ສປປ ລາວ ມີຄວາມກ້າວໜ້າໃນວຽກສຸຂາພິບານ ທີ່ມຸ່ງການບັນລຸສະຖານະພາບຢຸດຕິການຖ່າຍຊະຊາຍພາຍໃນປີ 2025 ສປປ ລາວ ມີຜົນສຳເລັດອັນພົ້ນເດັ່ນທີ່ບັນລຸໄດ້ໃນໄລຍະ 2 ທົດສະວັດຜ່ານມາ ເຊິ່ງເຫັນວ່າ ໃນທົ່ວປະເທດໄດ້ເພີ່ມການເຂົ້າເຖິງວິດຖາຍໂດຍພື້ນຖານຈາກ 26% ເປັນ 80% ແລະ ໄດ້ເຮັດໃຫ້ອັດຕາການຖ່າຍຊະຊາຍ ຫຼຸດລົງຈາກ 62% ເປັນ 16% ໃນໄລຍະຊ່ວງປີ 2000 – 2020.
ສປປ ລາວ ໄດ້ປະກາດໃຫ້ສາມແຂວງເປັນແຂວງຢຸດຕິການຖ່າຍຊະຊາຍຄື: ບໍລິຄຳໄຊ, ນະຄອນຫຼວງວຽງຈັນ ແລະ ແຂວງວຽງຈັນ ໂດຍມີການເຄື່ອນໄຫວທີ່ດີໃນຫຼາຍແຂວງ ເຊິ່ງສາມາດບັນລຸເປົ້າໝາຍສຸຂາພິບານໄດ້. ເພື່ອເລັ່ງການປ່ຽນແປງພຶດຕິກຳດ້ານສຸຂາພິບານ, ກະຊວງສາທາລະນະສຸກ ໂດຍການສະໜັບສະໜູນຈາກອົງການຢູນີເຊັບ ໄດ້ສ້າງແຜນປະຕິບັດເພື່ອບັນລຸສະຖານະຢຸດຕິການຖ່າຍຊະຊາຍແຫ່ງຊາດໃນປີ 2025 ໂດຍເນັ້ນໃສ່ຄອບຄົວທີ່ຍັງເຫຼືອສຸດທ້າຍ. ໃນໂອກາດເຜີຍແຜ່ ແຜນປະຕິບັດເພື່ອຢຸດຕິການຖ່າຍຊະຊາຍ ເຊິ່ງໄດ້ຈັດຂຶ້ນຢູ່ນະຄອນຫຼວງວຽງຈັນ ໃນວັນທີ 1 ພະຈິກ 2023, ທ່ານ ປອ ດຣ. ບຸນແຝງ ພູມມາໄລສິດ, ລັດຖະມົນຕີກະຊວງສາທາລະນະສຸກ ໄດ້ມີຄໍາເຫັນວ່າ: “ພວກເຮົາສາມາດຈັດຕັ້ງປະຕິບັດວິທີການຊຸມຊົນເປັນເຈົ້າການດ້ານສຸຂານາໄມ ໃນ ສປປ ລາວ ເຮັດໃຫ້ເກີດມີຜົນປະໂຫຍດດ້ານສຸຂາພິບານຢ່າງຫຼວງຫຼາຍໃນທົ່ວປະເທດ. ທ່ານກ່າວຕື່ມວ່າ: “ຂ້າພະເຈົ້າມີຄວາມພາກພູມໃຈທີ່ໄດ້ເຫັນບັນດາຜົນງານທີ່ບັນລຸໄດ້ໃນ 3 ແຂວງ, 75 ເມືອງ ແລະ 7.248 ບ້ານ ແຕ່ພວກເຮົາຍັງຕ້ອງໄດ້ສືບຕໍ່ລະດົມຊຸມຊົນ ແລະ ຮັບປະກັນໃຫ້ທຸກຄອບຄົວ ໂດຍສະເພາະຜູ້ທຸກຍາກ ແລະ ຜູ້ດ້ອຍໂອກາດສາມາດເຂົ້າເຖິງວິດຖ່າຍໄດ້”. ການຂາດສຸຂາພິບານທີ່ດີເຮັດໃຫ້ເດັກນ້ອຍມີຄວາມສ່ຽງຕໍ່ການເປັນພະຍາດໃນໄວເດັກ ແລະ ການຂາດສານອາຫານ ທີ່ສາມາດສົ່ງຜົນກະທົບຕໍ່ການພັດທະນາໂດຍລວມຂອງເຂົາເຈົ້າ, ດ້ານການຮຽນຮູ້ ແລະ ໂອກາດທາງເສດຖະກິດໃນອານາຄົດ.
