ໃນລະຫວ່າງວັນທີ 8-12 ກໍລະກົດ ຜ່ານມາ, ຄະນະຜູ້ແທນຂອງອົງການກວດສອບແຫ່ງລັດ ແຫ່ງ ສປປ ລາວ, ນໍາໂດຍ ສະຫາຍ ວຽງທະວີສອນ ເທບພະຈັນ ກຳມະການສຳຮອງສູນກາງພັກ ປະທານອົງການກວດສອບແຫ່ງລັດ ໄດ້ເດີນທາງໄປຢ້ຽມຢາມ ແລະ ເຄື່ອນໄຫວວຽກງານທີ່ ສສ ຫວຽດນາມ ໂດຍໄດ້ເຂົ້າຮ່ວມກອງປະຊຸມສາກົນ ແລກປ່ຽນ ຖອດຖອນ ບົດຮຽນໃນຫົວຂໍ້: ບົດບາດຂອງສະຖາບັນກວດສອບສູງສຸດ (SAIs)ໃນການຕ້ານການສໍ້ລາດບັງຫຼວງ ໃຫ້ມີຄວາມໂປ່ງໃສ, ມີຄວາມຊື່ສັດບໍລິສຸດໃນພາກລັດ ແລະ ການບໍລິຫານລັດທີ່ດີ (International Conference on ‘‘Role of Supreme Audit Institution (SAIs) in Combatting Corruption for the Advancement of Transparency, Public Integrity, and Good Governance) ແລະ ພິທີສະເຫຼີມສະຫຼອງວັນສ້າງຕັ້ງອົງການກວດສອບແຫ່ງລັດ ສສ ຫວຽດນາມ ຄົບຮອບ 30 ປີ ຈັດຂຶ້ນຢູ່ນະຄອນຫຼວງຮ່າໂນ່ຍ ຊຶ່ງມີສະຖາບັນກວດສອບສູງສຸດຂອງ 13 ປະເທດເຂົ້າຮ່ວມ ຄື: ອາຟຣິກາໃຕ້, ບຣາຊິນ, ກໍາປູເຈຍ, ການາດາ, ຝຣັ່ງ, ອິນໂດເນເຊຍ, ສ ເກົາຫຼີ, ສປປ ລາວ, ມາເລເຊຍ, ມົງໂກເລຍ, ຊາອຸດິດ ອາຣັບບີ, ສິງກະໂປ ແລະ ຕາງໜ້າອົງການສະຫະປະຊາຊາດເພື່ອຕ້ານການສໍ້ລາດບັງຫຼວງ.
ກອງປະຊຸມແລກປ່ຽນຖອດຖອນບົດຮຽນ ໄດ້ຍົກໃຫ້ເຫັນບົດບາດ ຄວາມສຳຄັນ ຂອງສະຖາບັນກວດສອບສູງສຸດ (SAIs) ໃນການປະກອບສ່ວນຢ່າງຕັ້ງໜ້າເຂົ້າໃນການຕ້ານສະກັດກັ້ນການສໍ້ລາດບັງຫຼວງ ແລະ ໄດ້ສ້າງເງື່ອນໄຂ, ເອື້ອອຳນວຍ ໃຫ້ອົງການກວດສອບຂອງບັນດາປະເທດ ແລະ ອົງການຈັດຕັ້ງສາກົນ ໄດ້ສ້າງມີການປະຍຸກສ້າງກົນໄກໃໝ່ໃນການຮັບມື ຕໍ່ກັບການຕ້ານສະກັດກັ້ນ, ການສໍ້ລາດບັງຫຼວງ ໃນຍຸກສະໄໝທີ່ເສດຖະກິດໂລກທົດຖອຍທາງດ້ານການເມືອງ, ເສດຖະກິດ, ການເງິນຂອງໂລກ ມີການຫັນປ່ຽນ. ກອງປະຊຸມໄດ້ພ້ອມກັນສຸມໃສ່ການວິເຄາະ, ວິໄຈ, ປຶກສາຫາລື ແນວທາງ ແລະ ວິທີການແກ້ໄຂບັນຫາຢ່າງມີຫົວຄິດປະດິດສ້າງຕໍ່ກັບກົນໄກການສະກັດກັ້ນຕ້ານການສໍ້ລາດບັງຫຼວງ ແລະ ການຄຸ້ມຄອງທາງດ້ານການເງິນ-ງົບປະມານຢ່າງມີປະສິດທິພາບ ແລະ ສ້າງໂອກາດໃຫ້ມີການຮ່ວມມືລະຫວ່າງບັນດາພາກສ່ວນທີ່ກ່ຽວຂ້ອງ, ຍົກສູງບົດບາດຂອງອົງການກວດສອບແຫ່ງລັດໃນການສະກັດກັ້ນ ແລະ ຕ້ານການສໍ້ລາດບັງຫຼວງ, ສົ່ງເສີມຄວາມໂປ່ງໃສ, ຄວາມຮັບຜິດຊອບ ແລະ ຄວາມໝັ້ນຄົງທາງການເງິນຂອງຊາດ.
