ໃນໂອກາດເດີນທາງເຂົ້າຮ່ວມງານວາງສະແດງສິນຄ້າການທ່ອງ ທ່ຽວສາກົນຈີນ ປະຈໍາປີ 2023 ທີ່ຈັດຂຶ້ນຢູ່ແຂວງຢຸນໜານ, ສປ ຈີນ. ທ່ານ ໂພສີ ແກ້ວມະນີວົງ, ຮອງລັດຖະມົນຕີກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ພົບກັບ ທ່ານ ສື ຈົງຈຸ້ນ (Shi Zhongjun) ເລຂາທິການໃຫຍ່ສູນອາຊຽນ-ຈີນ ໃນວັນທີ 17 ພະຈິກ 2023.
ໂອກາດນີ້ ທ່ານ ສື ຈົງຈຸ້ນ ໄດ້ແຈ້ງໃຫ້ຮູ້ກ່ຽວກັບພາລະບົດ ບາດຂອງສູນອາຊຽນ-ຈີນ ທີ່ໄດ້ຮັບການສ້າງຕັ້ງຂຶ້ນໃນປີ 2011 ເພື່ອຊຸກຍູ້ສົ່ງເສີມການຮ່ວມ ມືລະຫວ່າງຈີນ-ອາຊຽນໃນດ້ານການ ລົງທຶນ, ການຄ້າ, ການສຶກສາ, ວັດທະນະທໍາ ແລະ ການທ່ອງທ່ຽວ. ໃນນີ້ ສະເພາະດ້ານການທ່ອງທ່ຽວ, ໃນໄລຍະຜ່ານ ມາສູນດັ່ງກ່າວ ໄດ້ເອົາໃຈໃສ່ຫລາຍວຽກງານສໍາຄັນ ເປັນຕົ້ນແມ່ນ: ການຈັດຝຶກອົບ ຮົມດ້ານບຸກຄະລາກອນທ່ອງທ່ຽວໃຫ້ປະເທດສະມາຊິກອາຊຽນ, ລວມເຖີງຈັດຫລາຍກິດຈະກໍາສໍາຄັນເພື່ອສົ່ງເສີມການທ່ອງທ່ຽວລະຫວ່າງຈີນ- ອາຊຽນ.
ສ່ວນດ້ານວຽກງານຖະແຫລງຂ່າວ ໄດ້ຈັດຝຶກອົບຮົບເພື່ອຍົກ ລະດັບຄວາມສາມາດດ້ານສື່ມວນຊົນ ແລະ ຊຸກຍູ້ສົ່ງເສີມສື່ມວນຊົນຈີນ-ອາຊຽນ ເພື່ອແລກປ່ຽນຂໍ້ມູນຂ່າວສານ ແລະ ເອົາໃຈໃສ່ໂຄສະນາເພື່ອຊຸກຍູ້ສົ່ງເສີມການຮ່ວມມືລະຫວ່າງຈີນ- ອາຊຽນ ໃນການພັດທະ ນາເສດຖະກິດ-ສັງຄົມຂອງປະເທດ, ທັງທາງດ້ານການຄ້າ, ການລົງ ທຶນ, ການທ່ອງທ່ຽວ ແລະ ອື່ນໆ ໃຫ້ນັບມື້ກວ້າງຂວາງກວ່າເກົ່າ. ຊຶ່ງໃນອີກບໍ່ດົນນີ້ ສູນອາຊຽນ-ຈີນ ຈະເຊີນຕາງຫນ້າສື່ມວນຊົນທັງຈາກປະເທດສະທາຊິກອາຊຽນ ແລະ ຈີນ ເຂົ້າຮ່ວມປຶກສາຫາລື ແລະ ແລກປ່ຽນບົດຮຽນຮ່ວມກັນໃນດ້ານສື່ມວນຊົນເພື່ອແນໃສ່ເຮັດໃຫ້ການຮ່ວມມືໃນດ້ານນີ້ດີຂຶ້ນ ແລະ ມີປະສິດທິຜົນກວ່າເກົ່າ ເພື່ອນໍາເອົາຜົນປະໂຫຍດຕົວຈິງມາສູ່ຈີນ-ອາຊຽນ ນັບມື້ຫຼາຍຂຶ້ນໃນຕໍ່ຫນ້າ.
