ວັນທີ 19 ກໍລະກົດ 2024, ສະມາຄົມມິດຕະພາບ ລາວ- ຫວຽດນາມ ຂັ້ນສູນກາງ ໄດ້ຈັດກອງປະຊຸມທົ່ວປະເທດຄັ້ງທີ III ຂອງ ສະມາຄົມມິດຕະພາບ ລາວ-ຫວຽດນາມ ໂດຍການເປັນປະທານ ຂອງ ສະຫາຍ ບັນດິດ. ສຈ. ບໍ່ວຽງຄໍາ ວົງດາລາ, ກໍາມະ ການສູນກາງພັກ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ປະທານສະມາຄົມມິດຕະພາບ ລາວ-ຫວຽດນາມ ຂັ້ນສູນກາງ, ມີ ສະຫາຍ ທອງສະຫວັນ ພົມວິຫານ, ກໍມະການສູນ ກາງພັກ,ຫົວໜ້າຄະນະພົວພັນຕ່າງປະເທດສູນກາງພັກ, ສະຫາຍ ຫງວຽນ ດັກວິງ, ກຳມະການສູນກາງພັກ, ຄະນະປະຈຳສະພາ ແຫ່ງຊາດ, ປະທານກໍາມາທິການວັດທະນະທຳ-ກິລາ ຂອງສະພາ ແຫ່ງຊາດ, ປະທານສະມາຄົມມິດຕະພາບ ຫວຽດນາມ-ລາວ ຂັ້ນສູນກາງ, ບັນດາປະທານ, ຮອງປະທານ ຈາກສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດລາວ, ບັນດາອົງການຈັດຕັ້ງຂັ້ນສູນກາງ ແລະ ເອກອັກຄະລັດຖະທູດແຫ່ງ ສສ ຫວຽດ ນາມ ປະຈໍາ ສປປ ລາວ ໃຫ້ກຽດເຂົ້າຮ່ວມເປັນແຂກກິຕິມະສັກ.
ນອກນັ້ນ, ຍັງມີບັນດາປະທານ, ຮອງປະທານ ແລະ ກອງເລຂາ ສະມາຄົມມິດຕະພາບ ລາວ-ຫວຽດນາມ ນະຄອນຫຼວງ ແລະ ບັນດາແຂວງທົ່ວປະເທດເຂົ້າຮ່ວມ. ໃນກອງປະຊຸມ ໄດ້ຮັບຟັງການລາຍງານ ແລະ ຕີລາຄາການຈັດຕັ້ງປະຕິບັດວຽກງານ ຂອງສະມາຄົມ ມິດຕະພາບ ລາວ-ຫວຽດນາມ ໃນໄລຍະ 05 ປີ ຜ່ານມາ (2019-2024) ແລະ ທິດທາງແຜນການໃນຊຸມປີຕໍ່ໜ້າ (2024-2029).
ໃນໄລຍະຊຸມປີຜ່ານມາ ສະມາຄົມ ມິດຕະພາບ ລາວ-ຫວຽດນາມ ທຸກຂັ້ນໄດ້ເອົາໃຈໃສ່ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ ຂອງຕົນ ສົມທົບກັບຄູ່ຮ່ວມມືຝ່າຍ ຫວຽດນາມ ໃນການເຮັດວຽກງານການທູດປະຊາຊົນ ເຄື່ອນໄຫວຄຽງຄູ່ກັບການພົວພັນດ້ານພັກ, ການທູດສາຍລັດ ໂດຍສະເພາະເຮັດໜ້າໂຄສະ ນາເຜີຍແຜ່, ສຶກສາອົບຮົມປະຊາຊົນສອງປະເທດໂດຍສະເພາະຄຸນລຸ່ນໜຸ່ມ ໃຫ້ຮັບຮູ້ ແລະ ເຂົ້າໃຈຢ່າງຈະແຈ້ງ ແລະ ເລິກເຊິ່ງ ຕໍ່ສາຍພົວພັນອັນພິເສດທີ່ຫາຍາກໃນການພົວພັນສາກົນ ຂອງສອງຊາດ ລາວ-ຫວຽດນາມ. ຜົນສຳເລັດໃນຫຼາຍດ້ານອັນພົ້ນເດັ່ນຜ່ານມາແມ່ນການຈັດກິດຈະກຳທີ່ເປັນປະຫວັດສາດເຊັ່ນ: ກິດຈະກໍາເດີນຕາມຮອຍປະທານ ໂຮ່ຈິມີນ ແລະ ປະທານ ໄກ ສອນ ພົມວິຫານ, ງານບຸນມະໂຫລານປະຊາຊົນລາວ-ຫວຽດ ນາມ, ຈັດພິມວາລະສານສະບັບພິເສດ, ງານແຂ່ງຂັນແຕ່ງບົດ ກອນ, ເພງ ແລະ ກິລາມິດຕະພາບ, ເຊິ່ງບັນດາກິດຈະກຳເຫຼົ່ານັ້ນຖືເປັນການປະກອບສ່ວນໃນການປົກປັກຮັກສາ, ເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນ ສອງຊາດ ລາວ-ຫວຽດນາມ ໃຫ້ນັບມື້ໄດ້ຮັບການເສີມຂະຫຍາຍທັງລວງກ້ວາງ ແລະ ລວງເລິກ, ຂຽວສົດງົດງາມ ແລະ ເກີດດອກອອກຜົນ.
