພິລາ ຈັດໂດຍ ສະຫາຍ ນາງ ນາລີ ສີສຸລິດ ພັນລະຍາ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະ ເທດ ແຫ່ງ ສປປ ລາວ, ທັງເປັນປະທານກິດຕິມະສັກສະມາຄົມຫັດຖະກໍາລາວ ເພື່ອເປັນກຽດໃຫ້ແກ່ບັນດາແຂກກິດຕິມະສັກ, ສໍາມະນາກອນ ແລະ ຄະນະຜູ້ແທນເຂົ້າຮ່ວມທັງໝົດ ໃນກອງປະຊຸມສໍາມະນາ ແຜ່ນແພພື້ນເມືອງອາຊຽນ ຄັ້ງທີ 9 ທີ່ ສປປ ລາວ ເປັນເຈົ້າພາບຈັດຂຶ້ນໃນລະຫວ່າງວັນທີ 4-6 ພະຈິກ 2024.
ພາບ: ເກດສະໜາ
