ພິທີເຊັນສັນຍາຮ່ວມທຶນ ເພື່ອສ້າງຕັ້ງບໍລິສັດ ລັດຮຸ້ນສ່ວນອຸດສາຫະກຳທ່ອງທ່ຽວລາວ ລະຫວ່າງ ກົມປະຕິຮູບລັດວິສາຫະກິດ ແລະ ການປະກັນໄພ ຕາງໜ້າກະຊວງການເງິນ ກໍຄື ລັດຖະບານແຫ່ງ ສປປ ລາວ ແລະ ບໍລິສັດ ພັດທະນາອຸດສາຫະກຳ ທ່ອງທ່ຽວລາວ ໄດ້ຈັດຂຶ້ນໃນວັນທີ 14 ມິຖຸນາ ຜ່ານມາ ນີ້ ທີ່ໂຮງແຮມດອນຈັນພລາເລດ ນະຄອນຫຼວງວຽງຈັນ ໂດຍມີທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ, ທ່ານ ນາງ ດາລະນີ ພົມມະວົງສາ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ), ມີທ່ານ ທູດເສດຖະກິດຈີນ ປະຈຳລາວ, ຫົວໜ້າກົມ, ຮອງກົມ, ຜູ້ຕາງໜ້າຈາກກະຊວງທີ່ກ່ຽວຂ້ອງເຂົ້າຮ່ວມ.
ທ່ານ ໄພທູນ ທຽງລະໄມ ວ່າການກົມປະຕິຮູບລັດວິສາຫະກິດ ແລະ ການປະກັນໄພ ໄດ້ຂຶ້ນກ່າວປະຫວັດຄວາມເປັນມາຂອງການສ້າງຕັ້ງ ບໍລິສັດຮ່ວມທຶນ (ບໍລິສັດ ລັດຮຸ້ນສ່ວນອຸດສາຫະກໍາທ່ອງທ່ຽວລາວ ຈໍາກັດ) ວ່າ: ໃນວັນທີ 8 ພະຈິກ 2023 ຫ້ອງການ ກະຊວງ ຖວທ ໄດ້ເຊັນບົດບັນທຶກຄວາມເຂົ້າໃຈ (MOU) ກັບ ບໍລິສັດ ພັດທະນາອຸດສາຫະກໍາທ່ອງທ່ຽວລາວ ໂດຍມີຈຸດປະສົງແມ່ນເພື່ອສ້າງຕັ້ງບໍລິສັດ ລັດຮຸ້ນສ່ວນອຸດສາຫະກຳທ່ອງທ່ຽວລາວ ຈໍາກັດ. ເພື່ຶອພັດທະນາການທ່ອງທ່ຽວ ຢູ່ ສປປ ລາວ ໃຫ້ກາຍເປັນອຸດສາຫະກຳການທ່ອງທ່ຽວ ທີ່ທັນສະໄໝ ແນໃສ່ອະນຸລັກ, ປົກປັກຮັກສາຊັບພະຍາກອນການທ່ອງທ່ຽວທຳມະຊາດ, ວັດທະນະທຳ ແລະ ປະຫວັດສາດ ໃຫ້ຄົງຄຸນຄ່າ ເປັນທ່າແຮງໃນການດຶງດູດນັກທ່ອງທ່ຽວ, ນັກລົງທຶນພາຍໃນ ແລະ ຕ່າງປະເທດ, ສ້າງລາຍຮັບໃຫ້ລັດຖະບານ, ສ້າງວຽກເຮັດງານທຳໃຫ້ປະຊາຊົນລາວ, ໃຫ້ນັກສຶກສາທີ່ຈົບຈາກມະຫາວິທະຍາໄລ ແຫ່ງຕ່າງໆໃນ ສປປ ລາວ ແລະ ຕ່າງປະເທດ ເພື່ອກະຈາຍລາຍໄດ້ສູ່ສັງຄົມ ແລະ ຊຸມຊົນ, ປະກອບສ່ວນພັດທະນາເສດຖະກິດ-ສັງຄົມ ຕາມທິດສີຂຽວ ແລະ ຍືນຍົງ, ທຶນທັງໝົດຂອງບໍລິສັດຮ່ວມທຶນແມ່ນ 100.000.000 ໂດລາ, ໂດຍມີທຶນຈົດທະບຽນ 3.000.000 ໂດລາ, ມີອາຍຸການຮ່ວມທຶນ 50 ປີ, ໂດຍແມ່ນບໍລິສັດ ພັດທະນາອຸດສາຫະກຳການທ່ອງທ່ຽວ ຈໍາກັດ, ເປັນຜູ້ຮັບຜິດຊອບລົງທຶນທັງໝົດ. ຊຶ່ງໄດ້ແບ່ງອອກເປັນສອງໄລຍະການຂອງຖືຮຸ້ນ ຂອງສອງຝ່າຍຄື: ໄລຍະທີໜຶ່ງ 25 ປີ, ລັດຖະບານ ກໍຄືຕາງໜ້າໂດຍກະຊວງການເງິນ ຖືຮຸ້ນບູລິມະສິດ 40% ແລະ ບໍລິສັດອຸດສາຫະກໍາທ່ອງທ່ຽວລາວ ຈໍາກັດ ຖືຮຸ້ນສາມັນ 60% (ໃນໄລຍະນີ້ ລັດຖະບານ ສາມາດຊື້ຮຸ້ນເພີ່ມໄດ້ ຈໍານວນ 20% ຕາມລາຄາຮຸ້ນໃນແຕ່ລະໄລຍະ.); ໄລຍະທີສອງ, ປີທີ 26 ຫາ 50 ປີ: ລັດຖະບານ ກໍຄືກະຊວງການເງິນ ຖືຮຸ້ນບູລິມາສິດ 60% ແລະ ບໍລິສັດ ພັດທະນາອຸດສາຫະກຳທ່ອງທ່ຽວ ຈຳກັດ ຖືຮຸ້ນສາມັນ 40% ບັນດາກິດຈະການທີ່ຈະມີການລົງທຶນທີ່ຕິດພັນກັບການດໍາເນີນທຸລະກິດ ໂດຍກົງ ແລະ ປິ່ນອ້ອມ ມີດັ່ງນີ້: ພາຍຫຼັງໄດ້ຮັບການສ້າງຕັ້ງບໍລິສັດຮ່ວມທຶນແລ້ວ ຈະໄດ້ມີການສ້າງສຳນັກງານຫ້ອງການ, ໂຮງແຮມ, ສູນຝຶກອົບຮົມວິຊາອາຊີບການທ່ອງທ່ຽວ, ປະສານສົມທົບກັບກະຊວງ ຫຼື ອົງການທີ່ກ່ຽວຂ້ອງຂອງລັດເພື່ອສຶກສາ ແລະ ສ້າງລະບົບທີ່ທັນສະໄໝໃນການແຈ້ງ ເຂົ້າ-ອອກ ຂອງນັກທ່ອງທ່ຽວ ທີ່ຈະເຂົ້າມາ ສປປ ລາວ ຕາມທາງລົດໄຟລາວ-ຈີນ ທີ່ຈະມີ ຈຳນວນ 2 ທ່ຽວຕໍ່ມື້ ແລະ ຄາດຄະເນສອງປີທຳອິດຈະມີນັກທ່ອງທ່ຽວ ຈຳນວນ 2 ລ້ານກວ່າຄົນຕໍ່ປີ ແລະ ປີທີ່ສາມຈະເພີ່ມຂື້ນເປັນຈໍານວນ 3 ລ້ານກວ່າຄົນ/ປີ ແລະ ຈະໄດ້ມີການສະເໜີເປີດສາຍການບິນເພິ່ມຕື່ມຈຳນວນ 6 ແຫ່ງ ເພື່ອນໍາເອົາສະເພາະນັກທ່ອງຈີນເຂົ້າມາທ່ອງທ່ຽວ ສປປ ລາວ.
