ໃນຕອນເຊົ້າຂອງວັນທີ 19 ກໍລະກົດ 2024, ທີ່ ກະຊວງ ການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກ ລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ໂຄອິຊຸມິ ຊຶໂຕະມຸ (Mr. KOIZUMI Tsutomu), ເອກອັກຄະຣາຊະທູດວິສາ ມັນຜູ້ມີອຳນາດເຕັມ ແຫ່ງ ຍີ່ປຸ່ນ ປະຈຳ ສປປ ລາວ.
ໃນໂອກາດນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທ່ານ ເອກອັກຄະຣາຊະທູດ ໂຄອິຊຸມິ ຊຶໂຕະມຸ ທີ່ໄດ້ຮັບຄວາມໄວ້ເນື້ອ ເຊື່ອໃຈຈາກ ລັດຖະບານ ແລະ ປະຊາຊົນຍີ່ປຸ່ນ ໃຫ້ມາປະຕິບັດໜ້າທີ່ການທູດ ຢູ່ ສປປ ລາວ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນ ນານຂອງສອງປະເທດ ພາຍໃຕ້ການເປັນ ຄູ່ຮ່ວມຍຸດທະສາດ ໃຫ້ຈະເລີນງອກງາມຍິ່ງໆຂຶ້ນ, ທັງຍັງໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືຢ່າງໃກ້ຊິດຂອງສອງປະເທດ, ພິເສດໃນປີ 2025 ທີ່ຈະມາເຖິງນີ້ ຈະເປັນປີທີ່ມີຄວາມໝາຍສຳຄັນ ຂອງສອງປະເທດ ລາວ-ຍີ່ປຸ່ນ ກໍຄື ການສະເຫຼີມສະຫຼອງ ຄົບຮອບ 70 ປີ ແຫ່ງ ການສ້າງຕັ້ງສາຍພົວພັນການທູດ, ການເປັນຄູ່ຮ່ວມຍຸດທະສາດ ຄົບຮອບ 10 ປີ ແລະ ຍັງເປັນປີຄົບຮອບ 60 ປີ ທີ່ຍີ່ປຸ່ນໄດ້ສົ່ງອາສາສະໝັກມາປະຈໍາຢູ່ ສປປ ລາວ (ຄັ້ງທຳອິດໃນປີ 1965) ໃຫ້ມີບັນຍາກາດຟົດຟຶ້ນ ແລະ ປະກອບດ້ວຍຫຼາຍກິດຈະກຳຮ່ວມກັນ.
ພ້ອມດຽວກັນນີ້, ທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ສະແດງຄວາມຂອບໃຈໄປຍັງ ລັດຖະບານ ແລະ ປະຊາຊົນຍີ່ປຸ່ນ ທີ່ຍາມໃດກໍ່ໃຫ້ການຊ່ວຍເຫຼືອ ແລະ ສະໜັບສະ ໜູນ ໃນການພັດທະນາເສດຖະກິດ-ສັງຄົມ ຂອງ ສປປ ລາວ ຕະຫຼອດໄລຍະຜ່ານມາ, ໂດຍສະເພາະການພັດທະນາຂົງເຂດບູລິມະສິດຂອງ ສປປ ລາວ ເປັນຕົ້ນແມ່ນ ການພັດທະນາຊັບພະຍາ ກອນມະນຸດ, ໂຄງລ່າງພື້ນຖານ, ການເກັບກູ້ລະເບີດ (UXO), ສາທາລະນະສຸກ, ກະສິກໍາ-ປ່າໄມ້ ແລະ ອື່ນໆ, ລວມທັງການຊ່ວຍສົ່ງ ຊ່ຽວຊານ ແລະ ອາສາສະໝັກ ມາປະຈໍາຢູ່ບັນດາຂະແໜງ ການຕ່າງໆຂອງລາວ, ພິເສດກໍແມ່ນການຊ່ວຍເຫຼືອ ແລະ ສະໜັບສະໜູນ ສປປ ລາວ ໃນການເປັນປະທານກອງປະຊຸມອາຊຽນ ໃນປີ 2024 ນີ້, ຊຶ່ງ ສປປ ລາວ ມີຄວາມຍິນດີທີ່ຈະຕ້ອນຮັບ ຄະນະຜູ້ແທນຂັ້ນສູງຂອງຍີ່ປຸ່ນ ທີ່ຈະເຂົ້າຮ່ວມກອງປະຊຸມລັດຖະມົນຕີຕ່າງປະ ເທດ ອາຊຽນ ໃນເດືອນກໍລະກົດ 2024 ແລະ ກອງປະຊຸມສຸດຍອດອາຊຽນ ໃນເດືອນຕຸລາ 2024 ທີ່ຈະມາເຖິງນີ້.
ໃນຂະນະດຽວກັນ, ທ່ານ ເອກອັກຄະຣາຊະທູດ ໂຄອິຊຸມິ ຊຶໂຕະມຸ ກໍ່ໄດ້ເຫັນດີເປັນເອກະພາບຕໍ່ການຕີລາຄາສູງການພົວພັນຮ່ວມມື ລະຫວ່າງ ສປປ ລາວ ແລະ ຍີ່ປຸ່ນ ຂອງທ່ານ ຮອງນາຍົກ ລັດຖະມົນຕີ ສະເຫຼີມໄຊ ກົມມະສິດ, ພ້ອມທັງໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້ ແລະ ສະແດງຄວາມໝາຍໝັ້ນວ່າ ຈະເຮັດວຽກຮ່ວມກັບກະຊວງການຕ່າງປະເທດ ແລະ ພາກສ່ວນກ່ຽວຂ້ອງຂອງຝ່າຍລາວ ຢ່າງໃກ້ຊິດ ເພື່ອສືບຕໍ່ຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີ ງາມ ທີ່ມີມາແຕ່ດົນນານຂອງສອງປະເທດ ພາຍໃຕ້ການເປັນຄູ່ຮ່ວມຍຸດທະສາດ ໃຫ້ໄດ້ຮັບການພັດທະນາຍິ່ງໆຂຶ້ນ.
