ກ່ອນໜ້ານ້ັນພາຍຫລັງປົດປ່ອຍປີ 1975 ນັບໄດ້ 49 ປີ, ຄົນ ສ່ວນໃຫຍ່ຮັບຮູ້ແຂວງຄໍາມ່ວນ ເປັນແຂວງໜຶ່ງຂອງ ສປປ ລາວ ທີ່ເປັນປ້ອມດ່ານໜ້າ ແລະ ມີຊາຍແດນເຊື່ອມໂຍງເຊື່ອມຈອດກັບໄທ, ຫວຽດນາມ ແລະ ເປັນຈຸດໃຈກາງທາງຜ່ານເຂົ້າລະຫວ່າງພາກເໜືອ, ພາກກາງ ແລະ ພາກໃຕ້ ເຊິ່ງແຂວງດັ່ງກ່າວໄດ້ຮັບການບັນທຶກໄວ້ໃນບົດລາຍງານຂອງອົງການເກັບກູ້ລະເບີດສາກົນວ່າເປັນໜຶ່ງໃນຈໍານວນ 3 ແຂວງຂອງລາວ (ຊຽງຂວາງ, ສະຫວັນນະເຂດ ແລະ ຄໍາມ່ວນ) ທີ່ມີການຖິ້ມລະເບີດ ແລະ ມີລະເບີດຕົກຄ້າງຫລາຍທີ່ສຸດ.ແຕ່ທ່ານຮູ້ ຫລື ບໍ່ວ່າແຂວງຄໍາ ມ່ວນ ນັ້ນບໍ່ໄດ້ມີຊື່ສຽງເລື່ອງປະຫວັດສາດນອງເລືອດ ໃນຍຸກສະໄໝຕໍ່ສູ້ກູ້ຊາດກັບພວກຈັກກະພັດລ່າເມືອງຂຶ້ນເທົ່ານັ້ນ ຫາກຍັງມີຕໍານານເລົ່າຂານເລືີອງເທບນິຍາຍອັນລືຊື່ (ທ້າວ ສີໂຄດຕະບອງ) ແລະ ມີສະຖານທີ່ທ່ອງທ່ຽວມີຊື່ສຽງໂດ່ງດັງໄປໄກຮອດອາຊຽນອີກດ້ວຍ ໂດຍສະເພາະຖໍ້າກອງລໍ, ຖໍ້າຊ້າງລອດ, ບ້ານຄົນບັງບົດ ແລະ ອື່ນໆ ແນວໃດກໍດີ ມື້ນີ້ຜູ້ຂຽນຈະນໍາເອົາເລື່ອງລາວໃໝ່ທີ່ໜ້າຕື່ນເຕັ້ນມາເລົ່າສູ່ທ່ານຜູ້ອ່ານຟັງອີກຄື: ແຫລ່ງທ່ອງທ່ຽວທຳມະຊາດນໍ້າຕົກຕາດສຽງລືຫາກໍຄ້ົນພົບໃນປ່າສະຫງວນ, ມີຄວາມສູງຊັນ ແລະ ເປັນຮູບຂັ້ນໄດ 20 ກວ່າຊັ້ນໄຫລ່ມາຈາກຈອມພູ ຜ່ານປ່າດົງຕືບໜາ ແລະ ລົງສູ່ແມ່ນໍ້າຫ້ວຍນ້ອຍ-ໃຫຍ່ປ່ອງໃສ່ນໍ້າຂອງ.ຫລາຍຄົນໄປເຫັນມາແລ້ວຈົນບໍ່ຢາກເຊື່ອສາຍຕາເພາະຄ້າຍໆຄື ເທວະດາໃນເທບນິຍາຍປ້ັນແຕ່ງ ແລະ ເນລະມິດໃຫ້ເກີດເປັນນໍ້າຕົກ ທີ່ສວຍງາມທີ່ສຸດບໍ່ຕ່າງຫຍັງຂັ້ນໄດສະຫວັນ ແລະ ແດນເນລະມິດ ໃນຮູບເງົາຮາລີວູດ “ອາວາຕານ” ເຊິ່ງມັນເກີດຈາກທໍາມະຊາດປັ້ນແຕ່ງຂຶ້ນເອງ.
