ເມື່ອບໍ່ດົນມານີ້, ທີ່ຕົງກວນ ສປ ຈີນ, ບໍລິສັດຫົວເຫວີຍ ໄດ້ປະກາດການເຊື່ອມຕໍ່ກັບຜູ້ຄົນຈຳນວນ 90 ລ້ານຄົນ ທີ່ອາໄສຢູ່ໃນເຂດຫາງໄກສອກຫລີກ ເກືອບ 80 ປະເທດ ຕາມຂໍ້ຜູກພັນຕໍ່ແນວຮ່ວມດີຈິຕອນ (Partner2Connect ຫລື P2C) ຂອງສະຫະພັນໂທລະຄົມມະນາຄົມສາກົນ (ITU) ເຊິ່ງເປັນສ່ວນໜຶ່ງຂອງບົດລາຍງານຄວາມຄືບໜ້າຄັ້ງທຳອິດຂອງຫົວເຫວີຍ ນັບແຕ່ໄດ້ເຂົ້າຮ່ວມ ແນວຮ່ວມມືໃນປີຜ່ານມານີ້.
ທ່ານ ຫລຽງ ຮວາ(Liang Hua) ປະທານສະພາບໍລິຫານ ບໍລິສັດຫົວເຫວີຍ ໄດ້ຖະແຫລງ ການໃນການປະຊຸມຄວາມຍືນຍົງປະຈຳປີ 2023 ໃນຫົວຂໍ້ “ເຕີບໂຕໄປພ້ອມກັບເຕັກໂນໂລຊີ ເພື່ອບັນ ລຸການພັດທະນາແບບຍືນຍົງ” ໂດຍທ່ານໄດ້ກ່າວວ່າ: ພື້ນຖານໂຄງລ່າງດີຈິຕອນ ມີຄວາມສຳຄັນຫລາຍຕໍ່ການຂັບເຄື່ອນການພັດທະນາເສດຖະກິດ-ສັງຄົມ ເປັນຕົ້ນ ການເຊື່ອມຕໍ່ ແລະ ພະລັງງານການປະ ມວນຜົນ. ຂະນະດຽວກັນ, ຄອມພິວເຕີ ກໍເປັນໂຕຊ່ວຍໃນການຂັບເຄື່ອນທີ່ສໍາຄັນ ຂອງຜະລິດຕະພັນໃນເສດຖະກິດດີຈິຕອນ ເຊິ່ງການນໍາສະເໜີໂຄງສ້າງພື້ນຖານດ້ານຄອມພິວເຕີ ຈະຊ່ວຍເລັ່ງການຫັນ ປ່ຽນທາງດີຈິຕອນ ໃນອຸດສາຫະກໍາ ແລະ ສົ່ງເສີມການເຊື່ອມໂຍງທີ່ເລິກເຊິ່ງ ລະຫວ່າງເສດຖະກິດດີຈິຕອນ ແລະ ເສດຖະກິດທີ່ແທ້ຈິງ. ສິ່ງດັ່ງກ່າວສາມາດຊຸກຍູ້ຄວາມໝັ້ນຄົງດ້ານເສດຖະກິດໂລກ ແລະ ການພັດທະນາແບບຍືນຍົງ. ຫົວເຫວີຍ ເຊື່ອໝັ້ນວ່າ ດີຈິຕອນ ແມ່ນກຸນແຈສຳຄັນຂອງນະວັດຕະກໍາເຕັກໂນໂລຊີໃນອະນາຄົດ. ເພື່ອສົ່ງເສີມການມີສ່ວນພົວພັນທາງດ້ານດີຈິຕອນ ໃຫ້ກວ້າງຂວາງຫລາຍຂຶ້ນ ແລະ ພັດທະນາຜູ້ນໍາໃນອະນາຄົດ, ບໍລິສັດຫົວເຫວີຍ ໄດ້ຮ່ວມມືກັບ ITU ເປີດໂຄງການ ITU Generation Connect ເພື່ອມອບທຶນການສຶກສາໃຫ້ກັບໄວໜຸ່ມ ເຊິ່ງຈະເປີດໃຫ້ສະໝັກໃນຕົ້ນປີໜ້າ ແລະ ຈະແກ່ຍາວເຖິງສາມປີ. ໃນແຕ່ລະປີ, ນັກວິໄສທັດໄວໜຸ່ມ 30 ຄົນ (ອາຍຸ 18-28 ປີ) ຈາກທົ່ວໂລກຈະໄດ້ຮັບການສະໜັບສະໜູນ ໃນໂຄງການເພື່ອນຳໃຊ້ເຕັກໂນໂລຊີດີຈິຕອນ ເພື່ອຊຸກຍູ້ການພັດທະນາຊຸມຊົນ.
ITU ຈະສົ່ງເສີມການເຊື່ອມຕໍ່ທີ່ມີຄວາມໝາຍ ແລະ ການປ່ຽນແປງທາງດ້ານດີຈິຕອນທົ່ວໂລກ ໂດຍໃຫ້ຄວາມສຳຄັນກັບຊຸມຊົນຫາງໄກສອກຫລີກໃນປະເທດ ແລະ ພາກພື້ນຕ່າງໆທີ່ບໍ່ມີການເຂົ້າເຖິງທາງດີຈິຕອນ. ຫົວເຫວີຍ ໄດ້ລົງນາມໃນຂໍ້ຜູກພັນລະດັບໂລກໃນປີຜ່ານມາ ໂດຍຕັ້ງເປົ້າໝາຍນຳເອົາການເຊື່ອມຕໍ່ໄປສູ່ປະຊາຊົນປະມານ 120 ລ້ານຄົນ ຢູ່ເຂດຫ່າງໄກສອກຫລີກຫລາຍກວ່າ 80 ປະເທດ ພາຍໃນປີ 2025.
