ກະຊວງປ້ອງກັນປະເທດໄດ້ຈັດກອງປະຊຸມເຜີຍແຜ່ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 8 ສະໄໝທີ XI ແລະ ມະຕິເລກທີ 04/ກມສພ ຂຶ້ນໃນວັນທີ 8 ສິງຫານີ້ ໂດຍການເປັນປະທານຂອງສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະ ຊວງປ້ອງກັນເທດ, ມີບັນດາການນໍາກະຊວງ, ຜູ້ຕາງໜ້າ 4 ກົມໃຫຍ່ທີ່ກ່ຽວຂ້ອງເຂົ້າຮ່ວມ.
ສະຫາຍ ພົນເອກ ຈັນສະໝອນ ຈັນຍາລາດ ໄດ້ເຜີຍແຜ່ເຊື່ອມຊຶມ ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ຊຶ່ງເນື້ອໃນສຳຄັນມະຕິຂອງກອງປະຊຸມດັ່ງກ່າວໄດ້ຕີລາຄາການ ຈັດຕັ້ງປະຕິບັດແຜນພັດ ທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຊຶ່ງໃນນີ້ໃຫ້ຮູ້ເຖິງ 9 ວຽກງານຈຸດສຸມໃນ 6 ເດືອນທ້າຍປີ 2024; ກ່ຽວກັບການປະ ຕິຮູບລັດວິສາຫະກິດໄດ້ມີການຕີລາຄາຢ່າງກົງໄປກົງມາຕໍ່ສະພາບການດຳເນີນທຸລະກິດຂອງລັດວິສາຫະກິດໃນໄລຍະຜ່ານມາ ພ້ອມທັງໃຫ້ທັດສະນະຕ້ອງສືບ ຕໍ່ຢຶດໝັ້ນແນວທາງການສ້າງເສດຖະກິດລັດ ກໍຄືສ້າງລັດວິສາຫະກິດໃຫ້ມີຄວາມເຂັ້ມແຂງ ເປັນເຈົ້າພາທາງໃນລະ ບົບເສດຖະກິດແຫ່ງຊາດ ແລະ ເປັນເອກະພາບກຳນົດ 5 ຈຸດສຸມປະຕິຮູບລັດວິສາຫະກິດ ໃຫ້ເຂັ້ມແຂງໃນຕໍ່ໜ້າ; ຕີລາຄາກ່ຽວກັບການຍົກສູງຄຸນນະພາບການດຳເນີນຄະດີຕາມຂະ ບວນຍຸຕິທໍາ, ຕາມມະຕິເລກທີ 112/ກມສພ, ລົງວັນທີ 2 ມິຖຸນາ 2020 ຂອງກົມການ ເມືອງສູນກາງພັກ ຊຶ່ງມະຕິກອງປະຊຸມໄດ້ເປັນເອກະພາບຕີລາຄາສູງຕໍ່ບັນດາຜົນສຳເລັດ ທີ່ອົງການຮັບຜິດຊອບດຳເນີນຄະດີຕາມຂະ ບວນຍຸຕິທໍາທີ່ໄດ້ສ້າງມາ, ພ້ອມດຽວກັນໄດ້ໃຫ້ທິດຊີ້ນໍາບັນຫາຈໍານວນໜຶ່ງ; ກ່ຽວກັບການປັບປຸງຄຸນນະພາບການສຶກສາ ແລະ ແກ້ໄຂບັນ ຫາການປະລະການຮຽນ, ການຂາດແຄນຄູສອນ ຊຶ່ງມະຕິກອງປະ ຊຸມໄດ້ເນັ້ນໜັກໃຫ້ເອົາໃຈໃສ່ 3 ບັນຫາສໍາຄັນ ພ້ອມນີ້, ມະຕິກອງປະຊຸມໄດ້ລະບຸເຖິງການກະກຽມເອກະສານຕົ້ນ ຕໍຂອງກອງປະຊຸມໃຫຍ່ ຄັ້ງທີ XII ຂອງພັກ ແລະ ບັນດາວຽກຈຸດສຸມແຕ່ນີ້ຮອດກອງປະຊຸມຄົບຄະນະຄັ້ງທີ 9 ໃນທ້າຍປີ 2024.
ຈາກນັ້ນ, ສະຫາຍ ພົນຕີ ສອນທອງ ພົມລາວົງ ກໍາມະການຄະນະປະຈໍາພັກ ກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງກອງທັບ ໄດ້ເຜີຍແຜ່ເຊື່ອມຊຶມມະຕິເລກທີ 04/ກມສພ ວ່າດ້ວຍການສ້າງເສດຖະກິດເອ ກະລາດເປັນເຈົ້າຕົນເອງໃນໄລຍະໃໝ່ ແລະ ທິດທາງລວມ, ເປົ້າໝາຍສູ້ຊົນ, ແຜນນະໂຍບາຍເພື່ອເພີ່ມທະວີການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ສ້າງຄວາມເຂັ້ມແຂງໃຫ້ແກ່ການຜະລິດ, ການບໍລິການ, ລະບົບການເງິນ-ເງິນຕາ ແລະ ການຄຸ້ມຄອງບໍລິຫານລັດ ເພື່ອເປັນພື້ນຖານໃຫ້ແກ່ການສ້າງເສດຖະກິດເອກະລາດເປັນເຈົ້າຕົນເອງຢ່າງມີບາດກ້າວເດີນທີ່ໜັກແໜ້ນ; ພ້ອມນີ້, ໄດ້ໃຫ້ຮູ້ເຖິງການຈັດຕັ້ງປະຕິບັດທີ່ລະບຸໃນມະຕິດັ່ງກ່າວເພື່ອໃຫ້ພະນັກ ງານຫຼັກແຫຼ່ງອ້ອມຂ້າງກະຊວງປ້ອງກັນປະເທດມີຄວາມເຂົ້າໃຈເລິກເຊິ່ງ ໃນການຈັດຕັ້ງປະຕິບັດມະຕິໃຫ້ໄດ້ຮັບຜົນດີ.
ຂ່າວ: ກະຊວງປ້ອງກັນປະເທດ