ປັດຈຸບັນນີ້ແຫລ່ງທ່ອງທ່ຽວທຳມະຊາດນໍ້າຕົກຕາດສຽງລື ເມືອງບົວລະພາ ແຂວງຄຳມ່ວນ ພວມຈະກາຍເປັນຂຸມຊັບໃໝ່ຂອງແຂວງ ຄໍາມ່ວນ ເມື່ອມີນັກທຸລະກິດຫົວໃສ, ຊາວລາວເຮົາເອງໄດ້ຮັບການສຳປະທານ ແລະ ພັດທະນາໂດຍກຸ່ມບໍລິສັດ ສາຍພູຫລວງ ໃນເນື້ອທີ່ 33 ເຮັກຕາ, ໃນມູນຄ່າການລົງທຶນທັງໝົດ 12 ລ້ານກວ່າໂດລາ ແລະ ມີໄລຍະການສຳປະທານ 40 ປີ ເຊິ່ງເປັນ ຮູບແບບການລົງທຶນພາຍໃນ 100%. ການພັດທະນາໃນພາບລວມນັ້ນກໍາລັງຂຸ້ນຂ່ຽວດໍາເນີນການປັບປຸງກໍ່ສ້າງພື້ນຖານໂຄງລ່າງ ເພື່ອຮອງຮັບໃຫ້ແກ່ການທ່ອງທ່ຽວ ໂດຍສະເພາະແມ່ນການກໍ່ສ້າງເສັ້ນທາງເຂົ້າສູ່ແຫລ່ງທ່ອງທ່ຽວຕາດສຽງລື, ການຈັດສັນພື້ນທີ່ເພື່ອສ້າງຈຸດບໍລິການ ແລະ ພື້ນຖານໂຄງລ່າງດ້ານກິດຈະກໍາອື່ນໆ ທີ່ຕິດພັນກັບການບໍລິການ-ການທ່ອງທ່ຽວ.
ານ ອຳພອນ ບຸນຍາລາດ ປະທານກຸ່ມບໍລິສັດ ສາຍພູຫລວງ ໄດ້ລາຍງານຄວາມຄືບໜ້າໃນການພັດທະນາແຫລ່ງທ່ອງທ່ຽວດັ່ງກ່າວວ່າ: ປັດຈຸບັນແມ່ນກຳລັງກໍ່ສ້າງພື້ນຖານໂຄງລ່າງທີ່ມີຄວາມຈຳເປັນເພື່ອຕອບສະໜອງກັບເປົ້າໝາຍ ທີ່ການນໍາຂັ້ນແຂວງໄດ້ກຳນົດໃຫ້ມີການເປີດແຫລ່ງທ່ອງທ່ຽວໃໝ່ ຈຳນວນ 2 ແຫລ່ງ ເພື່ອຕ້ອນຮັບປີທ່ອງທ່ຽວລາວ 2024 ປະກອບມີ: ຂຸນກອງແລງ ເມືອງຫີນບູນ ແລະ ຕາດສຽງລື ເມືອງບົວລະພາ. ນນ້ີແມ່ນເລ່ັງໃສ່ປັບປຸງເສ້ັນທາງເຂົ້າຫາຈຸດບໍລິການ ໃຫ້ຄວາມສະດວກ ແລະ ກໍ່ສ້າງເສັ້ນທາງຍ່າງເຂົ້າຫາຕາດ, ການກໍ່ສ້າງຮ້ານອາ ຫານ, ຫ້ອງນໍ້າສະອາດ, ກໍ່ສ້າງຂົວອູ່ ແລະ ສິ່ງອຳນວຍຄວາມສະດວກອື່ນໆ ຊຶ່ງຄາດວ່າຈະໃຫ້ສຳເລັດ ພ້ອມທັງເປີດໃຫ້ບໍລິການແກ່ນັກທ່ອງທ່ຽວ ໃນລະຫວ່າງເດືອນພຶດສະພາ ຫາ ເດືອນມິຖຸນາ 2024 ເພາະເປັນໄລຍະທີ່ມີນໍ້າຫລາຍ ເຮັດໃຫ້ນໍ້າຕົກຕາດມີຄວາມສວຍງາມທີ່ສຸດ.
ໂດຍ: ເກີດຂວັນໃຈ ມາລີຈັນສີ
