ເນື່ອງໃນໂອກາດວັນລັດຖະສະພາໂລກ ກໍຄື ວັນສ້າງຕັ້ງ ສະຫະພັນລັດຖະສະພາສາກົນ (IPU) ຄົບຮອບ 135 ປີ (30/6/1889-30/6/2024), ທ່ານ ໄຊສົມພອນ ພົມວິຫານ ປະທານສະ ພາແຫ່ງຊາດ, ປະທານຄະນະສະຫະພັນລັດຖະສະພາສາກົນ ຂອງສະພາແຫ່ງຊາດລາວ ໄດ້ສະແດງຄວາມຊົມເຊີຍ ແລະ ອວຍພອນໄຊອັນປະເສີດ ໄປຍັງບັນດາການນໍາ, ສະມາ ຊິກລັດຖະສະພາ ທີ່ເປັນສະມາຊິກຂອງ IPU ທຸກທົ່ວໜ້າ ແລະ ບັນດາທ່ານສະມາຊິກສະພາແຫ່ງຊາດ ຊຸດທີ IX ຂອງ ສປປ ລາວ ຢ່າງສຸດອົກສຸດໃຈ.
ທ່ານ ໄຊສົມພອນ ພົມວິຫານ ກ່າວວ່າ: ວັນທີ 30 ມິຖຸນາ 2024 ສະຫະພັນລັດຖະສະພາສາກົນ ແມ່ນອົງການລັດຖະສະພາລະດັບໂລກ ທີ່ມີສະມາຊິກທັງໝົດ 180 ປະເທດ ແລະ ມີອົງການ ຈັດຕັ້ງສາກົນ ຫລາຍກວ່າ 15 ອົງການເປັນພາຄີ. ສະຫະພັນລັດ ຖະສະພາສາກົນ ມີຈຸດປະສົງເພື່ອເປັນເວທີສົ່ງເສີມການຕິດຕໍ່ພົວພັນ, ການປະສານງານ ແລະ ການແລກປ່ຽນປະສົບການລະຫວ່າງລັດຖະສະພາ ແລະ ສະມາຊິກລັດຖະສະພາສາບັນດາປະເທດໃນໂລກ; ພິຈາລະນາບັນຫາສຳຄັນຂອງໂລກ, ສົ່ງເສີມການປົກຄອງດ້ວຍລະບຽບກົດໝາຍ, ສົ່ງເສີມບົດບາດ ຍິງ-ຊາຍ ແລະ ຊາວໜຸ່ມ, ສົ່ງເສີມສັນ ຕິພາບ, ປະຊາທິປະໄຕ ແລະ ການພັດທະນາແບບຍືນຍົງ.
ນັບແຕ່ໄດ້ເຂົ້າເປັນສະມາຊິກ ສະຫະພັນລັດຖະສະພາສາກົນ ໃນວັນທີ 4 ເມສາ 1990 ເປັນເວລາ 34 ປີ, ສະພາແຫ່ງຊາດລາວ ໄດ້ຕັ້ງໜ້າເຂົ້າຮ່ວມການເຄື່ອນໄຫວຢ່າງຫ້າວຫັນ ໃນກອງປະຊຸມໃຫຍ່ ແລະ ກອງປະຊຸມລະດັບຕ່າງໆຂອງສະຫະພັນລັດຖະສະພາສາກົນ ເຊິ່ງເປັນການເຜີຍແຜ່ນະໂຍ ບາຍ ແລະ ການພັດທະນາເສດຖະກິດ-ສັງຄົມ ຂອງ ສປປ ລາວ ຕໍ່ເວທີລັດຖະສະພາລະດັບໂລກ, ເຂົ້າຮ່ວມຄົ້ນຄວ້າ, ປຶກສາຫາລື ແລະ ສະແດງທັດສະນະທີ່ສ້າງສັນ ຕໍ່ການປົກປັກຮັກສາສັນຕິພາບ, ສະ ຖຽນລະພາບ ກໍຄື ຄວາມໝັ້ນຄົງໃນພາກພື້ນ ແລະ ໃນໂລກ ຢ່າງເປັນເຈົ້າການ.
