ສະມາຄົມນັກຂ່າວແຫ່ງ ສປປ ລາວ ຮ່ວມກັບ ອົງການແຄຣນາໆຊາດປະຈຳ ສປປ ລາວ ຈັດກອງປະຊຸມສະຫຼຸບ-ລາຍງານ ການຈັດຕັ້ງປະຕິບັດ 6 ເດືອນຕົ້ນປີ 2024 ຂອງໂຄງການສ້າງຄວາມເຂັ້ມແຂງໃຫ້ແກ່ສື່ມວນຊົນໂດຍການມີສ່ວນຮ່ວມ ຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ເພື່ອການພັດທະນາສີຂຽວໃນ ສປປ ລາວ ໄດ້ຈັດຂຶ້ນໃນວັນທີ 29 ສິງຫານີ້ ທີ່ໂຮງແຮມເມືອງແທັງ ນະຄອນຫຼວງວຽງຈັນ, ພາຍໃຕ້ການເປັນປະທານ ກ່າວເປີດກອງປະຊຸມຂອງ ທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ທ່ານ ອາຈິດ ປາຣີດາ ຜູ້ອໍານວຍການຝ່າຍແຜນງານ ຈາກອົງການແຄຣນາໆຊາດປະຈຳ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ສະຫວັນຄອນ ຣາຊມຸນຕຣີ ປະທານສະມາຄົມນັກຂ່າວແຫ່ງ ສປປ ລາວ ອະດີດຮອງລັດຖະມົນຕີ ກະຊວງ ຖວທ ໄດ້ກ່າວວ່າ: ຈຸດປະສົງຂອງກອງປະຊຸມໃນຄັ້ງນີ້ ກໍຄືພາລະບົດບາດຂອງສະມາຄົມນັກຂ່າວລາວ ໃນຖານະຜູ້ຈັດຕັ້ງປະຕິບັດໂຄງການໂດຍກົງ ໃນການຊຸກຍູ້ສະໜັບສະໜູນໂຄງການໃຫ້ດໍາເນີນໄປຕາມແຜນ ແລະ ປະສົບຜົນສຳເລັດຕາມໝາຍແຕ່ນີ້ຮອດຕົ້ນປີ 2027, ພາຍຫຼັງທີ່ສະມາຄົມນັກຂ່າວ ແຫ່ງ ສປປ ລາວ ແລະ ອົງການແຄຣນາໆຊາດ ປະຈໍາ ລາວ ໄດ້ຮ່ວມກັນຈັດຕັ້ງປະຕິບັດໂຄງການດັ່ງກ່າວນີ້ມາໄດ້ໄລຍະໜຶ່ງ ກໍເຫັນວ່າມີຫຼາຍວຽກຫຼາຍກິດຈະກຳແມ່ນໄດ້ຮັບການຈັດຕັ້ງປະຕິບັດແລ້ວຕາມແຜນ, ເປັນຕົ້ນການສ້າງເວັບໄຊ ຂອງສະມາຄົມ ແລະ ການລົງສໍາຫຼວດເກັບກຳຂໍ້ມູນນໍານັກຂ່າວທົ່ວປະເທດເພື່ອມາອອກແບບ ແລະ ສ້າງຫຼັກສູດສໍາລັບສິດສອນ ແລະ ແຜນຝຶກອົບຮົມໃຫ້ນັກຂ່າວໃນຂອບເຂດທົ່ວປະເທດ, ໃນຍຸກຂໍ້ມູນຂ່າວສານຜ່ານລະບົບດີຈີຕອນ, ໂດຍສະເພາະການນໍາໃຊ້ປັນຍາປະດິດ ແລະ ສິ່ງທ້າທາຍສໍາລັບສື່ມວນຊົນລາວ” ແລະ ເຊື່ອໝັ້ນວ່າ ໂຄງການນີ້ຈະຊ່ວຍປະກອບສ່ວນເຮັດໃຫ້ສື່ພາກລັດ ແລະ ສື່ພາກສັງຄົມທີ່ໄດ້ລົງທະບຽນຖືກຕ້ອງຕາມກົດໝາຍຂອງລາວ ໃຫ້ໄດ້ຮັບການຍົກລະດັບທັກສະດ້ານວິຊາຊີບສື່ ລວມທັງການນໍາໃຊ້ເຕັກໂນໂລຊີແບບດີຈີຕອນ ແລະ ສື່ແບບໃໝ່. ນັກຂ່າວທີ່ໄດ້ຮັບການຝຶກອົບຮົມຜ່ານໂຄງການນີ້ ຈະມີທັກສະ ແລະ ຄວາມສາມາດສູງຂຶ້ນໃນການຜະລິດຂໍ້ມູນຂ່າວສານທີ່ມີຄຸນນະພາບ ໂດຍຜ່ານການລາຍງານທີ່ມີຄວາມຮັບຜິດຊອບ ແລະ ເປັນມືອາຊີບກ່ຽວກັບການພັດທະນາສີຂຽວໃນ ສປປ ລາວ ຊຶ່ງເປັນໜຶ່ງໃນວຽກບຸລິມະສິດ ຂອງລັດຖະບານລາວໃນການພັດທະນາປະເທດຊາດໃຫ້ນັບມື້ນັບຈະເລີນສີວິໄລແບບຍືນຍົງ.
