ເມື່ອບໍ່ດົນມານີ້, ໜ່ວຍພັກ ເຕັກນິກ ທີ່ຂຶ້ນກັບຄະນະພັກຮາກຖານ ບໍລິສັດ ລາວໂທລະຄົມມະນາຄົມ ມະຫາຊົນ ຈັດກອງປະຊຸມໃຫຍ່ ສະມາຊິກພັກ ຄັ້ງທີ III ໂດຍການເຂົ້າຮ່ວມ ຂອງ ສະຫາຍ ສຸພົນ ຈັນທະວີໄຊ ຄະນະບໍລິຫານງານພັກກະຊວງ ກະຊວງເຕັກໂນໂລຊີ ແລະ ການສື່ສານ (ຕສ), ເລຂາຄະນະພັກຮາກຖານ ບໍລິສັດ ລາວໂທລະຄົມມະນາຄົມ (ລລທ), ສະຫາຍ ລັດຖະບັນຍາ ຂຽວວົງພະຈັນ ຮອງເລຂາພັກຮາກຖານ ລລທ, ສະຫາຍ ອາລຸນນະເດດ ບານຈິດ ຄະນະປະຈໍາພັກຮາກຖານ ລລທ, ພ້ອມດ້ວຍ ຜູ້ຕາງໜ້າບັນດາໜ່ວຍພັກ, ຕາງໜ້າ 3 ອົງການຈັດຕັ້ງມະຫາຊົນ ແລະ ສະມາຊິກພັກສົມບູນ ຂອງໜ່ວຍພັກເຕັກນິກ ເຂົ້າຮ່ວມ.
ໃນກອງປະຊຸມ, ສະຫາຍ ແສງເດືອນ ສີລາປານີ ຮອງເລຂາໜ່ວຍພັກ ເຕັກນິກ ໄດ້ໃຫ້ຮູ້ວ່າ: ໜ່ວຍພັກ ເຕັກນິກໄດ້ຮັບການຊີ້ນໍາຈາກຄະນະພັກຮາກຖານ ລລທ ເປັນປະຈໍາ ແລະ ສະມາຊິກພັກທຸກສະຫາຍກໍມີຄວາມສາມັກຄີ ໃຫ້ຄວາມຮ່ວມມືໃນທຸກດ້ານ, ໃນຂະະນະທີ່ສະພາບການຂອງໂລກທັງຢູ່ໃນລະດັບພາກພື້ນ ແລະ ສາກົນ ເກີດມີຄວາມທ້າທາຍໃນຫລາຍດ້ານ ເຊັ່ນ: ການລະບາດຂອງພະຍາດ ໂຄວິດ-19 ແລະ ຄວາມຫຍຸ້ງຍາກດ້ານເສດຖະກິດ-ການເງິນ ເຊິ່ງມັນໄດ້ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມຂອງຊາດ ໂດຍສະເພາະ ແມ່ນໄດ້ສົ່ງຜົນກະທົບໂດຍກົງ ຕໍ່ການພັດທະນາວຽກງານ ການດໍາເນີນທຸລະກິດຂອງ ລລທ ກໍຄື ການບໍລິຫານຈັດການວຽກງານ. ເຖິງແນວໃດກໍຕາມ ໂດຍໄດ້ຮັບການນໍາພາ-ຊີ້ນໍາ ໂດຍກົງຈາກ ຄະນະພັກຮາກຖານ ລລທ ເຮັດໃຫ້ຄະນະໜ່ວຍພັກສະມາ ຊິກພັກ-ພະນັກງານ ຂອງໜ່ວຍພັກ ເຕັກນິກ ມີຄວາມສາມັກຄີເປັນປຶກແຜ່ນ, ຕັດສິນໃຈສູງຜ່ານຜ່າອຸປະສັກນາໆປະການ ປະຕິບັດໜ້າທີ່ການເມືອງ ທີ່ໄດ້ກໍານົດໄວ້ໃນມະຕິກອງປະຊຸມ ຄັ້ງທີ V ຂອງຄະ ນະພັກຮາກຖານ ລລທ ໂດຍສະເພາະ ແມ່ນຈັດຕັ້ງປະຕິບັດບັນດາຄາດໝາຍທີ່ກໍານົດໄວ້ ໃນມະຕິກອງປະຊຸມໃຫ່ຍ ຄັ້ງທີ II ຂອງຄະນະໜ່ວຍພັກເຕັກນິກ ໃຫ້ມີຜົນສໍາເລັດເປັນຢ່າງດີ ເປັນການປະກອບ ສ່ວນຢ່າງໜັກແໜ້ນໃຫ້ແກ່ການພັດທະນາ ເສດຖະກິດ-ສັງຄົມແຫ່ງຊາດ.
