ກະຊວງເຕັກໂນໂລຊີ ແລະ ການສື່ສານ ຮ່ວມກັບ ບໍລິສັດ ດາວທຽມເຕັກໂນໂລຊີ ຈໍາກັດໄດ້ຈັດພິທີເຊັນສັນຍາ ວ່າດ້ວຍການຮ່ວມມືສ້າງສູນຄຸ້ມຄອງ ແລະ ບໍລິການຂໍ້ມູນດາວທຽມ ແຫ່ງຊາດ ຂຶ້ນໃນວັນທີ 21 ມິຖຸນາ ຜ່ານມາ ທີ່ ຫໍປະຊຸມແຫ່ງຊາດ ນະ ຄອນຫຼວງວຽງຈັນ.
ຮ່ວມລົງນາມໂດຍ ທ່ານ ວິໄລສອນ ບຸບຜາລັດ ຫົວໜ້າກົມເຕັກໂນໂລຊີ ແລະ ນະວັດຕະກຳ ກະຊວງເຕັກໂນໂລຊີ ແລະ ທ່ານ ຊູ ລິນລິນ (XU LIN LIN) ຜູ້ອໍານວຍການ ບໍລິສັດດາວທຽມເຕັກໂນໂລຊີ ຈໍາກັດ, ໂດຍມີ ທ່ານ ບໍ່ວຽງຄໍາ ວົງດາລາ ລັດຖະ ມົນຕີກະຊວງເຕັກໂນໂລຊີ ແລະ ການສື່ສານ, ມີຮອງລັດຖະມົນຕີ, ພ້ອມດ້ວຍພະນັກ ງານທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.
ທ່ານ ວິໄລສອນ ບຸບຜາລັດ ກ່າວວ່າ: ການເຊັນສັນຍາໃນຄັ້ງນີ້ ມີຈຸດປະສົງ ເພື່ອແນໃສ່ພັດທະນາວຽກງານບໍລິການຂໍ້ມູນດາວທຽມໃຫ້ແກ່ສັງຄົມ ທັງພາກລັດ ແລະ ເອກະຊົນ ເຂົ້າໃນການເຊື່ອມໂຍງ ແລະ ເຊື່ອມຈອດເຄືອຂ່າຍທາງດ້ານເຕັກໂນໂລຊີດາວທຽມ ໃຫ້ມີຄວາມສະດວກວ່ອງໄວ, ມີຄຸນນະພາບ, ລວມສູນ ແລະ ເພີ່ມປະສິດ ທິພາບການຄຸ້ມຄອງລັດ.
ເນື້ອໃນສັນຍາທີ່ລົງນາມຮ່ວມກັນໃນຄັ້ງນີ້ ປະກອບມີ: 1) ສ້າງຕັ້ງສະຖານີ ດາວທຽມ BEIDOU ພາກພື້ນດິນ ພ້ອມດ້ວຍໂຄງລ່າງພື້ນຖານທັງໝົດ ຢູ່ເມືອງວັງວຽງ ແຂວງວຽງຈັນ ໃນເນື້ອທີ່ 10 ເຮັກຕາ ພ້ອມດ້ວຍໜ່ວຍບໍລິການ ຕັ້ງຢູ່ບ້ານດອນຕິ້ວ ເມືອງໄຊທານີ ນະຄອນຫຼວງວຽງຈັນ ໃນເນື້ອທີ່ 4 ເຮັກຕາ; 2) ສ້າງຊັບພະຍາ ກອນມະນຸດໄລຍະສັ້ນ, ໄລຍະກາງ ແລະ ໄລຍະຍາວດ້ານເຕັກໂນໂລຊີອາວະກາດ; 3) ໃຫ້ບໍລິການຂໍ້ມູນດ້ານເຕັກໂນໂລຊີອາວະກາດແກ່ສັງຄົມ, ໃຫ້ບໍລິການສ້າງລະບົບແຜນທີ່, ສ້າງສູນ Remote sensing, ສູນ GIS, ສູນ GNSS ແລະ ໃຫ້ການບໍລິການຂໍ້ມູນດາວທຽມBEIDOU; 4) ການບໍລິການມືຖືຜ່ານດາວທຽມ; 5) ບໍລິການເຕືອນໄພພິບັດທາງທຳມະຊາດໂດຍນຳໃຊ້ເຕັກໂນໂລຊີ ຂໍ້ມູນພາບຖ່າຍດາວທຽມ, ສ້າງສະຖານີກວດກາສະພາບອາກາດຢູ່ບັນດາເຂື່ອນໄຟຟ້າ ເພື່ອສະໜອງຂໍ້ມູນດ້ານອາກາດໃຫ້ແກ່ເຂື່ອນໄຟຟ້າຕ່າງໆ; 6) ການນຳໃຊ້ເຕັກໂນໂລຊີດາວທຽມ ເຂົ້າໃນການສໍາຫຼວດບໍ່ແຮ່ໂດຍຫັນການສຳຫຼວດບໍ່ແຮ່ເປັນລະບົບດີຈີຕອນ ທີ່ທັນສະໄໝ ພ້ອມດ້ວຍກຳນົດເຂດສຳປະທານບໍ່ແຮ່; 7) ການນຳໃຊ້ດາວທຽມເຂົ້າໃນການບໍລິຫານຕົວເມືອງອັດສະລິຍະ; ນໍາໃຊ້ພາບຖ່າຍດາວທຽມໃນການຄຸ້ມຄອງການນໍາໃຊ້ທີ່ດິນ, ການປົກປັກຮັກສາສິ່ງແວດລ້ອມ, ການສໍາຫຼວດເນື້ອທີ່ປູກເຂົ້າ, ຢາງພາລາ, ມັນຕົ້ນ, ອ້ອຍ, ເນື້ອທີ່ນໍ້າຖ້ວມ, ເນື້ອທີ່ໄຟໄໝ້ປ່າ ແລະ ອື່ນໆ; ແລະ 9) ຄຸ້ມຄອງການດູດແຮ່ຊາຍຕາມລຳນ້ຳຕ່າງໆ ຊຶ່ງພາຍຫຼັງເຊັນສັນຍາສະບັບນີ້ແລ້ວ ແມ່ນຈະໄດ້ເລີ່ມຕົ້ນຈັດຕັ້ງປະຕິບັດໃນກາງປີ 2024.
(ຂ່າວ-ພາບ: ແສງຈັນ)