ດັ່ງນັ້ນ ຈຶ່ງມີຄວາມຈໍາເປັນຕ້ອງຢຸດຕິການຖ່າຍຊະຊາຍ ເຊິ່ງເປັນບາດກ້າວທຳອິດເພື່ອບັນລຸດ້ານສຸຂານາໄມ, ຄວບຄຸມການແຜ່ລະບາດຂອງພະຍາດ ແລະ ເພີ່ມທະວີການຮັກສາກຽດສັກສີ, ຄວາມເປັນສ່ວນຕົວ ແລະ ຄວາມປອດໄພຂອງແມ່ຍິງ ແລະ ເດັກຍິງ.ໃນແຕ່ລະປີ ເດັກນ້ອຍລາວ ອາຍຸຕ່ຳກວ່າ 5 ປີ ປະມານ 700 ຄົນ ເສຍຊີວິດ ຍ້ອນພະຍາດຖອກທ້ອງ ແລະ ເດັກນ້ອຍ 1 ໃນ 3 ໃນປະເທດ ຂາດສານອາຫານຊໍ້າເຮື້ອເຮັດໃຫ້ເດັກເຕ້ຍ. ວຽກສຸຂາພິບານ, ການອະນາໄມ ແລະ ນໍ້າດື່ມທີ່ປອດໄພ ຈະຊ່ວຍຫຼຸດຜ່ອນການຂາດສານອາຫານ ແລະ ເດັກເຕ້ຍ ໂດຍການປ້ອງກັນຈາກພະຍາດທີ່ພົວພັນກັບນໍ້າ ແລະ ຜົນກະທົບຕໍ່ພັດທະນາການຂອງລໍາໄສ້ ເພື່ອໃຫ້ເດັກສາມາດຢູ່ລອດ ແລະ ຈະເລີນເຕີບໂຕ.ທ່ານ ດຣ. ເພຍ ຣີເບໂລ ບຣິດໂຕ ກ່າວວ່າ “ການລົງທຶນຢ່າງຕໍ່ເນື່ອງໃນການບໍລິການສຸຂາພິບານໂດຍຄົວເຮືອນ, ຊຸມຊົນແລະ ລັດຖະບານແມ່ນມີຄວາມຈໍາເປັນເພື່ອປ່ຽນແປງພຶດຕິກໍາຂອງຊຸມຊົນໃຫ້ “ທຸກຄົນນໍາໃຊ້ວິດຖ່າຍ” ກາຍເປັນມາດຕະຖານໃຫມ່ຂອງສັງຄົມ. ທ່ານກ່າວຕື່ມວ່າ “ເນື່ອງໃນໂອກາດ ສະເຫຼີມສະຫຼອງການຮ່ວມມື ກັບລັດຖະບານລາວ ອົງການຢູນີເຊັບ ມີຄວາມມຸ່ງຫມັ້ນສະຫນັບສະຫນູນລັດຖະບານ ໃຫ້ບັນລຸສະຖານະພາບຢຸດຕິການຖ່າຍຊະຊາຍ ໃນປີ 2025 ເພື່ອໃຫ້ເດັກນ້ອຍທຸກໆຄົນໄດ້ຮັບຜົນປະໂຫຍດ. ພວກເຮົາຈຶ່ງຮຽກຮ້ອງໃຫ້ຄູ່ຮ່ວມງານທັງຫມົດເລັ່ງຄວາມພະຍາຍາມເພື່ອບັນລຸເປົ້າຫມາຍສຸຂາພິບານໃຫ້ໄດ້”.
