ວິທະຍຸກະຈາຍສຽງແຫ່ງຊາດຫວຽດນາມ ເມື່ອບໍ່ດົນມານີ້ຢູ່ນະຄອນຫລວງຮ່າໂນ້ຍ ຄະນະບໍລິຫານງານສູນກາງພັກ ກອມມູນິດ ຊຸດທີ XIII ໄດ້ຈັດກອງປະຊຸມ ເພື່ອແນະນຳ ບຸກຄະລາກອນ ແລະ ເລືອກຕັ້ງ ຜູ້ດຳລົງຕຳແໜ່ງ ເລຂາທິການໃຫຍ່ ຄະນະບໍລິຫານງານ ສູນກາງພັກ ກອມມູນິດ ຊຸດທີ XIII. ສະຫາຍ ຟ້າມມິງຈິງ, ນາຍົກລັດຖະມົນຕີ ຫວຽດນາມ, ກຳມະການ ກົມການເມືອງ ໄດ້ຕາງໜ້າ ກົມການເມືອງ ບໍລິຫານ ກອງປະຊຸມ.ເປີດກອງປະຊຸມ ສູນກາງ ແມ່ນສະຫງວນ ເວລາ 1 ນາທີ ກົ້ມຫົວໄວ້ອາໄລ ສະຫາຍ ເລຂາ ທິການໃຫຍ່ ຫງວຽນ ຝູ໋ຈ້ອງ ການນຳ ດີເລີດ ພິເສດ, ແບບຢ່າງດີເດັ່ນ ກ່ຽວກັບ ການຮ່ຳຮຽນ, ປະຕິບັດ ຕາມແນວຄິດ, ຄຸນສົມບັດ, ແບບແຜນ ການດຳລົງຊີວິດ ຂອງປະທານໂຮ່ຈີມິນ. ຢູ່ກອງປະຊຸມ, ອີງຕາມ ບັນດາຂໍ້ກຳນົດຂອງພັກ, ບົນພື້ນຖານກຳນົດທິດ ການແນະນຳ ບຸກຄະລາກອນ ຂອງກົມການເມືອງ, ສູນກາງ ໄດ້ເຫັນດີ ເປັນເອກະພາບ ຢູ່ລະດັບສູງທີ່ສຸດ ດ້ວຍບັດສະໜັບສະໜູນ 100% ເລືອກຕັ້ງ ສະຫາຍ ປະທານ ປະເທດ ໂຕເລິມ, ກຳມະການ ກົມການເມືອງ ດຳລົງຕຳແໜ່ງ ເລຂາທິການໃຫຍ່ ຄະນະບໍລິຫານງານ ສູນກາງພັກກອມມູນິດ ຫວຽດນາມ ຊຸດທີ XIII. ກ່າວຄຳເຫັນຮັບດຳລົງຕຳແໜ່ງ, ສະຫາຍ ເລຂາທິການໃຫຍ່ ໂຕເລິມ ໄດ້ຢັ້ງຢືນວ່າ: ຂ້າພະເຈົ້າ ຂໍສະບານຕົວ ຕໍ່ສູນກາງພັກ, ທົ່ວພັກ, ທົ່ວປວງຊົນ ແລະ ທົ່ວກອງທັບ ຈະມານະພະຍາຍາມ ສູ້ຊົນ ຢ່າງບໍ່ຢຸດຢັ້ງ, ພ້ອມກັບ ສູນກາງສືບທອດ, ເສີມຂະຫຍາຍ ມູນເຊື້ອ ສະຫງ່າອົງອາດ, ບົດຮຽນ ປະສົບການອັນລ້ຳຄ່າ ຂອງພັກ ແລະ ບັນດາ ໝາກຜົນ ເຊິ່ງກອງປະຊຸມໃຫຍ່ ຂອງພັກກອມມູນິດ ຫວຽດນາມ ຄັ້ງຕ່າງ, ໃນນັ້ນ ມີກອງປະຊຸມໃຫຍ່ ຄັ້ງທີ XIIIຂອງພັກກອມມູນິດ ຫວຽດນາມ ບັນລຸໄດ້ ຢ່າງບໍ່ຢຸດຢັ້ງ; ເສີມຂະຫຍາຍ ຢູ່ລະດັບ ສູງທີ່ສຸດ ຈິດໃຈ “ເປັນເຈົ້າຕົນເອງ, ມີຄວາມໄວ້ເນື້ອເຊື່ອໃຈ, ສ້າງຄວາມເຂັ້ມແຂງ ດ້ວຍຕົນເອງ, ຄວາມເອກອ້າງທະນົງໃຈ ແຫ່ງຊາດ”; ເພີ່ມທະວີຄວາມສາມັກຄີ, ເອກະພາບພາຍໃນພັກ, ກຸ່ມກ້ອນມະຫາສາມັກຄີທົ່ວປວງຊົນທັງຊາດຢ່າງບໍ່ຢຸດຢັ້ງ; ສືບຕໍ່ຍູ້ແຮງການກໍ່ສ້າງ, ປັບປຸງພັກ, ປ້ອງກັນ, ຕ້ານການສໍ້ລາດບັງຫລວງ, ໄພຫຍໍ້ທໍ້.ສະຫາຍ ເລຂາທິການໃຫຍ່ ໂຕເລິມ ໃຫ້ຮູ້ວ່າ: ຈະສຸມໃສ່ຊີ້ນຳການຈັດຕັ້ງປະຕິບັດວຽກງານສະຫຼຸບ 40 ປີແຫ່ງວັນປ່ຽນແປງໃໝ່ປະເທດຊາດ ແລະ ວຽກງານຕ່າງໆເພື່ອຈັດຕັ້ງສຳເລັດກອງປະຊຸມໃຫຍ່ຄັ້ງທີ XIV ຂອງພັກ, ສືບທອດ ບັນດາຜົນສຳເລັດ ທິດສະດີ ສຳຄັນ ກ່ຽວກັບ ສັງຄົມນິຍົມ ແລະ ເສັ້ນທາງໄປສູ່ ສັງຄົມນິຍົມ ຫວຽດນາມ ເຊິ່ງການນຳລຸ້ນຕ່າງໆ ຂອງພັກ, ໃນນັ້ນມີ ສະຫາຍ ເລຂາທິການໃຫຍ່ ຫງວຽນຝູຈ້ອງ ສະຫລຸບ ວາງອອກເສັ້ນທາງ ທີ່ຖືກຕ້ອງ, ນຳປະເທດຊາດ ສືບຕໍ່ພັດທະນາ ຢ່າງຮອບດ້ານ ໃນໄລຍະຈະມາເຖິງ./.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