ນອກຈາກນີ້, ຍັງຈະໄດ້ຊ່ວຍເຫຼືອພາກລັດໃນການສ້າງສູນ IT ເພື່ຶອເປັນການຄຸ້ມຄອງ ແລະ ຕິດຕາມການເຂົ້າ-ອອກ ຂອງນັກທ່ອງທົ່ວປະເທດ. ຄາດຄະເນແຜນລາຍຮັບຂອງບໍລິສັດຮວ່ມທຶນໃນປີທີໜຶ່ງ ແລະ ປີທີສອງ ຈະໄດ້ຮັບ ຈໍານວນ 8,5 ລ້ານໂດລາ ແລະ ໃນປີທີ່ສາມ ເຖິງ ປີທີຫ້າຈະເພີ່ມຂື້ນເປັນ 9,0 ຫາ 9,4 ລ້ານໂດລາ, ຕາມແຜນບົດສຶກສາເສດຖະກິດ-ເຕັກນິກ, ລວມທັງກິດຈະການຕ່າງໆ ທີ່ປິ່ນອ້ອມຂອງບໍລິສັດຮ່ວມທຶນ, ຄາດຄະເນ ຜົນໄດ້ຮັບແມ່ນມີຄວາມສາມາດສ້າງໃຫ້ມີຜົນກຳໄລຂອງການລົງທຶນດ້ວຍເງິນ 100.000.000 ໂດລາ, ມີມູນຄ່າປັດຈຸບັນຂອງຜົນປະໂຫຍດສຸດທິແມ່ນ 40.636.076 ໂດລາ.
ສຳລັບຜົນປະໂຫຍດທາງອ້ອມຂອງລັດຖະບານໄດ້ຮັບການພັດທະນາການທ່ອງທ່ຽວ ຢູ່ສປປ ລາວ ໃຫ້ກາຍ ເປັນອຸດສາຫະກຳການທ່ອງທ່ຽວທີ່ທັນສະໄໝ, ສ້າງວຽກເຮັດງານທໍາໃຫ້ປະຊາຊົນລາວເຂດໃກ້ຄຽງ, ໃນ ສປປ ລາວ ແລະ ຕ່າງປະເທດ ມີວຽກເຮັດງານທໍາ ແລະ ຜົນປະໂຫຍດທາງກົງ ຂອງລັດຖະບານ ທີ່ຈະໄດ້ຮັບແມ່ນເປັນການເພີ່ມທະວີຄວາມສາມັກຄີທາງການເມືອງ ກັບ ລັດຖະບານ ສປ ຈີນ, ການໄດ້ເຂົ້າມາມີສ່ວນຮ່ວມຖຶຮຸ້ນໃນທຸລະກິດ ແລະ ເງິນປັນຜົນຈາກການດຳເນີນທຸລະກິດ ແລະ ລັດຖະບານສາມາດຄຸ້ມຄອງ, ມີສ່ວນຮ່ວມໃນທຸລະກິດຂອງໂຄງການດັ່ງກ່າວເປັນຕົ້ນແມ່ນ: ການພັດທະນາພື້ນຖານໂຄງລ່າງ ຂອງ ສປປ ລາວ ສໍາລັບຂະແໜງການທ່ອງທ່ຽວ, ການຊຸກຍູ້ສົ່ງເສີມການລົງທຶນໃນຂະແໜງທ່ອງທ່ຽວ, ເປັນການກະກຽມສະຖານທີ່ ເພື່ອຮອງຮັບນັກທ່ອງທ່ຽວຈາກ ສປ ຈີນ, ປະເທດໃກ້ຄຽງ ແລະ ທົ່ວໂລກ ທີ່ຈະມາທ່ອງທ່ຽວ ສປປ ລາວ ຫຼາຍຂຶ້ນ ເນື່ອງໃນໂອກາດທີ່ ສປປ ລາວ ເປີດປີທ່ອງທ່ຽວ 2024 ແລະ ນອກນີ້, ຍັງຈະໄດ້ຮັບພັນທະອາກອນຕ່າງໆ ຈາກການດຳເນີນທຸລະກິດຕາມກົດໝາຍ-ລະບຽບການ.
ຈາກນັ້ນ, ທ່ານ ໄພທູນ ທຽງລະໄມວ່າການກົມປະຕິຮູບລັດວິສາຫະກິດ ແລະ ການປະກັນໄພ ແລະ ທ່ານ ພັນຊີຫຼິວ ປະທານບໍລິສັດ ພັດທະນາອຸດສາຫະກຳ ທ່ອງທ່ຽວລາວ ກໍໄດ້ຮ່ວມກັນລົງນາມໃນສັນຍາ ເພື່ອສ້າງຕັ້ງບໍລິສັດດັ່ງກ່າວ ໂດຍມີ ທ່ານ ພູທະນູເພັດ ໄຊສົມບັດ , ທ່ານ ນາງ ດາລະນີ ພົມມະວົງສາ ແຂກຖືກເຊີນຈາກພາກສ່ວນຕ່າງໆຮ່ວມເປັນສັກຂີພິຍານ.
(ຂ່າວ-ພາບ ບຸນອູ້ມ)
