ວິທະຍຸໂທລະພາບສູນກາງຈີນ CMG ໄດ້ລາຍງານວ່າ: ກອງປະຊຸມໃຫຍ່ ອົງການອະນາໄມໂລກ ຫລື WHO ຄັ້ງທີ 77 ໄດ້ຈັດຂຶ້ນຢູ່ນະຄອນເຊີແນວ ຂອງສະວິສ ໃນວັນທີ 27 ພຶດສະພານີ້ ໂດຍຕົກລົງວ່າ: ປະຕິເສດຈັດເອົາຮ່າງມະຕິ ທີ່ເອີ້ນວ່າ: “ເຊື້ອເຊີນໄຕ້ຫວັນ ເຂົ້າຮ່ວມກອງປະຊຸມໃຫຍ່ WHO ດ້ວຍຖານະຜູ້ສັງເກດການ” ທີ່ສະເໜີໂດຍບາງປະເທດ ເຂົ້າໃນວາລະກອງປະຊຸມ.
ທ່ານ ເສິນຊູ້ ຜູ້ຕາງໜ້າຖາວອນຂອງຈີນ ປະຈຳສຳນັກງານທີ່ເຊີແນວ ຂອງ ສປຊ ແລະ ອົງການຈັດຕັ້ງສາກົນອື່ນໆຢູ່ສະວິສ ໄດ້ປະກອບຄຳເຫັນໃນກອງປະຊຸມວ່າ: ກອງປະຊຸມໃຫຍ່ WHO ໄດ້ປະຕິເສດອັນທີ່ເອີ້ນວ່າ ຮ່າງມະຕິທີ່ພົວພັນກັບໄຕ້ຫວັນ ເປັນຫລາຍປີລຽນຕິດ. ໃນໄລຍະຜ່ານມາ, ປະເທດສ່ວນຫລາຍທີ່ສຸດຂອງໂລກ ໄດ້ກ່າວຢ້ຳວ່າ ຈະຍຶດໝັ້ນມະຕິເລກ 2758 ຂອງສະມັດຊາໃຫຍ່ ອົງການສະຫະປະຊາຊາດ, ຍຶດໝັ້ນສະໜັບສະໜູນຫລັກການປະເທດຈີນດຽວ ແລະ ຄັດຄ້ານບໍ່ໃຫ້ໄຕ້ຫວັນ ເຂົ້າຮ່ວມກອງປະຊຸມໃຫຍ່ WHO, ມີຮ້ອຍກວ່າປະເທດ ໄດ້ສົ່ງສານເຖິງຜູ້ອຳນວຍການໃຫຍ່ WHO ເພື່ອສະໜັບສະໜູນຫລັກໝັ້ນຂອງຈີນ ເຊິ່ງສະແດງໃຫ້ເຫັນຢ່າງເຕັມທີ່ວ່າ ຫລັກການປະເທດຈີນດຽວ ເປັນຄວາມຮັບຮູ້ທົ່ວໄປຂອງໂລກ, ການສ້າງກະແສຂ່າວກ່ຽວກັບບັນຫາໄຕ້ຫວັນ ໃນກອງປະຊຸມໃຫຍ່ WHO ແມ່ນບໍ່ຖືກໃຈຄົນ.
