ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ໄດ້ຕ້ອນຮັບການເຂົ້້າພົບປະຢ້ຽມຢາມ ຂອງທ່ານ ນາງ ເສີນ ໂຢໂຢ ຮອງປະທານສະພາທີ່ປືກສາການເມືອງທົ່ວປະເທດຈີນ ພ້ອມດ້ວຍຄະນະ ໃນວັນທີ 27 ພະຈິກ 2023 ທີ່ສູນກາງແນວລາວສ້າງຊາດ ເນື່ອງໃນໂອກາດທີ່ຄະນະຜູ້ແທນຂັ້ນສູງດັ່ງກ່າວ ມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງວັນທີ 25-29 ພະຈິກ 2023.
![](https://medialaos.net/wp-content/uploads/2023/11/405359959_731358065678693_5235517813602264433_n.jpg)
ທ່ານປະທານສູນກາງແນວລາວສ້າງຊາດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາ ຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງຄະນະໃນຄັ້ງນີ້ ເຊິ່ງເປັນການປະກອບສ່ວນອັນສໍາຄັນໃນການເສີມສ້າງສາຍພົວພັນມິດຕະພາບ ແລະ ການຮ່ວມມືຍຸດທະສາດຮອບດ້ານ ລະຫວ່າງ ລາວ-ຈີນ ເວົ້າລວມ ເວົ້າສະເພາະແມ່ນອົງການແນວລາວສ້າງຊາດ ກັບສະພາທີ່ປຶກສາການເມືອງທົ່ວປະເທດຈີນ ໃຫ້ເຂົ້າສູ່ລວງເລີກ ພ້ອມກັນນີ້ ທ່ານ ປະທານສູນກາງແນວລາວສ້າງຊາດ ຍັງໄດ້ລາຍງານສະພາບລວມໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຮອງປະທານສະພາທີ່ປືກສາການເມືອງທົ່ວປະເທດຈີນ ຮັບຊາບ ໂດຍຫຍໍ້ ແລະ ທ່ານໄດ້ໃຫ້ຮູ້ຕື່ມວ່າ ໃນປີ 2024 ລາວໄດ້ຮັບກຽດເປັນເຈົ້າພາບຈັດກອງປະຊຸມສຸດຍອດອາຊຽນ ພ້ອມທັງເປີດປີທ່ອງທ່ຽວລາວ 2024.
![](https://medialaos.net/wp-content/uploads/2023/11/405271139_731358035678696_7836136754028060334_n.jpg)
ທ່ານ ນາງ ເສີນ ໂຢໂຢ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ ທ່ານ ສິນລະວົງ ຄຸດໄພທູນ ທີ່ໄດ້ໃຫ້ກຽດຕ້ອນຮັບຄະນະໃນຄັ້ງນີ້ ພ້ອມທັງໄດ້ລາຍງານຈຸດປະສົງການມາຢ້ຽມຢາມ ລາຍງານກ່ຽວກັບສະພາບລວມໃນການພັດທະນາເສດຖະກິດ-ສັງຄົມ ຂອງສາທາລະນະລັດ ປະຊາຊົນຈີນ ບົດບາດຂອງສະພາທີ່ປຶກສາການເມືອງທົ່ວປະເທດຈີນ ໃຫ້ທ່ານປະທານສູນກາງແນວລາວສ້າງຊາດ ໄດ້ຮັບຊາບ ພ້ອມກັນນີ້ທ່ານ ນາງ ເສິນ ໂຢໂຢ ຍັງໄດ້ສະແດງຄວາມຮູ້ສຶກຕໍ່ການຜັນຂະຫຍາຍສາຍພົວພັນມິດຕະພາບໃນໄລຍະມໍ່ໆມານີ້ ໂດຍສະເພາະເສັ້ນທາງລົດໄຟ ລາວ-ຈີນ ເສັ້ນ ທາງດ່ວນນະຄອນຫຼວງວຽງຈັນຫາວັງວຽງ ແຂວງວຽງຈັນ ແລະ ອື່ນໆ ເຊິ່ງເປັນໝາກຜົນອັນໃຫຍ່ຫຼວງ ແລະ ສໍາຄັນຂອງການຮ່ວມມືສອງປະເທດ.
ຂ່າວ-ຮູບ: ເຢ້+ສຸວັນລີ