ແຫລ່ງຂ່າວຈາກ ແຂວງບໍ່ແກ້ວ ໃຫ້ຮູ້ວ່າ: ໃນຕອນກາງຄືນຂອງວັນທີ 21-22 ສິງຫາ 2024 ໄດ້ມີຝົນຕົກຕິດຕໍ່ກັນຫລາຍຊົ່ວໂມງ ເຮັດໃຫ້ພື້ນທີ່ບາງຈຸດຂອງເມືອງຕົ້ນເຜິ້ງ ແຂວງບໍ່ແກ້ວ ຖືກນໍ້າຖ້ວມຂັງ ໂດຍສະເພາະ ເຂດພື້ນທີ່ຕໍ່າ, ຈຸດທີ່ບໍ່ມີຮ່ອງລະບາຍນໍ້າ, ຈຸດທີ່ຮ່ອງລະບາຍນໍ້າຖືກດິນຖົມ ແລະ ເຂດທີ່ຢູ່ຕິດກັບແຄມຫ້ວຍ, ຮ່ອງ. ຜົນກະທົບຈາກນໍ້າຖ້ວມຂັງຄັ້ງນີ້, ເຮັດໃຫ້ເຄື່ອງໃຊ້, ຍານພາຫະນະ, ໜອງປາ, ສັດລ້ຽງ, ໄຮ່, ນາ, ສວນ ຂອງພໍ່ແມ່ປະຊາຊົນ ໄດ້ຮັບຄວາມເສຍຫາຍຫລາຍສົມຄວນ. ສ່ວນມູນຄ່າເສຍຈະແຈ້ງໃຫ້ຊາບຕາມພາຍຫລັງ.
ຂ່າວ-ພາບ: ອຸໄທ ພູມມາ