ພ້ອມກັນນີ້, ບັນດາສະມາຊິກພັກ ໜ່ວຍພັກເຕັກນິກ ໄດ້ພ້ອມກັນນໍາໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍພັກ ເຕັກນິກ ຊຸດໃໝ່ ແລະ ຜູ້ແທນສົມບູນ ແລະ ສຳຮອງ ເຂົ້າຮ່ວມກອງປະຊຸມໃຫຍ່ຜູ້ແທນສະມາຊິກພັກ ຂອງຄະນະພັກຮາກຖານ ລລທ ບົນພື້ນຖານຫລັກ ການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້ ເຊິ່ງມີຜູ້ທີ່ຈະເຂົ້າເປັນຜູ້ແທນສົມບູນ ຈໍານວນ 16 ສະຫາຍ ແລະ ສໍາຮອງ 5 ສະຫາຍ ແລະ ຜູ້ລົງຮັບສະໝັກເລືອກຕັ້ງຄະນະໜ່ວຍພັກ ເຕັກນິກ ຊຸດໃໝ່ ທັງໝົດ 5 ສະຫາຍ, ເລືອກໄດ້ 3 ສະຫາຍ. ກອງປະຊຸມຄັ້ງປະ ຖົມມະລຶກ ໄດ້ຕົກລົງເຫັນດີຮັບຮອງເອົາຄະນະໜ່ວຍພັກ ເຕັກນິກ ຊຸດໃໝ່ 3 ສະຫາຍ ຄື: ເລືອກເອົາ ສະຫາຍ ເເສງເດືອນ ສີລາປານີ ເປັນ ເລຂາໜ່ວຍພັກ ເຕັກນິກ, ສະຫາຍ ບຸນຖອງ ສິດລາກອນ ເປັນ ຮອງ ເລຂາໜ່ວຍພັກ, ທັງເປັນປະທານກວດກາ ແລະ ເລືອກເອົາ ສະຫາຍ ສີງລາ ວີມະນີ ເປັນກໍາມະການໜ່ວຍພັກ.
ໂອກາດນີ້, ສະຫາຍ ສຸພົນ ຈັນທະວີໄຊ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ທີ່ໜ່ວຍ ພັກເຕັກນິກ ຍາດມາໄດ້ໃນໄລຍະຜ່ານມາ. ພ້ອມທັງ ເນັ້ນໃຫ້ຄະນະໜ່ວຍພັກຊຸດໃໝ່ ເອົາໃຈໃສ່ໃນການແບ່ງງານ, ແບ່ງຄວາມຮັບຜິດຊອບໃຫ້ລະອຽດຈະແຈ້ງ ເພື່ອເປັນບ່ອນອີງໃນການເຕົ້າໂຮມຄວາມສາມັກຄີຂອງອ້າຍເອື້ອຍນ້ອງສະມາຊິກພັກ-ພະນັກງານ ໃນຂົງເຂດຄວາມຮັບຜິດຊອບຂອງຕົນ ໃຫ້ມີຜົນສຳເລັດໃນແຕ່ລະໄລຍະ, ເອົາໃຈໃສ່ ຕິດຕາມ, ກວດກາ, ຊຸກຍູ້ການເຄື່ອນໄຫວວຽກງານ, ເນັ້ນໜັກເຖິງ 6 ໜ້າທີ່ຂອງໜ່ວຍພັກ ໂດຍສະເພາະແມ່ນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເຊິ່ງເປັນໜ້າທີ່ກວມລວມ ແລະ ຢັ້ງຢືນເຖິງດ້ານດີ, ດ້ານກ້າວໜ້າ ແລະ ດ້ານອ່ອນ ໃນການເຄື່ອນ ໄຫວນໍາພາຂອງໜ່ວຍພັກຕົນ.
ຂ່າວ-ພາບ: ລາວໂທລະຄົມ
