ເມື່ອບໍ່ດົນມານີ້ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ຮ່ວມກັບ ມູນນິທິເອເຊຍ ຈັດກອງປະຊຸມແລກປ່ຽນຄໍາຄິດຄໍາເຫັນວຽກງານໂຄສະນາ ຕ້ານການຄ້າມະນຸດຂອງຂະແໜງສື່ມວນຊົນ 4 ແຂວງພາກໃຕ້ຄື: ແຂວງຈໍາປາສັກ, ສະຫວັນນະເຂດ, ສາລະວັນ ແລະ ແຂວງເຊກອງ ເຊິ່ງຈັດຂຶ້ນຢູ່ ແຂວງຈຳປາສັກ ແລະ 4 ແຂວງພາກເໜືອຈັດຂຶ້ນຢູ່ແຂວງຫລວງນໍ້າທາ ປະກອບມີ ແຂວງຫລວງພະບາງ, ອຸດົມໄຊ, ບໍ່ແກ້ວ ແລະ ແຂວງຫລວງນໍ້າທາ ໂດຍເປັນປະທານຮ່ວມຂອງ ທ່ານ ບຸນເພັງ ສຸພາບ ຮອງຫົວໜ້າຫ້ອງການ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ທ່ານ ນາງ ສຸລິວອນໄຊ ພຣົມມາລາ ຕາງໜ້າມູນນິທິເອເຊຍ, ມີຜູ້ຕາງໜ້າພະແນກ ຖວທ ແຕ່ລະແຂວງ, ກະຊວງປ້ອງກັນຄວາມສະຫງົບ, ສູນໃຫ້ຄຳປຶກສາ ປົກປ້ອງແມ່ຍີງ ແລະ ເດັກ ນ້ອຍ ສູນກາງສະຫະພັນແມ່ຍິງລາວ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ທ່ານ ບຸນເພັງ ສຸພາບ ໄດ້ໃຫ້ຮູ້ວ່າ: ເພື່ອເປັນການໂຄສະນາເຜີຍແຜ່ ແນວທາງນະໂຍບາຍຂອງພັກ-ລະບຽບກົດໝາຍຂອງລັດ ຕໍ່ກັບການປ້ອງກັນ ແລະ ຕ້ານການຄ້າມະນຸດໃຫ້ສັງຄົມໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງ ເຖິງພິດໄພ ແລະ ຜົນຮ້າຍຂອງການຄ້າມະນຸດ ໂດຍສະເພາະ ສື່ມວນຊົນໃຫ້ຮັບຮູ້ເຂົ້າໃຈຢ່າງເລິກເຊິ່ງ ບົນພື້ນຖານການປະສານສົມທົບແໜ້ນ ແລະ ຮ່ວມມືກັບຫລາຍພາກສ່ວນທັງພາກລັດ, ເອກະຊົນ ແລະ ອົງການຈັດຕັ້ງສາກົນຂັ້ນຕ່າງໆ ເພື່ອນໍາເອົາແນວທາງນະໂຍບາຍຂອງພັກ-ກົດໝາຍຂອງລັດ ຕໍ່ກັບການສະກັດກັ້ນ ແລະ ຕ້ານການຄ້າມະນຸດ ຫັນລົງສູ່ຊຸມຊົນທ້ອງຖິ່ນ ກຸ່ມເປົ້າໝາຍໃຫ້ທົ່ວເຖິງ ເພື່ອເຮັດໃຫ້ປະຊາຊົນລາວບັນດາເຜົ່າ ມີສະຕິລະວັງຕົວຕໍ່ກັບເລ່ຫລ່ຽມ, ກົນອຸ ບາຍຂອງພວກຄົນບໍ່ດີ ເປັນຕັ້ນ ແມ່ນຂະບວນການຄ້າມະນຸດຢູ່ພາຍໃນ ແລະ ຕ່າງປະເທດ.
ທ່ານ ບຸນເພັງ ສຸພາບ ຍັງໃຫ້ຮູ້ອີກວ່າ: ຍາມໃດ ພັກ-ລັດຖະບານ ກໍເອົາໃຈໃສ່ຊີ້ນໍາໃຫ້ເຫັນໄດ້ເຖິງຜົນຮ້າຍຂອງການຄ້າມະນຸດ, ມີຜົນກະທົບຕໍ່ຄວາມບໍ່ເປັນລະບຽບຮຽບຮ້ອຍໃນສັງຄົມ ແລະ ກົດໜ່ວງຖ່ວງດຶງການສ້າງສາພັດທະນາປະເທດຊາດ. ສະນັ້ນ, ພວກເຮົາຈົ່ງຊ່ວຍກັນເປັນຫູເປັນຕາ ເປັນກະບອກສຽງໃນການໂຄສະນາເຜີຍແຜ່ຂໍ້ມູນຂ່າວສານຕ່າງໆ ຜ່ານບັນດາສື່ມວນຊົນເຊັ່ນ: ໂທລະພາບ, ໜັງສືພິມ, ການຈັດລາຍການຂອງໂຄສົກວິທະຍຸ ໃຫ້ມີການສອດແຊກເອົາຂໍ້ມູນຂ່າວສານ ຫລື ບັນດາບົດເພງ, ຂັບ, ລໍາ ອື່ນໆ ທີ່ພົວພັນເຖິງວຽກງານຕ້ານການຄ້າມະນຸດ ເຂົ້ານໍາ ເພື່ອເປັນກະບອກສຽງ, ເປັນສື່ກາງໃຫ້ສັງຄົມ ໄດ້ຮັບຮູ້ເຂົ້າໃຈ ແລະ ມີສະຕິລະວັງຕົວ.
