ໃນວັນທີ 16 ສິງຫາ ນີ້, ສະຖາບັນການຕ່າງປະເທດ ກະຊວງການຕ່າງປະເທດ ໄດ້ຈັດພິທີປິດຊຸດຝຶກອົບຮົມ ພິທີການທູດ ແລະ ພາສາອັງກິດ ສໍາລັບ ພັນລະຍາການນໍາ ເພື່ອປະກອບສ່ວນເຂົ້າໃນກິດຈະກໍາວຽກງານອາຊຽນ ປີ 2024 ທີ່ ໂຮງແຮມຄຣາວພລາຊາ, ໂດຍໄດ້ຮັບການສະໜັບສະໜູນຈາກ ສະຖານທູດອົສຕຣາລີ ປະຈຳ ສປປ ລາວ ແລະ ກະຊວງການຕ່າງປະເທດ. ຊຸດຝຶກອົບຮົມດັ່ງກ່າວໄດ້ດໍາເນີນມາເປັນເວລາ 3 ວັນ, ນັບແຕ່ວັນທີ 14-16 ສິງຫາ 2024, ໃຫ້ກຽດເປັນປະທານໃນພິທີປິດໃນຄັ້ງນີ້ ໂດຍ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ. ພ້ອມນີ້, ກໍມີ ທ່ານເອກອັກຄະລັດຖະທູດອົສຕຣາລີ ປະຈຳ ສປປ ລາວ ພ້ອມດ້ວຍພະນັກງານສະຖານທູດ, ຕາງໜ້າຈາກບັນດາກົມຈາກກະຊວງການຕ່າງປະເທດ, ຄະນະສະຖາບັນການຕ່າງປະເທດ, ວິທະຍາກອນ, ຄະນະຮັບຜິດຊອບຊຸດຝຶກອົບຮົມ ແລະ ນັກສຳມະນາກອນຂອງຊຸດຝຶກອົບຮົມເຂົ້າຮ່ວມທັງໝົດ ຈໍານວນ 60 ທ່ານ, ໃນນີ້ ມີຜູ້ເຂົ້າຮ່ວມຝຶກອົບຮົມທັງໝົດ 43 ທ່ານ.
ຈຸດປະສົງຂອງການຈັດຊຸດຝຶກອົບຮົມໃນຄັ້ງນີ້ ແມ່ນເພື່ອເປັນການກະກຽມຄວາມພ້ອມໃນດ້ານຕ່າງໆ ໃຫ້ ແກ່ ບັນດາພັນລະຍາການນໍາຂັ້ນສູງ ຈາກ ສຳນັກງານປະທານປະເທດ, ສຳນັກງານນາຍົກລັດຖະມົນຕີ, ກະຊວງ ການຕ່າງປະເທດ, ສະພາແຫ່ງຊາດ, ຄະນະພົວພັນຕ່າງປະເທດສູນກາງພັກ ແລະ ບັນດາກະຊວງທີ່ກ່ຽວຂ້ອງຈາກ 3 ເສົາຄໍ້າປະຊາຄົມອາຊຽນ ແລະ ອື່ນໆ, ກ່ຽວກັບ ວຽກງານພິທີການທູດ ແລະ ການສື່ສານພາສາອັງກິດຂັ້ນພື້ນຖານ ໃຫ້ແກ່ ພັນລະຍາການນໍາຂັ້ນສູງ ເພື່ອເປັນຄວາມຮູ້ພື້ນຖານ ໃນການເຄື່ອນໄຫວວຽກງານຕາມພາລະບົດບາດໃນການເປັນເຈົ້າພາບ, ໃນໂອກາດຕິດຕາມການເຄື່ອນໄຫວຕ່າງປະເທດ ແລະ ເນື່ອງໃນໂອກາດວັນສໍາຄັນຕ່າງໆ. ພ້ອມນີ້, ກໍເປັນການກະກຽມຄວາມພ້ອມໃນການຕ້ອນຮັບ ແລະ ເຂົ້າຮ່ວມກິດຈະກຳຕ່າງໆຂອງພັນລະຍາການນໍາອາຊຽນ ໃນໄລຍະທີ່ ສປປ ລາວ ເປັນເຈົ້າພາບກອງປະຊຸມສຸດຍອດອາຊຽນ ປີ 2024 ແລະ ການເຄື່ອນໄຫວການພົບປະສອງຝ່າຍທາງລັດຖະການ.
ການຈັດຊຸດຝຶກອົບຮົມຄັ້ງນີ້ ແມ່ນໄດ້ຮັບຜົນສໍາເລັດເປັນຢ່າງດີ ຊຶ່ງຜູ້ເຂົ້າຮ່ວມຝຶກອົບຮົມ ໄດ້ຮັບຮູ້ຂໍ້ມູນ ພື້ນຖານ ກ່ຽວກັບ ວຽກງານຕ່າງໆ ເປັນຕົ້ນ: ໄດ້ແລກປ່ຽນຄໍາຄິດຄໍາເຫັນ ກ່ຽວກັບ ພິທີການທູດ-ມາລະຍາດທາງ ສັງຄົມ, ການກະກຽມດ້ານພິທີການໃຫ້ແກ່ການໄປເຄື່ອນໄຫວ ຢູ່ ພາຍໃນ ແລະ ຕ່າງປະເທດ, ການຕ້ອນຮັບແຂກ ຂັ້ນສູງຂອງຕ່າງປະເທດ ພ້ອມທັງໄດ້ມີການຝຶກຊ້ອມການເຮັດຈໍາລອງຕົວຈິງອື່ນໆ. ນອກຈາກນີ້, ຜູ້ເຂົ້າຮ່ວມກໍໄດ້ ມີໂອກາດແລກປ່ຽນປະສົບການ, ການເປັນເຈົ້າພາບກອງປະຊຸມສຸດຍອດ ອາຊຽນ-ອົສຕຣາລີ ຂອງ ອົສຕຣາລີ ແລະ ແຜນການເຄື່ອນໄຫວກິດຈະກຳຕ່າງໆຂອງພັນລະຍາການນໍາອາຊຽນ ສໍາລັບປີ 2024 ຊຶ່ງເຫັນວ່າເປັນ ບົດຮຽນທີ່ສໍາຄັນໃຫ້ແກ່ບັນດາຜູ້ເຂົ້າຮ່ວມ ເພື່ອນໍາມາໝູນໃຊ້ໃນການປະຕິບັດຕົວຈິງ ໂດຍສະເພາະປະກອບສ່ວນ ເຂົ້າໃນກິດຈະກຳຕ່າງໆຂອງພັນລະຍາການນໍາອາຊຽນ ໃນໄລຍະທີ່ ສປປ ລາວ ເປັນປະທານອາຊຽນ ປີ 2024 ໃຫ້ ໄດ້ຮັບໝາກຜົນຢ່າງຈົບງາມ.
(ຂ່າວ: ສະຖາບັນການຕ່າງປະເທດ: ພາບ: ແສງຈັນ)