ກອງປະຊຸມ ໄດ້ດໍາເນີນໄປດ້ວຍບັນດາຍາກາດຟົດຟື້ນ, ບັນ ດາຜູ້ເຂົ້າຮ່ວມກອງປະຊຸມ ໄດ້ປະກອບຄຳເຫັນໃສ່ບົດລາຍງານຢ່າງກົງໄປກົງມາຢ່າງພາວະວິໃສ ແລະ ມີຄວາມຮັບbຜິດຊອບ ເປັນຕົ້ນແມ່ນປະກອບຄຳເຫັນໃສ່ບັນດາແຜນການເພື່ອກະກຽມສະເຫຼີມສະຫຼອງວັນສຳຄັນຕ່າງໆ ຂອງສອງຊາດທີ່ຈະໝູນວຽນມາເຖິງນີ້. ພິເສດ ກອງປະຊຸມໄດ້ຮັບກຽດຢ່າງສູງຮັບຟັງການໂອ້ລົມ ຈາກ ສະຫາຍ ປອ. ກິແກ້ວ ໄຂຄໍາພິທູນ, ກໍາມະການ ກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກ ລັດຖະມົນຕີ, ເຊິ່ງສະຫາຍ ໄດ້ມີຄໍາເຫັນໂອ້ລົມໃຫ້ ສະມາຄົມມິດ ຕະພາບ ລາວ-ຫວຽດນາມ ທຸກຂັ້ນເອົາໃຈໃສ່ປະສານສົມທົບກັບຄູ່ຮ່ວມມືຝ່າຍ ຫວຽດນາມ ໃນການສຶກສາອົບຮົມປະຊາຊົນໂດຍສະເພາະແມ່ນຄົນລຸ່ນໜຸ່ມ ຂອງສອງປະເທດ ໃຫ້ຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ສາຍພົວພັນອັນພິເສດທີ່ຫາຍາກໃນການພົວພັນສາກົນ ຂອງ ສອງຊາດລາວ-ຫວຽດນາມ, ໂດຍສະເພາະ ໃຫ້ເຫັນໄດ້ການເສຍສະຫລະອັນໃຫຍ່ຫລວງ ຂອງການນຳລຸ່ນກ່ອນຕໍ່ການເສີມຂະຫຍາຍສາຍພົວພັນແບບພິເສດ, ບໍລິສຸດຜຸດຜ່ອງລະຫວ່າງສອງປະເທດ ເພື່ອໃຫ້ເຂົາເຈົ້າເປັນເຈົ້າການປົກປັກຮັກສາ, ເສີມຂະຫຍາຍ ແລະ ເພີ່ມພູນຄູນສ້າງ ໃຫ້ຂຽວສົດງົດງາມ ແລະ ແຕກດອກອອກຜົນເລື້ອຍໆໄປ; ສ້າງກົນໄປປະສານສົມທົບຢ່າງແໜ້ນແຟ້ນກັບຝ່າຍ ຫວຽດນາມ ເປັນເອກະພາບກັນຕໍ່ບັນຫາເຄັ່ງຮ້ອນຕ່າງໆ ທັງໃນພາກພື້ນ ແລະ ສາກົນ; ເປັນເຈົ້າການປົກປ້ອງ ແລະ ຕອບຕ້ານການໃສ່ຮ້າຍປ້າຍສີ ຂອງພວກອິດທິກໍາລັງປໍລະປັກ ທີ່ຫວັງມ້າງເພສາຍພົວພັນ ລາວ-ຫວຽດນາມ.
ໃນກອງປະຊຸມດັ່ງກ່າວ, ຍັງໄດ້ມີພິທີປະດັບຫຼຽນໄຊມິດຕະ ພາບ ຈາກລັດຖະບານ ແຫ່ງ ສສ ຫວຽດນາມ ໃຫ້ແກ່ບັນດາສະຫາຍໃນຄະນະບໍລິຫານງານສະມາຄົມມິດຕະພາບ ລາວ-ຫວຽດນາມ ຂັ້ນສູນກາງ, ຈໍານວນ 15 ສະຫາຍ.
