ໃນວັນທີ 1 ສິງຫາ ຜ່ານມາ ທ່ານນາງ ສວນສະຫວັນ ວິຍະເກດ ລັດຖະມົນຕີ (ລມຕ) ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານນາງ ຟາງ ຫົງ (Fang Hong) ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປ ຈີນ ປະຈໍາ ສປປ ລາວ ຄົນໃໝ່.
ທ່ານນາງ ສວນສະຫວັນ ວິຍະເກດ ໄດ້ສະແດງຄວາມຍິນດີຕ້ອນຮັບ ແລະ ສະແດງຄວາມຊົມເຊີຍຕໍ່ທ່ານນາງ ຟາງ ຫົງ ທີ່ໄດ້ຖືກແຕ່ງຕັ້ງໃຫ້ມາດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປ ຈີນ ປະຈໍາ ສປປ ລາວ ຄົນໃໝ່ ຊຶ່ງສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈຈາກພັກ, ລັດຖະບານ ແລະ ປະຊາຊົນຈີນໃຫ້ທ່ານມາປະຕິບັດໜ້າທີ່ການທູດຢູ່ ສປປ ລາວ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການເປັນຄູ່ຮ່ວມຊາຕາກໍາລາວ-ຈີນ, ຈີນ-ລາວໃຫ້ຈະເລີນງອກງາມຍິ່ງໆຂຶ້ນ. ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ ແລະ ການເປັນຄູ່ຮ່ວມຍຸດທະສາດຮອບດ້ານໝັ້ນຄົງຍາວນານຕາມທິດ 4 ດີ, ການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ທີ່ນັບມື້ນັບໄດ້ຮັບການເສີມຂະຫຍາຍຢ່າງຕໍ່ເນື່ອງທັງທາງກວ້າງ ແລະ ທາງເລິກ; ພ້ອມທັງໄດ້ແລກ ປ່ຽນຄໍາຄິດຄໍາເຫັນກ່ຽວກັບການສົ່ງເສີມການຮ່ວມມືຂອງສອງພັກ, ສອງລັດ ໂດຍສະເພາະການຮ່ວມມືໃນຂົງເຂດວຽກງານ ຖວທ ລະຫວ່າງສອງປະເທດໃຫ້ຫຼາຍຂຶ້ນ; ສອງຝ່າຍຈະສືບຕໍ່ຈັດຕັ້ງປະຕິບັດການຕົກລົງທີ່ເປັນເອກະພາບຂອງການນໍາຂັ້ນສູງຂອງສອງປະເທດ ໂດຍສະເພາະການຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຕັ້ງຄູ່ຮ່ວມຊາຕາກໍາລາວ-ຈີນ ສະບັບໃໝ່ (2024-2028) ໃຫ້ເປັນຮູບປະທໍາ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ ລວມທັງແຜນການຮ່ວມມືຂອງກະຊວງ ຖວທ ຂອງ ສປ ຈີນ. ພ້ອມກັນນີ້, ທ່ານນາງ ສວນສະຫວັນ ວິຍະເກດ ໄດ້ແລກປ່ຽນກັບທ່ານທູດໂດຍສະເພາະປີ 2024 ເປັນປີທ່ອງທ່ຽວລາວ, ລັດຖະບານ ສປປ ລາວ ໄດ້ມີນະໂຍບາຍຍົກເວັ້ນວີຊາແບບບໍ່ຕິດວີຊາສະຕິກເກີ້ສໍາລັບນັກທ່ອງທ່ຽວຈີນ, ຮົງກົງ, ມາເກົ້າ ທີ່ຖືໜັງສືຜ່ານແດນ (ທໍາມະດາ) ລວມທັງນັກທ່ອງທ່ຽວຈີນທີ່ເປັນກຸ່ມທີ່ຖືໜັງສືຜ່ານແດນໄຕ້ຫວັນແມ່ນອອກວີຊາປິວແຕ່ບໍ່ຕິດວີຊາສະຕິກເກີ້ທີ່ມາທ່ອງທ່ຽວເປັນກຸ່ມໃນນາມບໍລິສັດນໍາທ່ຽວສາມາດພັກເຊົາໄດ້ 15 ວັນ, ແຕ່ຕ້ອງໃຫ້ຜ່ານການບໍລິການຂອງບໍລິສັດນໍາທ່ຽວທີ່ຢູ່ ສປປ ລາວ ແລະ ສປ ຈີນ ແລະ ໄດ້ລົງທະບຽນຮັບຮອງຈາກກະຊວງ ຖວທ ລວມທັງຊຸກຍູ້ສົ່ງເສີມບັນດາວິສາຫະກິດຈີນທີ່ມາລົງທຶນຢູ່ ສປປ ລາວ ໂດຍສະເພາະໃນຂົງເຂດ ຖວທ ໃຫ້ຫຼາຍຂຶ້ນກວ່າເກົ່າ. ພ້ອມນີ້, ທ່ານລັດຖະມົນຕີກະຊວງ ຖວທ ກໍໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວສະແດງຄວາມຂອບໃຈ ແລະ ຮູ້ບຸນຄຸນຢ່າງເລິກເຊິ່ງຕໍ່ພັກ, ລັດ ຖະບານ ແລະ ປະຊາຊົນຈີນທີ່ໄດ້ໃຫ້ການຊ່ວຍເຫຼືອອັນລໍ້າຄ່າແກ່ ສປປ ລາວຕະຫຼອດມາ.
ທ່ານນາງ ຟາງ ຫົງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຈາກທ່ານລັດຖະມົນຕີກະຊວງ ຖວທ ໃນຄັ້ງນີ້, ພ້ອມທັງໄດ້ແຈ້ງໃຫ້ຊາບເຖິງຜົນສໍາເລັດກອງປະຊຸມຄົບຄະນະຄັ້ງທີ 3 ຂອງຄະນະບໍລິຫານງານສູນກາງພັກກອມມູນິດຈີນສະໄໝທີ 20 ໂດຍສຸມໃສ່ລົງເລິກການປະຕິຮູບຢ່າງຮອບດ້ານ ແລະ ກ້າວໄປສູ່ການຫັນເປັນຍຸກສະໄໝໃໝ່ຂອງຈີນ ຊຶ່ງມີຫຼາຍບັນຫາທີ່ເປັນບ່ອນອີງໃນການຜັນຂະຫຍາຍສາຍພົວພັນການຮ່ວມມືລາວ-ຈີນ, ຈີນ-ລາວ ແລະ ສະ ແດງຄວາມໝາຍໝັ້ນວ່າ ຈະເຮັດວຽກຮ່ວມກັບກະຊວງ ຖວທ ຢ່າງໃກ້ຊິດເພື່ອສືບຕໍ່ຊຸກຍູ້ສົ່ງເສີມສາຍພົວພັນມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດຮອບດ້ານໝັ້ນຄົງຍາວນານຕາມທິດ 4 ດີ ແລະ ຄູ່ຮ່ວມຊາຕາກໍາຈີນ-ລາວ, ລາວ-ຈີນໃຫ້ແຕກດອກອອກຜົນຂຶ້ນເລື້ອຍໆ ແລະ ຈະເພີ່ມທະວີຢ່າງໃກ້ຊິດກັບກະຊວງ ຖວທ ເພື່ອປະຕິບັດວຽກງານການຮ່ວມມື ແລະ ພັດທະນາໃນຂົງເຂດ ຖວທ ຂອງສປປ ລາວ.
ຂ່າວ: ຂປລ, ພາບ: ອ່າຍຄໍາ
