ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ກະສິກອນ ເມືອງຍົມມະລາດ ແຂວງຄຳມ່ວນ ເລີ່ມເກັບກ່ຽວຜົນຜະລິດເຂົ້ານາແຊງ ມາແຕ່ຕົ້ນເດືອນເມສາ 2024, ມາຮອດປັດຈຸບັນ ສາມາດເກັບກ່ຽວຜົນຜະລິດໄດ້ຫລາຍກວ່າ 90% ໃນນີ້, ເນື້ອທີ່ປູກເປັນສະບຽງອາຫານ 376 ເຮັກຕາ, ປະຕິບັດໄດ້ 404 ເຮັກຕາ ເທົ່າກັບ 107% ຜົນຜະລິດລວມ 2.141 ໂຕນ; ປູກເປັນສິນຄ້າ 1.294 ເຮັກຕາ ປະຕິບັດໄດ້ 1.301 ເຮັກຕາ ເທົ່າກັບ 101% ຜົນຜະລິດລວມ 6.895 ໂຕນ.
ຫ້ອງການກະສິກຳ ແລະ ປ່າໄມ້ເມືອງເມືອງຍົມມະລາດ ແຂວງຄໍາມ່ວນໄດ້ໃຫ້ຮູ້ວ່າ: ສຳລັບການປູກພືດລະດູແລ້ງ ສົກປີ 2023-2024 ແຜນປູກພືດທົ່ວເມືອງ 600 ເຮັກຕາ ປະຕິບັດໄດ້ 540 ເຮັກຕາ ເທົ່າກັບ 90% ຂອງແຜນການ ໃນນີ້, ປູກເປັນສະບຽງອາຫານ 280 ເຮັກຕາ, ປະຕິບັດໄດ້ 226 ເຮັກຕາ, ປູກເປັນສິນຄ້າ 320 ເຮັກຕາ ປະຕິບັດໄດ້ 314 ເຮັກຕາ ມາຮອດປັດຈຸບັນນີ້ ສາມາດເກັບກູ້ຜົນຜະລິດໄດ້ 80 ກວ່າ%. ສ່ວນແຜນການຜະລິດເຂົ້ານາແຊງ ລະດູແລ້ງສົກປີ 2023-2024 ຂອງເມືອງຍົມມະລາດ ມີເນື້ອທີ່ທັງໝົດ 1.670 ເຮັກຕາ, ສາມາດປະຕິບັດໄດ້ 1.705 ເຮັກຕາ, ເທົ່າກັບ 102% (ລື່ນແຜນການ) ຄາດຄະເນຜົນຜະລິດລວມທັງໝົດເທົ່າກັບ 9.113 ໂຕນ, ສະມັດຕະພາບ 4,6 ໂຕນ/ເຮັກຕາ.
ຂໍ້ມູນຍັງໃຫ້ຮູ້ຕື່ມວ່າ: ການເກັບກ່ຽວເຂົ້ານາແຊງ ຂອງກະສິກອນ ເມືອງມະຫາໄຊ ໄດ້ສຳເລັດພຽງແຕ່ 20% ຂອງແຜນການ. ໃນຂະນະທີ, ການເກັບກູ້ພືດລະດູແລ້ງສຳເລັດ 50% ຂອງແຜນການ ປັດຈຸບັນກະສິກອນ ຍັງສືບຕໍ່ຂຸ້ນຂ້ຽວເກັບກ່ຽວໄປເລື້ອຍໆ ຄາດວ່າຈະໃຫ້ສໍາເລັດໃນທ້າຍເດືອນພຶດສະພາທີ່ຈະມາເຖິງນີ້.
ໃນທົ່ວເມືອງມະຫາໄຊ ມີເນື້ອທີ່ຜະລິດເຂົ້ານາແຊງທັງໝົດ 1.300 ເຮັກຕາ, ເນື້ອທີ່ຜະລິດສະບຽງອາຫານ 600 ເຮັກຕາ ແລະ ເນື້ອທີ່ຜະລິດເຂົ້າເປັນສິນຄ້າ 700 ເຮັກຕາ.
