ວັນທີ 15 ກໍລະກົດນີ້, ອົງການກວດກາຄົນເຂົ້າເມືອງແຫ່ງຊາດຈີນ ໄດ້ອອກປະກາດແຈ້ງການວ່າ: ນັບແຕ່ມື້ດັ່ງກ່າວເປັນຕົ້ນໄປ, ເພີ່ມສະໜາມບິນສາກົນຊິ່ນເຈີ້ງນະຄອນເຈີ້ງໂຈ່ວ, ສະໜາມບິນສາກົນຊ່ານຢີ້ນະຄອນລີ້ຈ່ຽງ ແລະ ດ່ານທາງລົດໄຟບໍ່ຫານ ໃຫ້ເປັນດ່ານທີ່ນຳໃຊ້ນະໂຍບາຍຍົກເວັ້ນວິີຊາຜ່ານແດນຈີນບໍ່ກາຍ 144 ຊົ່ວໂມງ. ນັບມາຮອດປັດຈຸບັນ, ອົງການກວດກາຄົນເຂົ້າເມືອງແຫ່ງຊາດຈີນ ໄດ້ປະຕິບັດນະໂຍບາຍຍົກເວັ້ນວີຊາ ແກ່ຜູ້ໂດຍສານຜ່ານແດນຈີນບໍ່ກາຍ 144 ຊົ່ວໂມງ ຢູ່ດ່ານ 37 ແຫ່ງ ທີ່ຢູ່ນະຄອນຫຼວງປັກກິ່ງ, ນະຄອນຊຽງໄຮ້, ນະຄອນຄຸນໝິງ, ນະຄອນລີ້ຈ່ຽງ, ກິ່ງແຂວງສິບສອງພັ່ນນາຂອງແຂວງຢູນນານ ແລະອື່ນໆ. ອີງຕາມນະໂຍບາຍດັ່ງກ່າວ, ພົນລະເມືອງຂອງ 54 ປະເທດ ເຊັ່ນ ອາເມຣິກາ, ການາດາ, ອັງກິດ ເປັນຕົ້ນ ຜ່ານຈາກດ່ານດັ່ງກ່າວໄປປະເທດ ຫຼື ເຂດແຄວ້ນທີສາມ, ສາມາດຄົງຄ້າງຢູ່ໃນເຂດທີ່ກຳນົດໄວ້ບໍ່ກາຍ 144 ຊົ່ວໂມງໂດຍຍົກເວັ້ນວິຊາຜ່ານແດນ, ໃນໄລຍະຄົງຄ້າງສາມາດດຳເນີນການເຄື່ອນໄຫວໄລຍະສັ້ນ ເຊັ່ນ: ການທ່ອງທ່ຽວ, ທຸລະກິດ, ການຢ້ຽມຢາມ, ການຢາມຍາດພີ່ນ້ອງ ແລະອື່ນໆ.
![](https://medialaos.net/wp-content/uploads/2024/07/451382032_1016933947109088_2304603126834184109_n.jpg)
ນັບແຕ່ວັນທີ 1 ທັນວາ ປີ 2023 ເປັນຕົ້ນມາ, ຈີນໄດ້ປະຕິບັດນະໂຍບາຍຍົກເວັ້ນວິຊາແຕ່ຝ່າຍດຽວຕໍ່ພົນລະເມືອງຂອງເຢຍລະມັນ, ຝຮັ່ງ, ອິຕາລີ, ໂຮນລັງ, ແອັດສະປາຍ ແລະ ມາເລເຊຍ. ພົນລະເມືອງທີ່ຖືພາດສະປອດທົ່ວໄປຂອງປະເທດເຫຼົ່ານີ້ ເຂົ້າເມືອງຈີນເພື່ອທຸລະກິດ, ການທ່ອງທ່ຽວ, ຢ້ຽມຢາມຍາດພີ່ນ້ອງ ແລະ ໝູ່ເພື່ອນ ຫຼື ຜ່ານແດນຈີນ ທີ່ບໍ່ກາຍ 15 ວັນ, ສາມາດເຂົ້າເມືອງຈີນໂດຍຍົກເວັ້ນວິຊາ. ຂໍ້ມູນທີ່ກ່ຽວຂ້ອງສະແດງໃຫ້ເຫັນວ່າ: ນະໂຍບາຍຍົກເວັ້ນວີຊາດັ່ງກ່າວໄດ້ເສີມຂະຫຍາຍບົດບາດສົ່ງເສີມຢ່າງຫຼວງຫຼາຍ ໃຫ້ແກ່ຂະແໜງການທ່ອງທ່ຽວຂອງຈີນ, ຈຳນວນຜູ້ເຂົ້າ-ອອກເມືອງຂອງຈີນໃນໄຕມາດທຳອິດປີນີ້ໄດ້ຟື້ນຟູຢ່າງຊັດເຈນ. ໃນລະຫວ່າງເດືອນ ມັງກອນ ຫາເດືອນ ມີນາ ປີ 2024, ມີຄົນສັນຊາດຕ່າງປະເທດເຂົ້າ-ອອກເມືອງຈີນ ເກືອບ 13,1 ລ້ານເທື່ອຄົນ. ຕົວເລກດັ່ງກ່າວໄດ້ເພີ່ມຂຶ້ນຫຼາຍກວ່າ 3 ເທົ່າເມື່ອທຽບກັບໄຕມາດທຳອິດຂອງປີ 2023. ສ່ວນຈຳນວນເທື່ອຄົນເຂົ້າ-ອອກເມືອງ ຂອງຄົນສັນຊາດຕ່າງປະເທດໃນໄຕມາດທຳອິດ ປີນີ້ກໍໄດ້ມີການຟື້ນຟູຢ່າງຊັດເຈນເມື່ອທຽບກັບໄຕມາດທຳອິດ ຂອງປີ 2019 ເຊິ່ງເປັນໄລຍະກ່ອນເກີດການແພ່ລະບາດຂອງພະຍາດໂຄວິດ-19.
