ໃນມື້ທີຫົກຂອງບັ້ນຊ້ອມຮົບຮ່ວມ ລາວ-ຈີນ “ໂລ້ກໍາບັງມິດຕະພາບ-2024 ” ເຫລົ່າຮົບເຕັກນິກກອງທັບ ສືບຕໍ່ເອົາໃຈໃສ່ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ ເຂົ້າໃນການຕອບສະໜອງທາງດ້ານພາຫະນະເຕັກນິກ ຕາມຄວາມຮຽກຮ້ອງຕ້ອງການຂອງໜ້າທີ່ວຽກງານຕົວຈິງໃນທຸກສະພາບການ, ຮັບປະກັນພາຫະນະອາວຸດຍຸດໂທປະກອນເຕັກນິກການຊ້ອມຮົບຄັ້ງນີ້ ໃຫ້ມີຄວາມຮັບປະກັນທາງດ້ານຈໍານວນ, ຊະນິດ, ຄຸນນະພາບຄົບຊຸດ ແລະ ທັນເວລາ.
ໃນໂອກາດນີ້, ສະຫາຍ ພັນເອກ ວິນທອງ ໄຊຍະວົງ ຮອງຫົວໜ້າກົມເສນາເຕັກນິກ ກົມໃຫຍ່ເຕັກນິກກອງທັບ ໄດ້ໃຫ້ສຳພາດໃນມື້ທີຫົກຂອງບັ້ນຊ້ອມຮົບຮ່ວມລາວ-ຈີນ“ໂລ້ກໍາບັງມິດຕະພາບ-2024”ວ່າ:ສຳລັບການເຂົ້າຮ່ວມຊ້ອມຮົບຮ່ວມ ລາວ-ຈີນ “ໂລ້ກຳບັງມິດຕະພາບ 2024” ຄັ້ງນີ້ ພາກສ່ວນຮັບປະກັນເຕັກນິກ ແມ່ນພາກສ່ວນໜຶ່ງທີ່ມີຄວາມສຳຄັນຫລາຍໃນການຊ່ວຍໜູນໃຫ້ແກ່ບັນດາເຫລົ່າຮົບ ຢູ່ໃນພາກສະໜາມ ບໍ່ວ່າຈະຢູ່ໃນສະພາບໃດກໍຕາມ, ພະນັກງານ-ນັກຮົບ ຂອງກົມໃຫຍ່ເຕັກນິກກອງທັບ ກໍໄດ້ເອົາໃຈໃສ່ເຮັດໜ້າທີ່ວຽກງານວິຊາສະເພາະຂອງຕົນ ດ້ວຍຄວາມຮັບຜິດຊອບສູງ ເພື່ອເຮັດສຳເລັດໜ້າທີ່ໃນການກຽມ ພ້ອມສູ້ຮົບ ແລະ ສູ້ຮົບມີໄຊຂອງກອງທັບ.
ສະຫາຍ ພັນເອກ ວິນທອງ ໄຊຍະວົງ ຍັງໃຫ້ຮູ້ຕື່ມອີກວ່າ: ຜ່ານການຮັບປະກັນ ດ້ານພາຫະນະເຕັກນິກໄລຍະຜ່ານມາ ເຫັນໄດ້ວ່າແຕ່ລະສະຫາຍ ໄດ້ເອົາໃຈໃສ່ປະຕິບັດຕາມແຜນການ ແລະ ຮັບປະກັນໄດ້ການປະສານງານ ລະຫວ່າງ ຄະນະຊີ້ນຳຢູ່ພາກສະໜາມ ແລະ ສູນບັນຊາ, ແຕ່ລະພາກສ່ວນແມ່ນເອົາໃຈໃສ່ເຮັດທຸກວິທີທາງ, ສຸມສະຕິປັນຍາເຫື່ອແຮງ ປະກອບສ່ວນເຮັດວຽກງານຮັບປະກັນເຕັກນິກໃຫ້ແກ່ການຊ້ອມຮົບ ລາວ-ຈີນ ໂລ້ກຳບັງ 2024 ຄັ້ງນີ້ ສໍາເລັດຕາມຄາດໝາຍ ແລະ ຮັບປະກັນໄດ້ຄວາມປອດໄພ 100%.
ທີ່ມາ: ຂປລ
