ທ່ານ ບຸນຍະວັດ ນິລະໄຊຍ໌ ຫົວຫນ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ລາຍງານໃນກອງ ປະຊຸມສະໄຫມສາມັນເທື່ອທີ 7 ຂອງສະພາປະຊາຊົນ ຊຸດທີ II, ໃນວັນທີ 9 ກໍລະກົດ 2024 ນີ້ວ່າ: ສາເຫດຂອງການເກີດ ນໍ້າຖ້ວມຂັງ ໃນນະຄອນຫຼວງວຽງຈັນ ແມ່ນມີຫຼາຍສາເຫດ ໂດຍສະເພາະຮ່ອງລະບາຍນ້ໍາ ໃນຕົວເມືອງ ມີດັ່ງນີ້:
1) ພື້ນທີ່ຂອງຕົວເມືອງແມ່ນມີຄວາມຮາບພຽງ ແລະ ມີຄວາມເນີນ ປະມານ 2% ໃນເວລາຝົນຕົກແຮງນໍ້າບໍ່ສາມາດລະບາຍໄດ້ທັນ.
2) ມີການປ່ຽນແປງດິນຟ້າອາກາດເຮັດໃຫ້ປະລິມານນ້ໍາຝົນເພີ່ມຂຶ້ນທຸກໆປີ.
3) ຮ່ອງລະບາຍນ້ໍາທີ່ມີຢູ່ແລ້ວ ຂາດການອານາໄມຢ່າງຕໍ່ເນື່ອງເກີດມີການອຸດຕັນ, ນ້ໍາໄຫຼບໍ່ສະດວກ ແລະ ຕື້ນເຂີນ.
4) ຮ່ອງນ້ໍາທໍາມະຊາດຈໍານວນຫນຶ່ງຍັງບໍ່ໄດ້ຮັບການປັບປຸງ ແລະ ກໍ່ສ້າງເປັນລະບົບ, ມີການບຸກລຸກຂອງປະຊາຊົນກວມເອົາເຂດສະຫງວນຮ່ອງ.
5) ມີການຖົມດິນຊະຊາຍ ຕັນແລວທາງນ້ໍາໄຫຼ ແລະ ມີການຖົມບືງ-ຫນອງ ທີ່ເປັນບ່ອນພັກຢູ່ໃນຕົວເມືອງເປັນຕົ້ນແມ່ນ: ຫນອງຈັນ, ຫນອງບອນ, ຫນອງທາ, ບຶງທາດຫຼວງ ແລະ ມີການຫັນປ່ຽນດິນກະສິກໍາເປັນດິນປຸກສ້າງເພີ່ມຂຶ້ນ.
6) ມີການເທເບຕົງປິດຮ່ອງລະບາຍນໍ້າ ແລະ ວາງທໍ່ນໍ້າ ເພື່ອນໍາໃຊ້ເປັນທີ່ຢູ່ອາໄສ, ບ່ອນຈອດລົດ ບໍ່ສາມາດລົງໄປອະນາໄມໄດ້;
7) ບາງພື້ນທີ່ ທີ່ນໍ້າຖ້ວມຂັງບໍ່ມີຮ່ອງລະບາຍນ້ໍາ ແລະ ບໍ່ເຊື່ອມຈອດກັນ.
ສໍາລັບຮ່ອງລະບາຍນ້ໍາຫນ້າທາງ:
1) ປັດຈຸບັນ ທໍ່ລະບາຍນ້ໍາຂ້າງທາງມີຂະຫນາດຫນ້ອຍບໍ່ສາມາດຮອງຮັບປະລິມານນໍ້າຝົນໃນເວລາຝົນຕົກຫນັກ.
2) ທໍ່ລະບາຍນ້ໍາຂ້າງທາງ ທີ່ມີປັດຈຸບັນນີ້ແມ່ນຮັບທັງນ້ໍາເປື້ອນ ແລະ ນ້ໍາຝົນ.
3) ບາງເສັ້ນທາງ ທໍ່ນ້ໍາບໍ່ເຊື່ອມຈອດກັນ, ມີບ່ອນຕ່ໍາບ່ອນສູງ ແລະ ຂະຫນາດບໍ່ເທົ່າກັນ.
4) ຂາດການອະນາໄມເປັນປະຈໍາເຮັດໃຫ້ເກີດມີການສະສົມຂອງການຕົກຕະກອນ, ມີຂີ້ເຫຍື້ອອຸດຕັນໃນລະບົບຮ່ອງລະບາຍນ້ໍາຂ້າງທາງ.
5) ຂຸມພັກນ້ໍາແມ່ນມີໄລຍະຫ່າງກັນ, ມີບາງຈຸດຖືກທັບຖົມດ້ວຍຕະກອນ ແລະ ສິ່ງເສດເຫຼືອຕ່າງໆ.