ເລຂາທິການໃຫຍ່ສູນອາຊຽນ-ຈີນ ໃຫ້ຮູ້ຕື່ມວ່າ: ໃນໄລຍະຜ່ານ ມາ ສູນອາຊຽນ-ຈີນ ໄດ້ປະກອບສ່ວນສໍາຄັນໃນການຊຸກຍູ້ສົ່ງເສີມການທ່ອງທ່ຽວຂອງ ສປປ ລາວ ດ້ວຍການຊ່ວຍໂຄສະ ນາເພື່ອຊຸກຍູ້ສົ່ງເສີມນັກລົງທຶນຈາກ ສປ ຈີນ ເຂົ້າໄປລົງທຶນຢູ່ ສປປ ລາວ ໃນຫລາຍຂະແຫນງການ, ໃນນັ້ນລວມເຖີງການລົງ ທຶນດ້ານການທ່ອງ ທ່ຽວ, ພ້ອມນີ້ໄດ້ສົ່ງເສີມນັກທ່ອງທ່ຽວຈີນເຂົ້າໄປທ່ອງທ່ຽວລາວ ດ້ວຍການໂຄສະນາກ່ຽວກັບບັນດາສະ ຖານທີ່ທ່ອງທ່ຽວ ແລະ ສິ່ງອໍານວຍຄວາມສະດວກໃນການທ່ອງທ່ຽວຢູ່ ສປປ ລາວ ເຮັດໃຫ້ນັກທ່ອງທ່ຽວຈີນເຂົ້າໄປທ່ອງທ່ຽວລາວເພີ່ມຂຶ້ນຢ່າງຕໍ່ເນື່ອງ. ພ້ອມນີ້ທ່ານຢືນຢັນວ່າ: ສູນອາຊຽນ-ຈີນ ຈະປະກອບສ່ວນສະຫນັບສະຫນູນຢ່າງເຕັມທີ່ຕໍ່ການເປັນປະທານອາຊຽນຂອງ ສປປ ລາວ ໃນປີ 2024 ເພື່ອໃຫ້ປະສົບຜົນສໍາເລັດຕາມຄາດຫມາຍທີ່ວາງໄວ້.
ສ່ວນ ທ່ານ ໂພສີ ແກ້ວມະນີວົງ ໄດ້ແຈ້ງໃຫ້ເລຂາທິການໃຫຍ່ສູນອາຊຽນ-ຈີນ ໄດ້ຮັບຮູ້ກ່ຽວກັບສະພາບການພັດທະນາວຽກ ງານການທ່ອງທ່ຽວຂອງ ສປປ ລາວ ທີ່ນັບມື້ດີຂຶ້ນຢ່າງຕໍ່ເນື່ອງ ທັງທາງດ້ານການພັດທະນາສະຖານທີ່ທ່ອງທ່ຽວ, ສິ່ງອໍານວຍຄວາມສະ ດວກໃຫ້ແກ່ການທ່ອງທ່ຽວ, ລວມເຖີງການພັດທະນາພື້ນຖານໂຄງລ່າງການຂົນສົ່ງ ໂດຍສະເພາະພາຍຫລັງເປີດນໍາໃຊ້ເສັ້ນທາງລົດໄຟລາວ-ຈີນໃນທ້າຍປີ 2021 ເປັນຕົ້ນມາ ເຮັດໃຫ້ການເດີນທາງຂອງນັກທ່ອງທ່ຽວຈີນໄປລາວ ແລະ ນັກທ່ອງ ທ່ຽວລາວໄປຈີນ ມີຄວາມ ສະດວກສະບາຍຫລາຍ. ລົດໄຟດັ່ງ ກ່າວ ໄດ້ນໍາເອົາຜົນປະໂຫຍດຕົວຈິງມາສູ່ສອງປະເທດລາວ-ຈີນ ແລະ ປະກອບສ່ວນສໍາຄັນເຮັດໃຫ້ແຜນຍຸດທະສາດຂອງ ສປປ ລາວ ໃນການຫັນປ່ຽນຈາກສະຖານະ ພາບຈາກປະເທດທີ່ບໍ່ມີຊາຍແດນຕິດກັບທະເລໃຫ້ກາຍເປັນປະເທດເຊື່ອມໂຍງ-ເຊື່ອມຈອດກັບປະເທດໃກ້ຄຽງ ແລະ ພາກພື້ນປະກົດຜົນເປັນຈິງ.