![](https://medialaos.net/wp-content/uploads/2024/07/451545701_1016933963775753_9022878616289533793_n.jpg)
ໃນເດືອນມີນາປີນີ້, ຈີນຍັງໄດ້ຈັດໃຫ້ປະເທດສະວິດ ແລະ ອີກ 5 ປະເທດເອີຣົບເຂົ້າໃນຂອບເຂດຍົກເວັ້ນວີຊາ. ໃນເດືອນພຶດສະພາປີນີ້, ຈີນປະກາດວ່າຈະແກ່ຍາວເວລາປະຕິບັດນະໂຍບາຍຍົກເວັ້ນວີຊາຕໍ່ພົນລະເມືອງຂອງ 12 ປະເທດ ເຊັ່ນ ຝຣັ່ງເປັນຕົ້ນທີ່ມາຈີນເປັນໄລຍະສັ້ນນັ້ນ ໃຫ້ເຖິງທ້າຍປີ 2025. ນະໂຍບາຍຍົກເວັ້ນວີຊາດັ່ງກ່າວໄດ້ເສີມຂະຫຍາຍບົດບາດຢ່າງຕັ້ງໜ້າ ຕໍ່ການຟື້ນຟູຂະແໜງການທ່ອງທ່ຽວຂອງຈີນ. ໂຄສົກອົງການກວດກາຄົນເຂົ້າເມືອງແຫ່ງຊາດຈີນ ແຈ້ງໃຫ້ຮູ້ໃນກອງປະຊຸມຖະແຫຼງຂ່າວທີ່ຈັດຂຶ້ນໃນວັນທີ 5 ກໍລະກົດນີ້ວ່າ: ໃນ 6 ເດືອນທຳອິດປີນີ້, ຈຳນວນຊາວຕ່າງປະເທດທີ່ເຂົ້າເມືອງຈີນຜ່ານດ່ານແຫ່ງຕ່າງໆຢູ່ທົ່ວປະເທດຈີນມີເຖິງ 14.635.000 ເທື່ອຄົນ, ເພີ່ມຂຶ້ນ 152,7% ເມື່ອທຽບໃສ່ໄລຍະດຽວກັນຂອງປີກາຍ. ໃນນັ້ນ, ຈຳນວນຄົນເຂົ້າເມືອງໂດຍຍົກເວັ້ນວີຊາມີເຖິງ 8.542.000 ເທື່ອຄົນ, ກວມເອົາ 52%, ເພີ່ມຂຶ້ນ 190,1% ເມື່ອທຽບໃສ່ໄລຍະດຽວກັນຂອງປີກາຍ.
ການເປີດປະຕູສູ່ພາຍນອກຂອງຈີນຈະບໍ່ຢຸດເຊົາ ແລະ ມີແຕ່ຈະເປີດກວ້າງອອກຕື່ມອີກເທົ່ານັ້ນ. ຈີນເປີດກວ້າງນະໂຍບາຍຍົກເວັ້ນວີຊາຕໍ່ຜູ້ໂດຍສານທີ່ຜ່ານແດນບໍ່ກາຍ 144 ຊົ່ວໂມງ ຈະຊຸກຍູ້ການໄປມາຫາສູ່ກັນລະຫວ່າງປະຊາຊົນຈີນ ກັບປະຊາຊົນຕ່າງປະເທດຕື່ມອີກ, ຊ່ວຍຊູຍູ້ໜູນການພັດທະນາດ້ວຍຄຸນນະພາບສູງ ແລະ ການເປີດປະຕູສູຸ່ພາຍນອກໃນລະດັບສູງຂອງຈີນ. ໂລກກຳລັງເຫັນປະເທດຈີນທີ່ເປີດປະຕູສູ່ພາຍນອກ ແລະ ມີຄວາມໝັ້ນໃຈຫຼາຍກວ່າເກົ່າ.