ເມືອງຊຽງຮ່ອນ ແຂວງໄຊຍະບູລີ ໄດ້ຈັດພິທີປ່ອຍປາ ເພື່ອສະເຫຼີມສະຫຼອງວັນປ່ອຍປາ ແລະ ສັດນໍ້າແຫ່ງຊາດ 13 ກໍລະກົດ ເຊິ່ງພິທີໄດ້ຈັດຂຶ້ນ ເມື່ອວັນທີ 12 ກໍລະກົດຜ່ານມາ ທີ່ ນໍ້າງື່ມ ບ້ານ ປົ່ງຄຳ ເມືອງຊຽງຮ່ອນ ໂດຍການເຂົ້າຮ່ວມຂອງທ່ານ ແສງອາທິດ ລາວເບຼຍຢາທໍ່ ວ່າການເຈົ້າເມືອງໆຊຽງຮ່ອນ, ມີທ່ານ ຄະລາຍຸດ ຊູພູນ ອຳນວຍການໃຫຍ່ ບໍລິສັດໄຟຟ້າຫົງສາ ຈຳກັດ, ມີພາກສ່ວນກ່ຽວຂ້ອງເຂົ້າຮ່ວມ.
ໃນພິທີ ທ່ານ ເບີ້ຍ ເກດສີທອງ ຫົວໜ້າຫ້ອງການກະສິກໍາ ແລະ ປ່າໄມ້ ເມືອງຊຽງຮ່ອນ ໄດ້ກ່າວວ່າ: ເພື່ອເປັນການປະຕິບັດເນື້ອໃນຈິດໃຈຂອງກົດໝາຍວ່າດ້ວຍສັດນໍ້າ ກ່ຽວກັບການເຄື່ອນໄຫວສ້າງຂະບວນການປົກປັກຮັກສາສັດນໍ້າ ເນື່ອງໃນໂອກາດວັນປ່ອຍປາ ແລະ ສັດນ້ຳ ແຫ່ງຊາດ 13 ກໍລະກົດ ເພື່ອປູກຈິດສຳນຶກໃຫ້ພະນັກງານ ແລະ ປະຊາຊົນບັນດາເຜົ່າ ໄດ້ມີການປົກປັກຮັກສາແນວພັນປາ ແລະ ສັດນໍ້າ ແລະ ເປັນການກະຕຸກຊຸກຍູ້ໃຫ້ແກ່ການຜະລິດແນວພັນສັດນໍ້າ ການລ້ຽງສັດນໍ້າ ຂອງຊາວກະສິກອນ ຜູ້ປະກອບການທີ່ກ່ຽວຂ້ອງໃຫ້ບັນລຸຕາມຈຸດປະສົງເປົ້າໝາຍ ໂດຍອີງໃສ່ສະພາບແວດລ້ອມ ທ່າແຮງທີ່ອຸດົມສົມບູນຂອງເມືອງ ເພື່ອແນໃສ່ເຮັດໃຫ້ປະຊາກອນປາ ແລະ ສັດນໍ້າ ແຜ່ພັນເພີ່ມຂຶ້ນ, ມີຄວາມຫຼາກຫຼາຍທາງດ້ານຊີວະນານາພັນ, ເພີ່ມຄວາມອຸດົມສົມບູນແກ່ທຳມະຊາດ ແລະ ຈຳກັດການລ່າສັດແບບດັບສູນ.
ໃນປີ 2024 ນີ້ ວຽກງານປ່ອຍປາ ແລະ ຜະລິດພັນສັດນໍ້າ ຈະສູ້ຊົນປ່ອຍປາໃຫ້ໄດ້ 3 ລ້ານກວ່າໂຕ ໃນນັ້ນປ່ອຍລົງຫ້ວຍຮ່ອງ ຈໍານວນ 30.000 ໂຕ, ປ່ອຍຕາມໜອງຂອງຄອບຄົວ 2.500.000 ໂຕ ແລະ ປ່ອຍລົງອ່າງເກັບນໍ້າຈຳນວນ 15.000 ໂຕ. ມາຮອດປັດຈຸບັນໄດ້ປ່ອຍປາແລ້ວ ຈຳນວນ 2.000.000 ກວ່າໂຕ ແລະ ຍັງຈະໄດ້ສືບຕໍ່ປ່ອຍລົງສູ່ວັງສະຫງວນຂອງແຕ່ລະບ້ານຕື່ມອິກ ເຊິ່ງວັນດັ່ງກ່າວນີ້ ປາທີ່ນຳມາປ່ອຍແມ່ນໄດ້ຮັບການສະໜັບສະໜູນຈາກ ບໍລິສັດ ໄຟຟ້າຫົງສາ ຈຳກັດ ແລະ ການລະດົມຈາກສຳນັກງານ, ຫ້ອງການ, ຜູ້ປະກອບການ ແລະ ອົງການປົກຄອງບ້ານ ເຊີ່ງປະກອບມີ ປານິນ, ປາໄນ, ປາປາກ ແລະ ປາອິນເດຍ ຈຳນວນ 77.800 ໂຕ ທີ່ໄດ້ປ່ອຍຄືນສູ່ແຫຼ່ງນ້ຳທຳມະຊາດ.
ຂ່າວ: ຖວທ ຊຽງຮ່ອນ
