ໃນວັນທີ 12 ມິຖຸນາ 2024 ນີ້, ກະຊວງປ້ອງກັນປະເທດ ແຫ່ງ ສປປ ລາວ ໄດ້ເປັນປະທານຈັດຕັ້ງກອງປະຊຸມທາງໄກ ຂອງໜ່ວຍງານວິຊາການເຈົ້າໜ້າທີ່ອາວຸໂສປ້ອງກັນປະເທດອາຊຽນ, ໂດຍພາຍໃຕ້ການເປັນປະທານຂອງ ສະຫາຍ ພັນເອກ ເຟືອງໄຊ ມີລາກົງ, ຮອງຫົວໜ້າກົມພົວພັນຕ່າງປະເທດ, ຫົວໜ້າໜ່ວຍງານວິຊາການເຈົ້າໜ້າທີ່ອາວຸໂສ ປ້ອງກັນປະເທດ ອາຊຽນ ແຫ່ງ ສປປ ລາວ. ມີຫົວໜ້າ ພ້ອມດ້ວຍຄະນະຂອງໜ່ວຍງານວິຊາ ການເຈົ້າໜ້າທີ່ອາວຸໂສປ້ອງກັນປະເທດ ຈາກບັນດາປະເທດສະມາຊິກອາຊຽນ ແລະ ກອງເລຂາອາຊຽນ ເຂົ້າຮ່ວມ.
ຈຸດປະສົງຫຼັກຂອງກອງປະຊຸມໃນຄັ້ງນີ້ ແມ່ນເພື່ອປຶກສາຫາລື ແລະ ສືບຕໍ່ສໍາເລັດບາງວຽກງານທີ່ສໍາຄັນໃນຂອບການຮ່ວມມື ດ້ານວຽກງານປ້ອງກັນຊາດອາຊຽນ ໃນໄລຍະການເປັນປະທານກອງປະຊຸມລັດຖະມົນຕີປ້ອງກັນປະເທດ ອາຊຽນ ຂອງກະຊວງ ປ້ອງກັນປະເທດ ແຫ່ງ ສປປ ລາວ ໃນປີ 2024, ໂດຍສະເພາະ ຮ່າງຖະແຫລງການຮ່ວມຂອງກອງປະຊຸມລັດຖະມົນຕີປ້ອງກັນປະເທດອາຊຽນຄັ້ງທີ 18, ຮ່າງເອກະສານຫລັກການກ່ຽວກັບການເຂົ້າຮ່ວມສັງເກດການໃນຫນ່ວຍງານຜູ້ຊ່ຽວຊານ ໃນຂອບກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ ແລະ ບັນຫາອື່ນໆທີ່ກ່ຽວຂ້ອງ.
ກອງປະຊຸມ ໄດ້ເຫັນດີເປັນເອກະພາບຕໍ່ກັບຫຼາຍວຽກງານທີ່ສໍາຄັນ, ເຊິ່ງເປັນພື້ນຖານໃຫ້ແກ່ການກະກຽມຄວາມພ້ອມໃນການເປັນເຈົ້າພາບ ແລະ ເປັນປະທານບັນດາກອງປະຊຸມໃຫຍ່ທີ່ສໍາຄັນ, ພາຍໃຕ້ການເປັນປະທານອາຊຽນຂອງກະຊວງປ້ອງກັນປະເທດ ແຫ່ງ ສປປ ລາວ ໃນປີ 2024, ໂດຍສະເພາະແມ່ນກອງປະຊຸມເຈົ້າຫນ້າທີ່ອາວຸໂສປ້ອງກັນປະເທດອາຊຽນ ແລະ ອາຊຽນ-ບວກ ໃນເດືອນ ກັນຍາ ແລະ ກອງປະຊຸມລັດຖະມົນຕີປ້ອງກັນປະເທດອາຊຽນ ຄັ້ງທີ 18 ແລະ ອາຊຽນ-ບວກ ຄັ້ງທີ 11 ໃນເດືອນ ພະຈິກ 2024.
ຂ່າວ: ໂຈ່ລີ້ ວົງໄຊ
