ໃນວັນທີ 27 ມີຖຸນາ 2024 ຂອງການດຳເນີນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ໂດຍການເປັນປະທານ ຂອງທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ. ທ່ານ ນາງ ສວນສະຫວັນ ວິຍະເກດ ລັດຖະມົນຕີ (ລມຕ) ກະຊວງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ສະເໜີຮ່າງກົດໝາຍວ່າດ້ວຍ ການທ່ອງທ່ຽວ (ສະບັບປັບປຸງ), ເຊີ່ງທ່ານກ່າວວ່າ: ກົດໝາຍວ່າດ້ວຍ ການທ່ອງທ່ຽວ ສະບັບທຳອິດໄດ້ປະກາດນໍາໃຊ້ ປີ 2005 ແລະ ໄດ້ມີການປັບປຸງມາແລ້ວ 1 ຄັ້ງ ໃນປີ 2013 ເຊີ່ງກົດສະບັບປີ 2013 ໄດ້ປະມີ 12 ພາກ, 20 ໝວດ, 103 ມາດຕາ ແລະ ສຳລັບການປັບປຸງຮ່າງກົດໝາຍວ່າດ້ວຍ ການທ່ອງທ່ຽວ ໃນຄັ້ງນີ້, ແມ່ນໄດ້ເພີ່ມໃໝ່ 2 ໝວດ, ເພີ່ມໃໝ່ 27 ມາດຕາ, ປັບປັບປຸງເນື້ອໃນຄືນໃໝ່ 66 ມາດຕາ, ຮັກສາເນື້ອໃນເກົ່າໄວ້ 37 ມາດຕາ, ສະນັ້ນຮ່າງກົດໝາຍວ່າດ້ວຍ ການທ່ອງທ່ຽວ ສະບັບປັບປຸງໃໝ່ນີ້, ຈຶ່ງປະກອບມີ 12 ພາກ, 22 ໝວດ ແລະ 130 ມາດຕາ.
ເຫດຜົນ ແລະ ຄວາມຈຳເປັນ ໃນການປັບປຸງຮ່າງກົດໝາຍວ່າດ້ວຍ ການທ່ອງທ່ຽວ ໃນຄັ້ງນີ້, ຍ້ອນເຫັນວ່າໃນສະພາບຕົວຈິງປັດຈຸບັນ ການເຄື່ອນໄຫວວຽກງານທ່ອງທ່ຽວ ຍັງມີຂອດອຸດຕັນຫຼາຍດ້ານ ທີ່ຮຽກຮ້ອງໃຫ້ມີການປັບປຸງແກ້ໄຂຮ່ວມກັບຂະແໜງການກ່ຽວຂ້ອງເປັນຕົ້ນ ການຄົມມະນາຄົມ, ການຂົນສົ່ງ, ເຕັກໂນໂລຊີການສື່ສານ, ສິ່ງແວດລ້ອມ, ປ້ອງກັນຄວາມສະຫງົບ, ອຸດສາຫະກຳ, ການຄ້າ ແລະ ຂະແໜງການອື່ນໆ. ຈື່ງໄດ້ແກ້ໄຂທາງດ້ານນິຕິກຳ ໂດຍສະເພາະກົດໝາຍວ່າດ້ວຍການທ່ອງທ່ຽວ ທີ່ເປັນເຄື່ອງມືໃນການປົກປ້ອງສິດ, ຜົນປະໂຫຍດຂອງທຸກພາກສ່ວນຈື່ງໄດ້ມີການປັບປຸງ.
ທ່ານ ນາງ ສວນສະຫວັນ ວິຍະເກດ ລັດຖະມົນຕີ (ລມຕ) ກະຊວງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ກ່າວອີກວ່າ: ຄາດຄະເນຜົນໄດ້ຮັບຈາກການປັບປຸງກົດໝາຍວ່າດ້ວຍ ການທ່ອງທ່ຽວ ໃນຄັ້ງນີ້: ແມ່ນຈະເປັນເຄື່ອງມື ແລະ ບ່ອນອີງ ໃຫ້ແກ່ການຈັດຕັ້ງການເຄື່ອນໄຫວ ຂອງວຽກງານການທ່ອງທ່ຽວ ໃຫ້ມີຄວາມທັນສະໄໝ, ການຄຸ້ມຄອງລັດ-ຄຸ້ມຄອງສັງຄົມມີຄວາມຄ່ອງຕົວ, ແທດເໝາະ ແລະ ສອດຄ່ອງກັບການຂະຫຍາຍຕົວຂອງເສດຖະກິດໃນປັດຈຸບັນ; ທັງເປັນການອໍານວຍຄວາມສະດວກໃຫ້ແກ່ການລົງທຶນ, ການພັດທະນາ, ການຄຸ້ມຄອງ, ການຊຸກຍູ້ສົ່ງເສີມກິດຈະການການທ່ອງທ່ຽວ ລວມທັງການແກ້ໄຂບັນຫາຕ່າງໆ ໃຫ້ມີຄວາມສະດວກວ່ອງໄວ ແລະ ໂປ່ງໃສ່ຍິ່ງຂຶ້ນ; ພາກລັດ ແລະ ພາກທຸລະກິດ ມີໂອກາດໃນການເຂົ້າຮ່ວມແຂ່ງຂັນດ້ານການທ່ອງທ່ຽວ, ການຄ້າ, ການລົງທຶນ, ສ້າງ ຄວາມເຊື່ອໝັ້ນ, ດຶງດູດເອົານັກນັກລົງທຶນ ແລະ ນັກທ່ອງທ່ຽວ ທັງພາຍໃນ ແລະ ຕ່າງປະເທດ ຫຼາຍຂຶ້ນ;ຈະເຮັດໃຫ້ການເຄື່ອນໄຫວວຽກງານທ່ອງທ່ຽວຢູ່ຂັ້ນສູນກາງ ແລະ ທ້ອງຖິ່ນ, ລະຫວ່າງພາກລັດ ແລະ ພາກທຸລະກິດ ມີຄວາມເປັນເອກະພາບໃນທາງປະຕິບັດ.
