ວັນທີ 25 ມິຖຸນາ 2024ທ່ານ ປອ. ເພຍ ເຣເບນໂລ ບຣິດໂຕ, ຜູ້ຕາງໜ້າຫ້ອງການອົງການອຸຍນິເຊັບປະຈຳ ສປປ ລາວ ໄດ້ເຂົ້າຢ້ຽມອໍາລາ ທ່ານ ນາງ ສວນສະຫວັນ ວິຍະເກດ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ). ການຢ້ຽມຢາມຄັ້ງນີ້ ເປັນການສະເຫຼີມສະຫຼອງສາຍພົວພັນການຮ່ວມມື ລະຫວ່າງ ອົງການອຸຍນິເຊັບແລະ ກະຊວງ ຖວທ ໃນການສົ່ງເສີມສິດທິເດັກຜ່ານສື່ມວນຊົນ.
ທ່ານ ປອ. ເພຍ ເຣເບນໂລ ບຣິດໂຕ ໄດ້ສະແດງຄວາມຂອບໃຈ ຕໍ່ ທ່ານ ລັດຖະມົນຕີ ທີ່ ກະຊວງ ຖວທ ໄດ້ໃຫ້ການສະໜັບສະໜູນການເຄືີ່ອນໄຫວວຽກງານຂອງອົງການອຸຍນິເຊັບຢ່າງຕໍ່ເນື່ອງໃນຕະຫຼອດໄລຍະຫຼາຍປີທີ່ຜ່ານມາ, ຊຶ່ງລວມມີການສົ່ງເສີມການເປັນຢູ່ທີ່ດີຂອງແມ່ ແລະ ເດັກນ້ອຍ, ວຽກງານສື່ມວນຊົນ ແລະ ການມີສ່ວນຮ່ວມຂອງໄວໜຸ່ມ, ການເຜີຍແຜ່ຂໍ້ມູນຂ່າວສ່ານດ້ານສາທາລະນະສຸກ ແລະ ຂໍ້ມູນອື່ນໆ ໂດຍຜ່ານການໂຄສະນາ ແລະ ກະຈາຍຂໍ້ມູນ-ຂ່າວສານ ໃຫ້ຊຸມຊົນຜ່ານຊ່ອງທາງສື່ຫຼັກຄື: ວິທະຍຸ, ໂທລະພາບ ແລະ ໂທລະໂຄ່ງຊຸມຊົນ ທັງໃນລະດັບສູນກາງ ແລະ ທ້ອງຖິ່ນ. ນອກຈາກນີ້ໂຄງການ “ສື່ໄວໜຸ່ມ” ຂອງວິທະຍຸກະຈາຍສຽງແຫ່ງຊາດລາວ ກໍໄດ້ມີການສະເຫຼີມສະຫຼອງການຈັດຕັ້ງປະຕິບັດ ຄົບຮອບ 20 ປີ ໃນບໍ່ດົນມານີ້ ແລະ ມີການຜະລິດລາຍການໂທລະພາບ “ບ້ານຂອງຂ້ອຍ” ແລະ “ເຮືອນຂອງຂ້ອຍ” ສໍາລັບເດັກກ່ອນໄວຮຽນ.
ພາຍໃຕ້ການສະໜັບສະໜູນຂອງ ອົງການອຸຍນິເຊັບ, ໃນໄລຍະການແຜ່ລະບາດຂອງພະຍາດໂຄວິດ-19, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ມີບົດບາດສຳຄັນເຜີຍແຜ່ຂໍ້ມູນຂ່າວສານໃຫ້ໄປເຖິງຊຸມຊົນ ແລະ ໃຫ້ຂໍ້ມູນທີ່ສຳຄັນເພື່ອໃຫ້ເຂົາເຈົ້າສາມາດປ້ອງກັນການແຜ່ລະບາດຂອງພະຍາດ ແລະ ປົກປ້ອງຊີວິດການເປັນຢູໃຫ້ມີຄວາມປອດໄພ. ໃນບໍ່ດົນມານີ້, ກໍມີຂະບວນການໂຄສະນາຜ່ານສືຕ່າງໆ ກ່ຽວກັບພະຍາດໝາກແດງໃຫຍ່ ແລະ ພະຍາດໝາກແດງນ້ອຍ ເຮັດໃຫ້ປະຊາຊົນ ສາມາດເຂົ້າເຖິງ ແລະ ຮັບຮູ້ຂໍ້ມູນໄດ້ຢ່າງກວ້າງຂວາງ ເພື່ອຮັບການສັກຢາກັນພະຍາດດັ່ງກ່າວ ອັນໄດ້ຮັບຜົນສຳເລັດຢ່າງຫຼວງຫຼາຍ.