ພາຍຫຼັງສຳເລັດກອງປະຊຸມສາກົນ, ຕາງໜ້າຄະນະຜູ້ແທນບັນດາອົງການກວດສອບ ໄດ້ເຂົ້າຢ້ຽມຂໍ່ານັບ ສະຫາຍເຈິ່ນແທັງເໝິນ ປະທານສະພາແຫງຊາດ ສສ ຫວຽດນາມ; ໂອກາດດັ່ງກ່າວ, ທ່ານໄດ້ຮຽກຮ້ອງໃຫ້ອົງການກວດສອບແຫ່ງລັດ ສສ ຫວຽດນາມ ສືບຕໍ່ເປັນເຈົ້າການ, ປະຕິບັດໜ້າຕາມພາລະບົດບາດທີ່ສຳຄັນ ປະກອບສ່ວນເຂົ້າໃນການພັດທະນາວຽກງານກວດສອບແຫ່ງລັດໃຫ້ເຂັ້ມແຂງໂດຍການຮ່ວມມືກັບສະຖາບັນກວດສອບສູງສຸດຂອງບັນດາປະເທດ ໃນລະດັບພາກພື້ນ ແລະ ໃນໂລກ. ພ້ອມທັງຮຽກຮ້ອງໃຫ້ບັນດາສະຖາບັນກວດສອບສູງສຸດ ສະໜັບສະໜູນອົງການກວດສອບແຫ່ງລັດ ສສ ຫວຽດນາມ ໃນການປະຕິບັດໜ້າທີ່ການເມືອງຂອງຕົນ ທີ່ພັກ, ລັດ ສສ ຫວຽດນາມ ໄດ້ມອບໝາຍ ແລະ ມີຫົວຄິດປະດິດສ້າງເພື່ອຮັບປະກັນໃຫ້ສະຖາບັນກວດສອບສູງສຸດ, ສາມາດຕອບສະໜອງຄວາມຮຽກຮ້ອງຕ້ອງການໃນໄລຍະໃໝ່ ແລະ ປະກອບສ່ວນເຂົ້າໃນການພັດທະນາປະເທດຊາດຢ່າງຍືນຍົງ.
ຈາກນັ້ນ, ຄະນະຜູ້ແທນໄດ້ເຂົ້າຮ່ວມພິທີສະເຫຼີມສະຫຼອງ ວັນສ້າງຕັ້ງອົງການກວດສອບແຫ່ງລັດ ສສ ຫວຽດນາມ ຄົບຮອບ 30 ປີ (11 ກໍລະກົດ 1994 ຫາ 11 ກໍລະກົດ 2024); ຕະຫຼອດໄລຍະ 30 ປີຜ່ານມາ, ອົງການກວດສອບແຫ່ງລັດ ສສ ຫວຽດນາມ ໄດ້ມີການພັດທະນາຢ່າງຮອບດ້ານ ທັງປະລິມານ ແລະ ຄຸນນະພາບ ຢ່າງຕໍ່ເນື່ອງ. ວຽກງານກວດສອບແຫ່ງລັດໄດ້ຖືກກຳນົດໄວ້ໃນລັດຖະທຳມະນູນແຫ່ງສາທາລະນະລັດສັງຄົມນິຍົມຫວຽດນາມ, ອົງການກວດສອບແຫ່ງລັດໄດ້ຮັບການສ້າງຕັ້ງຂຶ້ນໂດຍສະພາແຫ່ງຊາດ, ດຳເນີນການກວດສອບຢ່າງມີເປັນເອກະລາດ, ປະຕິບັດ ໜ້າທີ່ຕາມກົດໝາຍ ໃນການດຳເນີນການກວດສອບການຄຸ້ມຄອງ, ນຳໃຊ້ງົບປະມານ ແລະ ຊັບສິນຂອງລັດ ແລະ ໄດ້ຮັບຄວາມໄວ້ວາງໃຈຈາກສັງຄົມເປັນຢ່າງດີ.
ໃນໂອກາດທີ່ມີຄວາມໝາຍຄວາມສຳຄັນນີ້, ສະຫາຍ ວຽງທະວີສອນ ເທບພະຈັນ ໄດ້ສະແດງຄວາມຂອບໃຈຢ່າງຈິງໃຈຕໍ່ລັດຖະບານ ສສ ຫວຽດນາມ ເວົ້າລວມ, ເວົ້າສະເພາະ ຂອບໃຈມາຍັງອົງການກວດສອບແຫ່ງລັດ ສສ ຫວຽດນາມ ທີ່ຍາມໃດກໍ່ໄດ້ເອົາໃຈໃສ່ໃຫ້ການສະໜັບສະໜູນແກ່ອົງການກວດສອບແຫ່ງລັດ ສປປ ລາວ ຕະຫຼອດມາ, ເປັນການເສີມຂະຫຍາຍສາຍພົວພັນມິດຕະພາບ, ຮ່ວມມືແບບພິເສດ ແລະ ຮອບດ້ານ ທີ່ເປັນມູນເຊື້ອ ເພື່ອຜົນປະໂຫຍດຂອງປະຊາຊົນ ສອງຊາດ ລາວ-ຫວຽດນາມ ແລະ ອວຍພອນແດ່ວັນສ້າງຕັ້ງອົງການກວດສອບແຫ່ງລັດ ສສ ຫວຽດນາມ ຄົບຮອບ 30 ປີ ໃຫ້ມີຄວາມຈະເລີນກ້າວໜ້າ ແລະ ພັດທະນາຢ່າງບໍ່ຢຸດຢັ່ງ ເຮັດໃຫ້ວຽກງານກວດສອບມີຄວາມເຂັ້ມແຂງຂຶ້ນເລື້ອຍໆ.
(ຂ່າວ-ພາບ: ອົງການກວດສອບແຫ່ງລັດ)
