ກະຊວງຍຸຕິທຳ ແຫ່ງ ສປປ ລາວ ແລະ ກະຊວງຍຸຕິທຳ ແຫ່ງ ສສ ຫວຽດນາມ ຈະສືບຕໍ່ຮ່ວມມືກັນ 6 ວຽກງານໃນຂົງເຂດກົດໝາຍ ແລະ ຍຸຕິທຳ ເພື່ອເຮັດໃຫ້ວຽກງານດັ່ງກ່າວທັງສອງປະເທດມີປະສິດທິຜົນດີຂຶ້ນກວ່າເກົ່າໃນປີ 2024 ນີ້.
ໃນໂອກາດທີ່ ທ່ານ ຫງວ້ຽນ ແຄັງ ງ໋ອກ ຮອງລັດຖະມົນຕີກະຊວງ ຍຸຕິທຳ ແຫ່ງ ສສ ຫວຽດນາມ ພ້ອມຄະນະ ທີ່ເດີນທາງມາຢ້ຽມຢາມ ແລະ ພົບປະສອງຝ່າຍ ຮ່ວມກັບ ທ່ານ ເກດສະໜາ ພົມມະຈັນ ຮອງລັດຖະມົນຕີ ກະຊວງ ຍຸຕິທຳແຫ່ງ ສປປ ລາວ ໃນວັນທີ 11 ກໍລະກົດ 2024 ຢູ່ທີ່ ນະຄອນຫຼວງວຽງຈັນ; ທັງສອງຝ່າຍ ໄດ້ເຫັນດີເປັນເອກະພາບກັນວ່າ: ໃນປີ 2024 ກະຊວງ ຍຸຕິທໍາ ລາວ-ຫວຽດນາມ ຈະສືບຕໍ່ຮ່ວມມືໃນຂົງເຂດກົດໝາຍ ແລະ ຍຸຕິທຳ 6 ວຽກງານສຳຄັນດັ່ງນີ້:
1. ຄະນະຜູ້ແທນກະຊວງຍຸຕິທໍາ ຫວຽດນາມ ເດີນທາງມາຢ້ຽມຢາມ ແລະ ເຂົ້າຮ່ວມ ກອງປະຊຸມ ວຽກງານຍຸຕິທຳ ເປີດກວ້າງ ຄັ້ງທີ 6 ຂອງບັນດາແຂວງທີ່ມີຊາຍແດນຮ່ວມກັນ;
2. ຈັດຕັ້ງກອງປະຊຸມອອນລາຍ ກ່ຽວກັບ “ການແລກປ່ຽນປະສົບການຕົວຈິງ ຂອງກະຊວງຍຸຕິທໍາ ຫວຽດນາມ ໃນການເຂົ້າຮ່ວມກອງປະຊຸມ ລາຮາຍ ກ່ຽວກັບ ກົດໝາຍສາກົນພາກເອກະ ຊົນ ແລະ ການຈັດຕັ້ງປະຕິບັດບັນດາສົນທິສັນຍາຂອງກົດໝາຍ ຊຶ່ງຫວຽດນາມໄດ້ເປັນມາຄີ ແລະ ກອງປະຊຸມອອນລາຍ ກ່ຽວ ກັບ “ການແລກປ່ຽນປະສົບການ ຂອງກະຊວງຍຸຕິທຳ ຫວຽດນາມ ກ່ຽວກັບ ການນໍາໃຊ້ ເຕັກໂນໂລຊີຂໍ້ມູນຂ່າວສານໃນການປະຕິຮູບລະບຽບການບໍລິຫານ ແລະ ສະໜອງການບໍລິການລັດໃນບັນດາຂົງເຂດການຄຸ້ມ ຄອງລັດ ຂອງກະຊວງຍຸຕິທໍາ”;
3. ຈັດຕັ້ງປະຕິບັດຕາມຂໍ້ຕົກລົງການຮ່ວມມື ຂອງລັດຖະ ບານ ລາວ ແລະ ລັດຖະບານ ຫວຽດນາມ ສອງກະຊວງຍຸຕິທຳ ປະສານສົມທົບກັນຈັດຕັ້ງປະຕິບັດ ຂໍ້ຕົກລົງ ແລະ ແຜນການຮ່ວມມື ປະຈຳປີ 2024 ແລະ ບົດບັນທຶກ ກອງປະຊຸມ ຄັ້ງທີ 46 ຂອງຄະນະກຳມະການຮ່ວມມື ທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ໃນຂົງເຂດກົດໝາຍ ແລະ ຍຸດຕິທຳ ໃຫ້ມີປະສິດທິຜົນ;