ທ່ານ ໂພສີ ແກ້ວມະນີວົງ ໄດ້ມີຄໍາເຫັນວ່າ: “ພາຍຫຼັງທີ່ໂຄງການໄດ້ເລີ່ມຈັດຕັ້ງປະຕິບັດ, ເພື່ອເປັນການສ້າງຄວາມຮັບຮູ້ ແລະ ຄວາມເຂົ້າໃຈໃຫ້ແກ່ບັນດາຜູ້ຮັບຜິດຊອບ ແລະ ຜູ້ເຄື່ອນໄຫວວຽກງານສື່ມວນຊົນ ໃນແຕ່ລະເຂດເປົ້າໝາຍ, ຈະຊ່ວຍນໍາຜົນປະໂຫຍດບໍ່ໜ້ອຍມາໃຫ້ວຽກງານພັດທະນາສື່ມວນຊົນດ້ວຍການເຄື່ອນໄຫວ ແລະ ການປະກອບສ່ວນຢ່າງຕັ້ງໜ້າ ຂອງທີມງານຈາກສະມາຄົມນັກຂ່າວແຫ່ງ ສປປ ລາວ ແລະ ຈາກອົງການແຄຣນາໆຊາດປະຈໍາລາວ ຕາມພາລະບົດບາດ, ສິດ ແລະ ໜ້າທີ່, ພາຍໃຕ້ຂອບເວລາ ແລະ ຂັ້ນຕອນຕ່າງໆທີ່ລະບຸໄວ້ໃນໂຄງການ ຊຶ່ງຈະຊ່ວຍຍົກລະດັບຄວາມຮູ້ຄວາມ ສາມາດໃຫ້ແກ່ນັກຂ່າວເຮົາ ໃຫ້ມີຄວາມເຂົ້າໃຈຫຼາຍຂຶ້ນກ່ຽວກັບການພັດທະນາສີຂຽວແແບຍືນຍົງ ເພື່ອກະຈາຍຂໍ້ມູນຂ່າວສານໄປຍັງຜູ້ບໍລິໂພກສື່ທັງຫຼາຍໃນສັງຄົມ.
ພ້ອມນັ້ນຜູ້ເຂົ້າຮ່ວມກອງປະຊຸມຍັງໄດ້ປະກອບຄໍາຄິດເຫັນໃສ່ ບົດສະຫຼຸບ ແລະ ລາຍງານຜົນການຈັດຕັ້ງປະຕິບັດກິດຈະກຳຂອງໂຄງການໃນໄລຍະ 6 ເດືອນຕົ້ນປີ 2024 ແລະ ແຜນການຈັດຕັ້ງປະຕິບັດກິດຈະກຳຂອງໂຄງການສໍາລັບ 6 ເດືອນທ້າຍປີ 2024 ໂດຍໃນນີ້ຈະລວມມີການຈັດການຝຶກ ອົບຮົມໃນ 6 ຫົວຂໍ້ຫຼັກຄື: ທັກສະຕົ້ນຕໍຂອງນັກຂ່າວ ແລະ ການຄຸ້ມຄອງຂ່າວທີ່ດີ, ນັກຂ່າວໃນຍຸກດີຈີຕອນ ແລະ ເຕັກໂນໂລຊີແບບໃໝ່, ທັກສະການນໍາໃຊ້ສື່ດີຈີຕອນ ແລະ ຊ່ອງທາງການນໍາໃຊ້ສື່ສັງຄົມອອນລາຍຕ່າງໆ, ການໂຄສະນາ ການພັດທະນາສີຂຽວ, ບົດບາດ ແລະ ຄວາມສະເໝີພາບຍິງ-ຊາຍໃນຍຸກດີຈີຕອນ ແລະ ເຕັກໂນໂລຊີເພື່ອການພັດທະນາສີຂຽວ ແລະ ມາດຕະຖານຂໍ້ມູນຂ່າວສານຄຸນນະພາບສີຂຽວ.
ຂ່າວ-ພາບ: ບຸນອູ້ມ
