ວັນທີ 26 ສິງຫາ 2024 ນີ້, ທີ່ພະແນກແຜນການ ແລະ ການລົງທຶນແຂວງ ອັດຕະປື ໄດ້ຈັດພິທີເຊັນບົດບັນທຶກຄວາມເຂົ້າໃຈ ເພື່ອສຶກສາສໍາຫຼວດຄວາມເປັນໄປໄດ້ໂຄງ ການລົງທຶນພັດທະນາແຫຼ່ງທ່ອງທ່ຽວ ເຂດອ່າງໂຕ່ງເຂື່ອນໄຟຟາເຊກະໝານ 1 ແລະ ສວນອານຸສອນສະຖານລົດຕັງປາງສົງຄາມ ເພື່ອໃຫ້ກາຍ ເປັນສະຖານທີ່ທ່ອງທ່ຽວຄົບວົງຈອນເຂດເມືອງຊານໄຊ ລະຫວ່າງ ອົງການປົກຄອງ ແຂວງອັດຕະປື ກັບບໍລິ ສັດ ຄູນຊັບຈະເລີນກໍ່ສ້າງ-ສ້ອມແປງຂົວທາງ ແລະ ຊົນລະປະທານຈໍາກັດຜູ້ດຽວ. ເຂົ້າຮ່ວມໃນພິທີມີ ທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື, ມີພະແນກການກ່ຽວຂ້ອງແຂວງ,ເມືອງ ແລະ ພາກສ່ວນກ່ຽວຂ້ອງ.
ການເຊັນບົດບັນທຶກຄວາມເຂົ້າໃຈເທື່ອນີ້, ຝ່າຍອົງການປົກຄອງ ແຂວງອັດຕະປື ມີຈຸດປະສົງພັດທະນາເສດຖະກິດ-ສັງຄົມຂອງແຂວງ ແລະ ເພື່ອສົ່ງເສີມການພັດ ທະນາວຽກງານທ່ອງທ່ຽວພາຍໃນແຂວງ ເປັນການດຶງດູດນັກທ່ອງທ່ຽວໃຫ້ເຂົ້າມາທ່ອງທ່ຽວພາຍໃນແຂວງຫຼາຍຂື້ນ, ສ່ວນຝ່າຍບໍລິສັດມີຈຸດປະສົງທີ່ຈະລົງທຶນພັດທະ ນາແຫຼງທ່ອງທ່ຽວເຂດອ່າງເຊກະໝານ 1 ແລະ ສວນອະນຸສອນສະຖານທີ່ລົດຕັງປາງສົງຄາມ ເພື່ອໃຫ້ກາຍເປັນສະຖານທີ່ທ່ອງທ່ຽວຄົບວົງຈອນ ແລະ ເປັນຈຸດໝາຍປາຍທາງຂອງນັກທ່ອງທ່ຽວຢູ່ເຂດບ້ານຈະເລີນໄຊ, ເມືອງຊານໄຊ ໃນເນື້ອທີ່ທັງໝົດປະມານ 275 ເຮັກຕາ.
ຮ່ວມລົງນາມເຊັນສັນຍາໃນຄັ້ງນີ້ ຕາງໜ້າໃຫ້ ອົງການປົກຄອງ ແຂວງອັດຕະປື ໂດຍແມ່ນທ່ານ ສູນນະຄອນ ແກ້ວວຽງຄຳ ຫົວໜ້າພະແນກ ແຜນການ ແລະ ການລົງທຶນແຂວງ, ທ່ານ ບຸນປອນ ອ່ອນໄຊວຽງ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ທ່ານ ຄໍາສິງ ພົງສະຫວັດ ຮອງຫົວໜ້າພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງ, ທ່ານ ທອງສະຫວັດ ສິດທິຈັກ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ສຸວັນສີ ແກ້ວວິເສີດ ເຈົ້າເມືອງຊານໄຊ. ສ່ວນຝ່າຍ ບໍລິສັດ ໂດຍແມ່ນທ່ານ ກົງຄໍາ ແສງມີນາທີ ອຳນວຍການບໍລິສັດຄູນຊັບຈະເລີນກໍ່ສ້າງ-ສ້ອມແປງຂົວທາງ ແລະຊົນລະປະທານຈໍາກັດຜູ້ດຽວ, ທ່ານ ຈັນທະວົງແສງມີນາທີ ທີ່ປຶກສາບໍລິສັດ,.
ຂ່າວ: ວັດທະນາ
