ການຝຶກອົບຮົມການນຳໃຊ້ລະບົບອະນຸຍາດດຳເນີນທຸລະກິດໃນຂະແໜງທ່ອງທ່ຽວ, ການຄຸ້ມຄອງຕິດຕາມກວດກາ ແລະ ການບໍລິການໃນຮູບແບບເອເລັກໂຕຣນິກທັນສະໄໝ(ແບບອອນລາຍ)ໃຫ້ແກ່ພະນັກງານໃນຂະແໜ່ງການທ່ອງທ່ຽວ 8 ແຂວງພາກເໜືອ ໄດ້ເປີດຂຶ້ນໃນວັນທີ່ 8 ກໍລະກົດ 2024 ນີ້ ທີ່ຫ້ອງປະຊຸມຂອງພະແນກ ຖວທ ແຂວງຊຽງຂວາງ ພາຍໃຕ້ການເປັນປະທານຂອງ ທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ(ຖວທ) ໂດຍມີທ່ານ ວຽງສະຫວັນ ແກ້ວພັກດີ ຮອງຫົວໜ້າພະແນກ ຖວທ ຊຽງຂວາງ ແລະ ທ່ານ ເພັດສະໝອນ ສຸລິຍະແສງ ຮອງຫົວໜ້າພະແນກ ຖວທ ແຂວງຊຽງຂວາງ ມີສຳມະນາກອນຈາກ 8 ແຂວງພາກເໜືອຄື: ແຂວງຜົງສາລີ, ແຂວງບໍແກ້ວ, ອຸດົມໄຊ, ຫຼວງນໍ້າທາ, ຫົວພັນ, ຫຼວງພະບາງ, ໄຊຍະບູລີ ແລະ ແຂວງຊຽງຂວາງເຂົ້າຮ່ວມ.
ການຝຶກອົບຮົມຄັ້ງນີ້ສຳມະນາກອນຈະໄດ້ຮຽນຮູ້ຄູ່ມືການນຳໃຊ້ລະບົບອະນຸຍາດດຳເນີນທຸລະກິດໃນຂະແໜງການທ່ອງທ່ຽວ ໃນຮູບແບບເອເລັກໂຕຣນິກທັນສະໄໝ, ການໃຊ້ເວບໄຊໜ້າບ້ານໂດຍລົງເລິກ: ການສະໝັກບັນຊີ, ວິທີປ້ອນຂໍ້ມູນຂໍໃບອະນຸຍາດດຳເນີນທຸລະກິດ,ວິທີການປ້ອນຂໍ້ມູນອອກບັດນຳທ່ຽວ; ການໃຊ້ເວບໄຊຈັດຂໍ້ມູນຫຼັງບ້ານ ໂດຍລົງເລິກ ການຈັດການໃບອະຍຸຍາດທຸລະກິດ, ການອະນຸມັດໃບອະນຸຍາດ, ການຈັດອັນດັບທຸລະກິດ,ການອັບເດດການສຳລະເງິນ, ການຈັດຝຶກອົບຮົມນຳທ່ຽວ, ການຈັດການບັດນຳທ່ຽວ.ການຈັດການຜູ້ໃຊ້ລະບົບ ແລະ ການຈັດການຕັ້ງຄ່າລະບົບ.
ການຝຶກອົບຮົມຄັ້ງນີ້ກໍ່ເພື່ອເປັນການຍົກສຸງຄວາມຮູ້ຄວາມສາມາດ ແລະ ສ້າງຄວາມເຂົ້າໃຈກ່ຽວກັບຫຼັກການ ແລະ ເຄື່ອງມືທີ່ນໍາໃຊ້ໃນການສ້າງ ແລະ ປັບປຸງວຽກງານການອອກໃບອະນຸຍາດດຳເນີນທຸລະກິດ, ໃນຂະແໜງທ່ອງທ່ຽວ. ການຄຸ້ມຄອງຕິດຕາມກວດກາ ແລະ ການບໍລິການໃນຮູບແບບເອເລັກໂຕຣນິກທັນສະໄໝ (ແບບອອນລາຍ) ເພື່ອສ້າງຄວາມສະດວກ ແລະ ວອງໄວໃຫ້ແກ່ການບໍລິການ ແລະ ການດຳເນີນງານໃນຂອງເຂດ ຖວທ ໂດຍສະເພາະແມ່ນຂົງເຂດການທ່ອງທ່ຽວ.
ໃນກອງປະຊຸມຜູ້ເຂົ້າຮ່ວມກໍ່ໄດ້ມີຄໍາຄິດຄຳເຫັນແລກປ່ຽນບົດຮຽນເຊິງກັນ ແລະ ກັນໃນການບໍລິການການທ່ອງທ່ຽວເພື່ອເຮັດໃຫ້ການເຄື່ອນໄຫວ ແລະຈັດຕັ້ງປະຕິບັດວຽກງງານການທ່ອງທ່ຽວມີຄວາມເປັນເອກະພາບໃນທິດທາງດຽວກັນ ການຝຶກອົບຮົມຈະດຳເນີນເປັນເວລາ 1ວັນເຕັມ.
(ຂ່າວ: ຕຽງບູລົມ)