4. ຮ່ວມມືໃນວຽກງານການກໍ່ສ້າງ ແລະ ບຳລຸງກົດໝາຍ ມະ ຫາວິທະຍາໄລກົດໝາຍຮ່າໂນ້ຍ ແລະ ສະຖາບັນຍຸຕິທຳ, ກະຊວງຍຸຕິທໍາ ຫວຽດນາມ ສືບຕໍ່ຜັນຂະຫຍາຍຂໍ້ຕົກລົງ ການຮ່ວມມື ທີ່ໄດ້ລົງນາມຮ່ວມກັບ ສະຖາບັນຍຸຕິທຳແຫ່ງຊາດ ຂອງລາວ ໂດຍຜ່ານບັນດາການເຄື່ອນໄຫວ ແລກປ່ຽນຄູອາຈານ ແລະ ນັກ ສຶກສາ; ແບ່ງປັນຂໍ້ມູນຂ່າວສານ ແລະ ເອກະສານ ກ່ຽວກັບ ຫຼັກສູດ ແລະ ວິທີການສິດສອນ; ປະສານສົມທົບກັນຈັດຕັ້ງບັນດາຫຼັກສູດການກໍ່ສ້າງ ແລະ ບຳລຸງ ໃນຂົງເຂດຍຸຕິທຳ ແລະ ກົດໝາຍ, ມະຫາວິທະຍາໄລກົດໝາຍຮ່າໂນ້ຍ ຊ່ວຍເຫຼືອສະຖາບັນຍຸຕິທຳແຫ່ງຊາດລາວ ສ້າງຫຼັກສູດການກໍ່ສ້າງລະບົບປະລິນຍາໂທ (ກົດໝາຍແພ່ງ ແລະ ກົດໝາຍເສດຖະກິດ) ແລະ ສະໜອງທຶນການສຶກສາໃນລະດັບປະລິນຍາໂທ ເພື່ອຍົກສູງຂີດຄວາມສາມາດໃຫ້ແກ່ສະຖາບັນຍຸຕິທຳແຫ່ງຊາດລາວ;
5. ການຮ່ວມມືຍຸຕິທຳຂັ້ນທ້ອງຖິ່ນ ກະຊວງຍຸຕິທໍາ ສອງປະ ເທດ ຊຸກຍູ້ ແລະ ສ້າງເງື່ອນໄຂ ການເພີ່ມທະວີສາຍພົວພັນການ ຮ່ວມມື ລະຫວ່າງ ບັນດາອົງການຍຸຕິທໍາ ແລະ ປະຕິບັດຄຳຕັດ ສິນຂອງສານຂັ້ນທ້ອງຖິ່ນ ຕາມມະຕິກອງປະຊຸມ ວຽກງານຍຸຕິທໍາ ເປັດກວ້າງ ຂອງບັນດາແຂວງທີ່ມີຊາຍແດນຮ່ວມກັນ ແນໃສ່ເພື່ອຍົກສູງປະສິດທິຜົນໃນການຄຸ້ມຄອງລັດ ໃນຂົງເຂດຍຸຕິທຳ ການແກ້ໄຂບັນຫາຂອງປະຊາຊົນ ແລະ ວິສາຫະກິດໃຫ້ດີຂຶ້ນ, ຮັບປະກັນສິດ ແລະ ຜົນປະໂຫຍດອັນຊອບທຳຂອງປະຊາຊົນ ແລະ ວິສາຫະກິດສອງປະເທດ;
6. ການຮ່ວມມືສາກົນຫຼາຍຝ່າຍ, ເຊິ່ງສອງຝ່າຍສືບຕໍ່ຊຸກຍູ້ການຮ່ວມມື, ແລກປ່ຽນປະສົບການໃນການເຂົ້າຮ່ວມ, ປະສານສົມທົບກັນໃນການເຄື່ອນໄຫວ ແລະ ສະໜັບສະໜູນ ເຊິ່ງກັນ ແລະກັນ ໃນເວທິສາກົນ ແລະ ອົງການຈັດຕັ້ງສາກົນຫຼາຍຝ່າຍ ກ່ຽວກັບ ກົດໝາຍ ແລະ ຍຸຕິທໍາ ໂດຍສະເພາະແມ່ນການປະສານສົມທົບກັນຈັດຕັ້ງປະຕິບັດຂໍ້ລິເລີ່ມທີ່ໄດ້ຮັບຮອງໃນບັນດາກອງປະຊຸມລັດຖະມົນຕີຍຸຕິທຳ ອາຊຽນ ແລະ ບັນດາມະຕິ ຂອງກອງປະຊຸມເຈົ້າໜ້າທີ່ ກົດໝາຍອາວຸໂສ ອາຊຽນ.
ໂອກາດດຽວກັນ, ທ່ານ ຫງວ້ຽນ ແຄັງ ງ໋ອກ ກໍໄດ້ເຂົ້າພົບປະ ທ່ານ ໄພວີ ສີບົວລິພາ ກຳມະການສູນກາງພັກ ລັດຖະມົນຕີກະຊວງ ຍຸຕິທໍາ ແຫ່ງ ສປປ ລາວ.
ພາບ-ຂ່າວ: ຈັນສະຫມອນ
