ເອກອັກຄະລັດຖະທູດແຫ່ງ ສປປ ລາວ ຍື່ນສານຕາຕັ້ງຕໍ່ ປະທານາທິບໍດີ ແຫ່ງ ສາທາລະນະລັດ ແຊັກບີ

ໃນຕອນເຊົ້າຂອງວັນທີ 5 ກໍລະກົດ 2024, ທີ່ ສຳນັກງານປະທານາທິບໍດີ ສ. ແຊັກບີ (Palace of Serbia), ນະຄອນ ຫລວງ ເບນກຣາດ (Belgrade), ປະເທດ ສ. ແຊັກບີ, ທ່ານ ຄໍາພອນ ວົງສັນຕິ, ເອກອັກຄະລັດຖະທູດ ແຫ່ງ ສປປ ລາວ ໄດ້ຍື່ນສານຕາຕັ້ງຕໍ່ ພະນະທ່ານ ອາເລັກຊານດາ ວູຊິກ (H.E. Mr. Aleksandar Vučić), ປະທານາທິບໍດີ ແຫ່ງ ສາທາລະນະລັດແຊັກບີ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ສ. ແຊັກບີ, ຊຶ່ງມີສຳນັກງານຕັ້ງຢູ່ ນະຄອນ ຫຼວງ ບູດາແປສ, ປະເທດ ຮົງກາຣີ. ການເຂົ້າຮ່ວມພິທີດັ່ງກ່າວ ປະກອບມີບັນດາທ່ານເອກອັກຄະລັດຖະທູດ ທີ່ ບໍ່ມີສຳນັກງານສະຖານທູດ (Non-Resident Ambassador) ຕັ້ງຢູ່ ສ. ແຊັກບີ ເຂົ້າຮ່ວມທັງໝົດ 14 ປະເທດ ຄື: ສາທາລະນະລັດເຊຍຣາລີໂອນ (Sierra Leone), ໄທ, ນາມີເບຍ, ອາຟຣິກາໃຕ້, ຈໍດານ (Jordan), ບຸຣຸນດີ (Burundi), ແຊັມເບຍ (Zambia), ຄາມາຣູນ (Cameroon), ທານຊາເນຍ (Tanzania), ເປຣູ, ລິດທົວນີ, ກົວເຕມາລາ, ລຸກຊໍາບວກ ແລະ ສປປ ລາວ ໂດຍລາຍລະອຽດຕ່າງໆ ມີດັ່ງນີ້:

ພາຍຫຼັງສຳເລັດພິທີ, ທ່ານ ເອກອັກຄະລັດຖະທູດລາວ ຄົນໃໝ່ ໄດ້ພົບປະໂອ້ລົມ ກັບ ພະນະທ່ານປະທາ ນາທິບໍດີ, ໂດຍໄດ້ຕີລາຄາສູງຕໍ່ການພົວພັນທີ່ດີ ລະຫວ່າງ ສປປ ລາວ ແລະ ສ.ແຊັກບີ ທີ່ມີມາແຕ່ດົນນານນັບຕັ້ງແຕ່ສອງປະເທດ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 25 ກັນຍາ 1962 ເປັນ ຕົ້ນມາ, ຊຶ່ງ ສອງຝ່າຍ ໄດ້ມີຄວາມພະຍາຍາມ ເສີມຂະຫຍາຍສາຍພົວພັນ ແລະ ການຮ່ວມມື ຢູ່ໃນເວທີພາກພື້ນ ແລະ ສາກົນ ລວມທັງການພົວພັນສອງຝ່າຍ ໂດຍສະເພາະວຽກງານການ ສຶກສາ, ການທ່ອງທ່ຽວ ແລະ ເສດຖະກິດໃຫ້ຂະຫຍາຍຕົວເພີ່ມ ຂຶ້ນ.

ພ້ອມດຽວກັນນີ້, ທ່ານ ເອກອັກຄະລັດຖະທູດ ກໍ່ໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນພ້ອມດ້ວຍພອນໄຊອັນປະ ເສີດ ຈາກ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ສົ່ງເຖິງ ພະນະທ່ານ ອາເລັກຊານດາ ວູຊິກ ແລະ ຜ່ານ ພະນະທ່ານໄປຍັງລັດຖະບານ ແລະ ປະຊາຊົນ ແຊັກບີ ທຸກທົ່ວໜ້າ. ນອກຈາກນັ້ນ, ທ່ານ ເອກອັກຄະລັດຖະທູດ ຍັງໄດ້ນໍາເອົາຄໍາເຊື້ອເຊີນຈາກ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ເຖິງ ພະນະທ່ານ ປະທານາທິບໍດີ ສ. ແຊັກບີ ເພື່ອໄປຢ້ຽມຢາມ ສປປ ລາວ ຢ່າງເປັນທາງການໃນໂອ ກາດທີ່ເໝາະສົມ.

ໃນໂອກາດດັ່ງກ່າວ, ພະນະທ່ານ ອາເລັກຊານດາ ວູຊິກ ກໍໄດ້ສະແດງຄວາມຍິນດີ ແລະ ຊົມເຊີຍ ທ່ານ ຄໍາພອນ ວົງສັນຕິ ໃນການດໍາລົງຕໍາແໜ່ງ ເປັນເອກອັກຄະລັດຖະທູດ ສປປ ລາວ ຄົນໃໝ່ ປະຈຳ ສ. ແຊັກບີ ແລະ ໄດ້ສະແດງຄວາມຂອບໃຈຕໍ່ຄໍາ ອວຍພອນ ແລະ ການເຊື້ອເຊີນຈາກ ປະທານປະເທດ ແຫ່ງ ສປປ ລາວ ພ້ອມທັງສົ່ງຄຳຢື້ຢາມຖາມຂ່າວອັນອົບອຸ່ນ ແລະ ອວຍພອນໄຊອັນປະເສີດ ມາຍັງ ພະນະທ່ານ ທອງລຸນ ສີສຸລິດ, ປະທານປະເທດ, ລັດຖະບານ ແລະ ປະຊາຊົນລາວທຸກທົ່ວໜ້າ ແລະ ອວຍພອນໃຫ້ ທ່ານເອກອັກຄະລັດຖະທູດ ແຫ່ງ ສປປ ລາວ ຄົນໃໝ່ ປະຕິບັດໜ້າທີ່ການທູດຂອງຕົນດ້ວຍຜົນສຳເລັດ ໃນການສົ່ງເສີມສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດໃຫ້ຂະຫຍາຍຕົວໃນຕໍ່ໜ້າ.