ໃນອະນະຄົດ, ອົງການອຸຍນິເຊັບມີຄວາມໝາຍໝັ້ນໃນການາສືບຕໍ່ສະໜັບສະໜູນໂຄງການເສີມຂະຫຍາຍຄວາມຮູ້ທາງດ້ານດິຈິຕອລໃຫ້ກັບໄວໜຸ່ມ ແລະ ການນຳໃຊ້ສື່ ເພື່ອໂຄສະນາຄວາມສໍາຄັນຂອງການສັກວັກແຊັງ, ຄວາມຮຸນແຮງທາງເພດ ແລະ ພຶດຕິກຳທີ່ເປັນອັນຕະລາຍອື່ນໆ.
ທ່ານ ປອ. ເພຍ ເຣເບນໂລ ບຣິດໂຕ ກ່າວໃນລະຫວ່າງການເຂົ້າຢ້ຽມອໍາລາວ່າ: “ພວກເຮົາເຊື່ອວ່າສື່ມວນຊົນ, ວັດທະນະທໍາ ແລະ ການທ່ອງທ່ຽວ ເປັນກຸນແຈສຳຄັນ ບໍ່ພຽງແຕ່ໃນການປົກປັກຮັກສາການເປັນຢູ່ທີ່ດີຂອງໄວໜຸ່ມ ແຕ່ຍັງເປັນການເສີມສ້າງຊັບພະຍາກອນມະນຸດຂອງ ສປປ ລາວ ອີກດ້ວຍ”.
ໃນຕອນທ້າຍ, ທ່ານ ລັດຖະມົນຕີໄດ້ສະແດງຄວາມຂອບໃຈ ຕໍ່ທ່ານ ນາງ ປອ. ເພຍ ເຣເບນໂລ ບຣິດໂຕ ທີ່ໄດ້ໃຫ້ການສະໜັບສະໜູນ ແລະ ຮ່ວມມືທີ່ດີ ຕະຫຼອດໄລຍະທີ່ຜ່ານມາ, ພ້ອມທັງເຊື່ອໝັ້ນວ່າ ການຮ່ວມມືລະຫວ່າງ ກະຊວງ ຖວທ ແລະ ອົງການອຸຍນິເຊັບຈະສືບຕໍ່ສ້າງຮັບຜົນສຳເລັດອັນໃໝ່ທີ່ຍິ່ງໃຫຍ່ກວ່າເກົ່າ ຕໍ່ກັບເດັກ ແລະ ໄວໜຸ່ມໃນ ສປປ ລາວ.
ໃນຕອນທ້າຍ, ທ່ານ ປອ. ເພຍ ເຣເບນໂລ ບຣິດໂຕ ໄດ້ສະແດງຄວາມຂອບໃຈອີກຄັ້ງ ຕໍ່ທ່ານ ລັດຖະມົນຕີ ກໍຄື ກະຊວງ ຖວທ ທີ່ໄດ້ໃຫ້ການສະໜັບສະໜູນ ແລະ ຮ່ວມມືທີ່ດີ, ໂດຍກ່າວວ່າ “ຜົນສຳເລັດທີ່ພວກເຮົາໄດ້ມາຮ່ວມກັນແມ່ນເປັນຂໍ້ພິສູດເຖິງຄວາມພະຍາຍາມລວມຂອງພວກເຮົາ, ຂ້າພະເຈົ້າເຊື່ອໝັ້ນວ່າ ການຮ່ວມມືລະຫວ່າງ ກະຊວງ ຖວທ ແລະ ອົງການອຸຍນິເຊັບຈະສືບຕໍ່ສ້າງຮັບຜົນສຳເລັດອັນໃໝ່ທີ່ຍິ່ງໃຫຍ່ກວ່າເກົ່າ ຕໍ່ກັບເດັກ ແລະ ໄວໜຸ່ມໃນ ສປປ ລາວ.”
ການເຂົ້າຢ້ຽມອໍາລາຄັ້ງນີ້ ໄດ້ສິ້ນສຸດລົງດ້ວຍຄວາມປະທັບໃຈ, ໂດຍທັງສອງຝ່າຍຫວັງວ່າຈະສາມາດສືບຕໍ່ຮ່ວມມືກັນ ເພື່ອສົ່ງເສີມວຽກງານສິດທິເດັກ ແລະ ສະຫວັດດີການຂອງເດັກ ໃນອະນາຄົດ.
