ກອງປະຊຸມສຳມະນາການຈັດຕັ້ງປະຕິບັດກົນໄກການປະສານງານລະຫວ່າງກຳມາທິການບັນດາເຜົ່າ ກັບບັນດາກະຊວງ-ອົງການທີ່ກ່ຽວຂ້ອງ ໄດ້ຈັດຂຶ້ນໃນວັນທີ 18-19 ກໍລະກົດ 2024 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ນາງ ທັດສະດາພອນ ຈັນທະມາດ ຮອງປະທານກຳມາທິການບັນ ດາເຜົ່າ (ກບຜ) ເຊິ່ງທ່ານກ່າວວ່າ: ຈຸດປະສົງຂອງກອງປະຊຸມ ກໍເພື່ອທົບທວນຄືນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງກະຊວງ-ອົງການ ຕາມທີ່ກຳນົດໄວ້ໃນກົດໝາຍ, ນິຕິກຳໃຕ້ກົດໝາຍທີ່ກ່ຽວຂ້ອງ ໃນການຕິດຕາມກວດກາ, ການເຄື່ອນໄຫວວຽກງານຂອງກຳມາທິການບັນດາເຜົ່າ ໄລຍະຜ່ານມາ; ເພື່ອຍົກສູງຄຸນນະພາບການຈັດຕັ້ງປະຕິບັດມະຕິຂອງຄະນະປະຈຳສະພາແຫ່ງຊາດ ວ່າດ້ວຍກົນໄກການປະສານງານລະຫວ່າງກໍາມາທິການບັນດາເຜົ່າສະພາແຫ່ງຊາດ ກັບ ບັນດາກະຊວງ-ອົງ ການທີ່ກ່ຽວຂ້ອງ ສະບັບເລກທີ 109/ຄປຈ, ລົງວັນທີ 11/5/2023 ໃນຕໍ່ໜ້າ ທັງເປັນການຍົກສູງຄຸນນະພາບການເຄື່ອນໄຫວວຽກງານ ຕາມ 3 ພາລະບົດບາດຂອງສະພາແຫ່ງຊາດ. ທ່ານໃຫ້ຮູູ້ອີກວ່າ ກອງປະຊຸມຄັ້ງນີ້ ຈະໄດ້ແລກປ່ຽນບົດ ຮຽນກ່ຽວກັບການຈັດຕັ້ງປະຕິບັດມະຕິດັ່ງກ່າວໃນໄລຍະຜ່ານມາ ວ່າມີຂໍ້ສະດວກ, ຂໍ້ຫຍຸ້ງຍາກ ແລະ ຈະມີວິທີການແກ້ໄຂແນວໃດໃນຕໍ່ໜ້າ.
ຜູ້ເຂົ້າຮ່ວມໄດ້ຮັບຟັງການສະເໜີບົດຕີລາຄາການຈັດຕັ້ງປະຕິບັດມະຕິສະບັບເລກທີ 109/ຄປຈ, ລົງວັນທີ 11/5/2023 ໃນໄລຍະຜ່ານມາ ແລະ ການປະກອບຄໍາເຫັນຂອງຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະພາປະຊາຊົນນະຄອນຫຼວງວຽງຈັນ, ບັນດາຜູ້ຕາງໜ້າຈາກສູນກາງແນວລາວສ້າງຊາດ, ກະຊວງພາຍໃນ, ກະຊວງກະສິກຳ ແລະ ປ່າ ໄມ້, ສູນກາງສະຫະພັນແມ່ຍິງລາວ, ສູນກາງສະຫະພັນກຳມະບານລາວ, ສູນກາງຊາວໜຸ່ມປະຊາຊົນປະຕິິວັດລາວ, ກະຊວງການ ຕ່າງປະເທດ, ກະຊວງປ້ອງກັນຄວາມສະຫງົບ, ກະຊວງປ້ອງກັນ ປະເທດ, ກຳມາທິການປ້ອງກັນຊາດ-ປ້ອງກັນຄວາມສະຫງົບ, ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ທະນາ ຄານພັດທະນາຊົນນະບົດ (ທະນາຄານນະໂຍບາຍ).
ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນແຂວງ ຫຼື ສະເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ.
ຂ່າວ: ກົງທະນູຄຳ ພິພັດເສລີ
