ເນື່ອງໃນໂອກາດ ວັນປ່ອຍປາ ແລະ ສັດນ້ຳ ແຫ່ງຊາດ 13 ກໍລະກົດ, ແຂວງວຽງຈັນໄດ້ຈັດພິທີ ປ່ອຍປາລົງສູ່ອ່າງນ້ຳງື່ມ 1 ຈຳນວນ 1 ແສນກວ່າໂຕ ເຊິ່ງພິທີດັ່ງກ່າວ ໄດ້ຈັດຂຶ້ນໃນວັນທີ 12 ກໍລະກົດນີ້ ທີ່ອ່າງນ້ຳງື່ມ 1 ດມືອງແກ້ວອຸດົມ ແຂວງວຽງຈັນ ໂດຍມີທ່ານ ພູວົງ ບຸນຊູ ຮອງເຈົ້າແຂວງວຽງຈັນ, ມີການນຳພັກ-ລັດ, ຫົວໜ້າພະແນກການ, ອົງການ, ກົມກອງ ຂັ້ນແຂວງ ແລະ ຂັ້ນເມືອງເຂົ້າຮ່ວມ.
ທ່ານ ຄອນສະຫວັນ ສີອັກຄະສອນ ຮອງຫົວໜ້າພະແນກກະສິກຳ ແລະ ປ່າໄມ້ແຂວງວຽງຈັນໄດ້ກ່າວວ່າ: ການຈັດຕັ້ງ ພິທີປ່ອຍປາ ເນື່ອງໃນໂອກາດ ວັນປ່ອຍປາ ແລະ ສັດນ້ຳ ແຫ່ງຊາດ ຢູ່ແຂວງວຽງຈັນ ໄດ້ຈັດຕັ້ງປະຕິບັດທຸກໆປີ ເຊິ່ງແຕ່ລະປີ ໄດ້ປ່ອຍປາ ລົງໃສ່ ແຫຼ່ງນ້ໍາ, ອ່າງເກັບນ້ໍາ ຫ້ວຍຮ່ອງ, ໜອງບຶງທຳມະຊາດ ຢູ່ຂັ້ນແຂວງ ແລະ ເມືອງ ປີລະຫຼາຍກ່ວາ 5.000.000 ໂຕຂຶ້ນໄປ, ພ້ອມກັນນີ້ ກໍຍັງມີຫຼາຍພາກສ່ວນເສດຖະກິດ – ສັງຄົມ ໄດ້ພ້ອມກັນ ລົງທຶນ ໃນການລ້ຽງປາໃສ່ໜອງ, ໃສ່ນາເຂົ້າ, ໃສ່ກະຊັງ ແບບຄອບຄົວ, ແບບເປັນຟາມ ແລະ ຮູບແບບອື່ນໆ ຢ່າງເປັນຂະບວນ ສາມາດຕອບສະໜອງປາລ້ຽງ ໄດ້ຫຼາຍກ່ວາ 10.000 ໂຕນ ຕໍ່ປີ ເຮັດໃຫ້ການລ້ຽງປາເພີ່ມຂຶ້ນ, ສະນັ້ນ, ຈຶ່ງເຮັດໃຫ້ປາ ແລະ ສັດນໍ້າ ໄດ້ເພີ່ມຂຶ້ນ ຢູ່ຕາມແຫຼ່ງນໍ້າທຳມະຊາດ ນັບມື້ນັບຫຼາຍຂຶ້ນ.
ພິທີປ່ອຍປາຄັ້ງນີ້ ແມ່ນໄດ້ປ່ອຍລົງສູ່ອ່າງນ້ຳງື່ມ 1 ຈຳນວນ 100.000 ກ່ວາໂຕ, ປາທີ່ປ່ອຍໃນຄັ້ງນີ້ ມີປານິນ, ປາໄນ, ປາປາກ ເຊິ່ງແມ່ນການຕອບສະໜອງລູກປາ ຈາກສູນຜະລິດແນວພັນປາ ແຂວງວຽງຈັນ. ນອກນີ້ຍັງໄດ້ແນະນຳໃຫ້ ຫ້ອງການກະສິກຳ ແລະ ປ່າໄມ້ເມືອງ ທີ່ມີເງື່ອນໄຂ ສົມທົບກັບອົງການປົກຄອງທ້ອງຖິ່ນ ຈັດຕັ້ງພິທີປ່ອຍປາ ເນື່ອງໃນໂອກາດ ວັນປ່ອຍປາ ແລະ ສັດນ້ຳ ແຫ່ງຊາດ ຢູ່ແຕ່ລະທ້ອງຖິ່ນ ແລະ ປ່ອຍປາ ລົງໃສ່ແຫຼ່ງນໍ້າ, ອ່າງເກັບນ້ຳ, ຫ້ວຍ, ຮ່ອງ, ໜອງ, ບຶງ ແລະ ມີບາງເມືອງ ກໍໄດ້ຈັດພິທີນີ້ຂຶ້ນແລ້ວ ໃນທ້າຍເດືອນ ມິຖຸນາ ຫາ ຕົ້ນເດືອນກໍລະກົດ ແລະ ສືບຕໍ່ ໃນຫຼາຍໆເມືອງຕື່ມອີກ.
ພາບ-ຂ່າວ: ບຸນມາ ແກ້ວບຸດດາ