ໃນກອງປະຊຸມ ສະຫະພັນລັດຖະສະພາສາກົນ ຄັ້ງທີ 129 ແລະ ກອງປະຊຸມສະມັດຊາໃຫຍ່ສະຫະປະຊາຊາດ ໃນປີ 2018 ໄດ້ມີການຮັບຮອງເອົາມະຕິ ໂດຍໄດ້ກໍານົດເອົາວັນທີ 30 ມິຖຸນາ ຂອງທຸກປີ ເປັນວັນລັດຖະສະພາໂລກ ຂອງທຸກປະເທດສະມາຊິກ IPU ເພື່ອເປັນການປະຕິບັດໜ້າທີ່ ໃນຖານະເປັນອົງການນິຕິບັນຍັດ, ອົງການຕົວແທນແຫ່ງສິດ-ຜົນປະໂຫຍດ ແລະ ຄວາມ, ມຸ່ງມາດປາຖະໜາຂອງປະຊາຊົນ ທີ່ມີຄວາມຕ້ອງການຢາກຢູ່ດີກິນດີ ແລະ ປະກອບສ່ວນເຂົ້າໃນການສົ່ງເສີມສັນຕິ ພາບ, ສະຖຽນລະພາບ, ຄວາມໝັ້ນຄົງ ແລະ ການຮ່ວມມື ເພື່ອການພັດທະນາແບບຍືນຍົງ ໃນທົ່ວໂລກ.
ທ່ານ ໄຊສົມພອນ ພົມວິຫານ ຍັງໄດ້ຢ້ຳຄືນ ຖະແຫລງການເຈນີວາ ວ່າດ້ວຍ ການທູດລັດຖະສະພາ: ສ້າງຂົວເຊື່ອມຕໍ່ ສູ່ສັນຕິພາບ ແລະ ຄວາມເຂົ້າອົກເຂົ້າໃຈ, ທີ່ໄດ້ຮັບຮອງໃນກອງປະຊຸມໃຫຍ່ IPU ຄັ້ງທີ 148 ໃນເດືອນມີນາ 2024 ທີ່ຜ່ານມາ ເພື່ອເນັ້ນເຖິງບົດບາດສຳຄັນຂອງລັດຖະສະພາ ໃນການຈັດຕັ້ງປະຕິບັດວຽກງານການທູດ ໂດຍການເພີ່ມທະວີການພົວພັນ ແລະ ການຮ່ວມມືກັນ ເພື່ອຊຸກຍູ້ການປຶກສາຫາລື ກ່ຽວກັບຂະບວນສັນຕິພາບ, ສົ່ງເສີມການແກ້ໄຂບັນຫາຂໍ້ຂັດແຍ່ງ ຜ່ານການພົບປະເຈລະຈາ ໂດຍສັນຕິວິທີ, ປະຕິບັດຕາມສົນທິສັນຍາ ແລະ ສັນຍາສາກົນ ຕາມຄວາມຮຽກຮ້ອງຂອງປະຊາຊົນ ທີ່ຮັກຫອມສັນຕິພາບ.
ທີ່ສຳຄັນ, ໃນປີນີ້ ໃນຖານະທີ່ສະພາແຫ່ງຊາດລາວ ເປັນປະທານສະມັດຊາລັດຖະສະພາ ລະ ຫວ່າງຊາດອາຊຽນ ຄັ້ງທີ 45, ພວກເຮົາຈະຕ້ອງໄດ້ເອົາໃຈໃສ່ເປັນເຈົ້າການ ປະສານສົມທົບກັບລັດ ຖະສະພາສະມາຊິກໄອປາອື່ນໆ, ລວມເຖິງລັດຖະສະພາປະເທດສັງເກດການ ແລະ ຄູ່ຮ່ວມພັດທະນາ ຂອງໄອປາ ເພື່ອປຶກສາຫາລືກັນຢ່າງໃກ້ຊິດ ກ່ຽວກັບສິ່ງທ້າທາຍຕ່າງໆທີ່ພວມປະເຊີນໃນປັດຈຸບັນ ແລະ ພ້ອມກັນຊຸກຍູ້ສົ່ງເສີມການເຊື່ອມໂຍງ-ເຊື່ອມຈອດ ແລະ ການເຕີບໂຕແບບກວມລວມ, ຊຸກຍູ້ໃຫ້ລັດ ຖະບານຂອງປະເທດຕົນ ຈັດຕັ້ງປະຕິບັດບັນດາໂຄງການຮ່ວມມື ແລະ ແຜນດຳເນີນງານຕ່າງໆ ໃຫ້ບັນ ລຸເປົ້າໝາຍການສ້າງປະຊາຄົມອາຊຽນ ໃນປີ 2025 ເພື່ອນຳເອົາຜົນປະໂຫຍດ, ຄວາມສະຫງົບສຸກ, ການຢູ່ດີກິນດີ ແລະ ຄວາມຈະເລີນຮຸ່ງເຮືອງ ມາສູ່ປະຊາຊົນຂອງພວກເຮົາ.
ຂ່າວ: ທະນູທອງ
ພາບ: ຂັນໄຊ