ທ່ານ ໂພສີ ແກ້ວມະນີວົງ ຍັງໃຫ້ຮູ້ກ່ຽວກັບການຮ່ວມມືໃນດ້ານສື່ມວນຊົນລາວ-ຈີນ ຊຶ່ງໃນໄລຍະຜ່ານມາ ຝ່າຍຈີນໄດ້ປະ ກອບສ່ວນສໍາຄັນເຂົ້າ ໃນການຍົກລະດັບຄວາມຮູ້-ຄວາມສາມາດ ກໍຄື ດ້ານວິຊາສະເພາະໃຫ້ແກ່ສື່ມວນຊົນລາວຢ່າງຕໍ່ເນື່ອງ. ກະຊວງ ຖວທ ແລະ ວິ ທະຍຸໂທລະພາບສູນ ກາງຈີນ ໄດ້ເຊັນບົດບັນທຶກການຮ່ວມມືຮ່ວມ ກັນ, ໃນນີ້ ວິທະຍຸສາກົນແຫ່ງປະເທດຈີນ ປະຈໍາລາວ ທີ່ເປີດນໍາໃຊ້ນັບແຕ່ປີ 2006 ເປັນຕົ້ນ ມາ ໄດ້ຮ່ວມມືກັບສື່ມວນຊົນລາວ ດ້ວຍການແລກປ່ຽນຂໍ້ມູນຂ່າວສານ ແລະ ຈັດກິດຈະກໍາຕ່າງໆ ຮ່ວມກັນຢ່າງຕໍ່ເນື່ອງ ເຮັດ ໃຫ້ການໂຄສະນາເພື່ອຊຸກຍູ້ສົ່ງເສີມການຮ່ວມມືຢ່າງຮອບດ້ານລະຫວ່າງລາວ-ຈີນ ນັບມື້ກວ້າງຂວາງ ແລະ ເລິກເຊິ່ງກວ່າເກົ່າ.
ຮອງລັດຖະມົນຕີ ກະຊວງຖະແຫລງຂ່າວ, ວັດທະນາ ແລະ ທ່ອງ ທ່ຽວ ຍັງໄດ້ສະເໜີໃຫ້ສູນອາຊຽນ-ຈີນ ສືບຕໍ່ຊຸກຍູ້ສົ່ງເສີມ ສປປ ລາວ ຢ່າງຕໍ່ເນື່ອງ ແລະ ຊ່ວຍຊຸກຍູ້ສົ່ງເສີມນັກລົງທຶນຈາກ ສປ ຈີນເຂົ້າໄປລົງທຶນຢູ່ ສປປ ລາວ, ທັງການລົງທຶນດ້ານການທ່ອງທ່ຽວ ກໍຄື ການລົງທຶນດ້ານຕ່າງໆ ໃຫ້ນັບມື້ຫຼາຍຂຶ້ນກວ່າເກົ່າ, ພ້ອມທັງສົ່ງເສີມນັກທ່ອງທ່ຽວຈີນ ເຂົ້າໄປທ່ອງທ່ຽວລາວໃນໂອກາດປີທ່ອງທ່ຽວລາວ 2024 ກໍຄື ໃນຕໍ່ຫນ້າໃຫ້ນັບມື້ເປັນຂະບວນຟົດຟື້ນກວ່າເກົ່າ.
