ໃນວັນທີ 16 ກໍລະກົດ ນີ້ ທີ່ສະໜາມຫັດແອບວິທະຍາຄານນາຍທະຫານບົກກົມມະດຳ ໄດ້ຈັດຕັ້ງສະແດງຊ້ອມຮົບຍິງລູກປືນແທ້ໃນການຊ້ອມຮົບຮ່ວມລາວ-ຈີນ ໂລ້ກໍາບັງມິດຕະພາບ-2024” ໂດຍການເຂົ້າຮ່ວມສັງເກດການຂອງສະຫາຍພົນໂທ ຄໍາລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ ຫົວໜ້າກົມໃຫຍ່ເສນາທິການກອງທັບປະຊາຊົນລາວ ຫົວໜ້າຊີ້ນໍາລວມການຊ້ອມຮົບຮ່ວມລາວ-ຈີນ ພ້ອມດ້ວຍຄະນະ, ມີສະຫາຍ ພົນຕີ ເຈີ້ງ ກົວເຢ່ ຮອງຜູ້ບັນຊາການ ກອງປະຈໍາຮົງກົງ ເຂດສູ້ຮົບພາກໃຕ້ກອງທັບປົດປ່ອຍປະຊາຊົນຈີນ, ມີບັນດາຄະນະຊີ້ນໍາລວມ, ອະນຸກໍາມະການ ພ້ອມດ້ວຍນາຍ ແລະ ພົນທະຫານສອງກອງທັບລາວ-ຈີນເຂົ້າຮ່ວມ.
![](https://medialaos.net/wp-content/uploads/2024/07/451696897_1029798712166918_7486807873178579427_n.jpg)
ການຈັດຕັ້ງຊ້ອມຮົບຮ່ວມຍິງລູກປືນແທ້ ພາຍໃຕ້ລະຫັດຫົວຂໍ້ ໂລ້ກໍາບັງມິດຕະພາບ-2024 ໃນຄັ້ງນີ້ ແມ່ນເພື່ອເປັນການອົບຮົມ-ຫັດແອບ ລະດັບສູງສຸດໃນກອງທັບ, ການຈັດຕັ້ງສູນຊີ້ນໍາລວມ, ສູນບັນຊາການຮ່ວມ, ກໍາລັງຊ້ອມຮົບຕົວຈິງ, ດ້ວຍການປະຕິບັດຫັດແອບຮູບແຖວ ແລະ ຫັດແອບລວບລວມຊ້ອມຮົບ ຍິງລູກປືນແທ້, ເຮັດໃຫ້ກົມກອງມີຄວາມສຳນຊໍານານ ສາມາດຈັດຕັ້ງບັນຊາ ແລະ ສູ້ຮົບ ປະສານສົມທົບ ຂອງສອງກໍາລັງປະກອບອາວຸດ ເຂົ້າໃນການດັບສູນເປົ້າໝາຍດ້ວຍລູກປືນແທ້, ເປັນການແລກປ່ຽນຄວາມຮູ້ປະສົບການ, ແບບແຜນວິທີເຮັດວຽກຈາກກອງທັບເພື່ອນມິດ, ເພື່ອຖອດຖອນບົດຮຽນ, ຄົ້ນຄວ້າປັບປຸງສາມາດນໍາມາໝູນໃຊ້, ເປັນພື້ນຖານໃນການກໍ່ສ້າງ ແລະ ປັບປຸງກອງທັບເຮົາ, ສ້າງໃຫ້ກອງທັບ ກາຍເປັນກອງທັບປະຕິວັດ ມີແບບແຜນ ແລະ ທັນສະໄໝ.
![](https://medialaos.net/wp-content/uploads/2024/07/451693582_1029798675500255_1921208901889811200_n.jpg)
ໃນນີ້ ເນື້ອໃນການຊ້ອມຮົບຮ່ວມ ລາວ-ຈີນ ໂລ້ກຳບັງມິດຕະພາບ – 2024 ໄດ້ສັງລວມເອົາ 5 ໄລຍະຄື ໄລຍະທີ1 ສືບຂ່າວສະໜາມ ແລະ ຊ່ວຍເຫຼືອຕົວປະກັນ, ໄລຍະທີ2 ການຕໍ່ຕ້ານຍົນບໍ່ມີຄົນຂັບແບບສືບຂ່າວ ແລະ ໂຈມຕີກວດຈັບການເຄື່ອນໄຫວສະກັດໂດຣນສືບຂ່າວຂອງສັດຕູ, ໄລຍະທີ 3 ກວດກູ້ທໍາລາຍລະເບີດໜ້າສະໜາມ, ປະຕິບັດການທາງຈິດຕະສາດ ແລະ ຕີພິເສດປິດລ້ອມດັບສູນ, ໄລຍະທີ 4 ປະຕິບັດດັບສູນສັດຕູດ້ວຍກຳລັງໄຟໜັກ ແລະ ບຸກໂຈມຕີຈາກຫຼາຍທິດທາງ ແລະ ກອບກູ້ຜູ້ຖືກບາດເຈັບ, ໄລຍະທີ 5 ສອງຝ່າຍຮ່ວມກັນດັບສູນ, ສິ້ນສຸດຊ້ອມຮົບ ແລະ ຈັດຕັ້ງຖອນກໍາລັງ. ຈາກນັ້ນຄະນະຊີ້ນຳ, ຄະນະຮັບຜິດຊອບ ກໍໄດ້ພ້ອມກັນປະກອບຄຳຄິດຄຳເຫັນຢ່າງກົງໄປກົງມາ ເພື່ອພ້ອມກັນປັບປຸງໃນບາງຂອດໃຫ້ແທດເໝາະໃຫ້ຈົບງາມ ແລະ ຮັບປະກັນມີຄວາມປອດໄພ 100%.
(ຂ່າວ-ພາບ: ຄຳອ້າຍ ທອງວັນ)