ແຫລ່ງຂ່າວຈາກ ແຂວງຜົ້ງສາລີ ໃຫ້ຮູ້ວ່າ: ປັດຈຸບັນ, ກະສິກອນພາຍໃນເມືອງ ຍອດອູ ກຳລັງຂຸ້ນຂ້ຽວ, ສຸມໃສ່ເກັບກ່ຽວ, ມ້ຽນມັດຜົນຜະລິດເຂົ້ານາປີ ໂດຍໄດ້ເລີ່ມເກັບກູ້ກ່ຽວມາແຕ່ທ້າຍເດືອນສິງຫາ 2023 ເປັນຕົ້ນມາ, ຮອດປັດຈຸບັນ ສຳເລັດແລ້ວ 35% ໂດຍສະເພາະແມ່ນຢູ່ເຂດບ້ານ ລານຕຸ້ຍ, ແຊວຈ້າຍ ແລະ ຢູ່ເທສະບານເມືອງ ເນື້ອທີ່ເກັບກ່ຽວສຳເລັດ 384,94 ເຮັກຕາ.
ຕາມການລາຍງານຂອງ ທ່ານ ຄຳສະຫວັນ ພົມມະເທດ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຍອດອູ ໃຫ້ຮູ້ວ່າ: ປີ 2023 ນີ້, ການຜະລິດກະສິກໍາຢູ່ພາຍໃນເມືອງຍອດອູ ແມ່ນເປັນຂະບວນຟົດຟື້ນພໍສົມຄວນ, ທົ່ວເມືອງມີເນື້ອທີ່ແຜນການປັກດຳນາປີທັງໝົດ 9.592,28 ເຮັກຕາ, ປະຕິບັດຕົວຈິງໄດ້ 2.566,28 ເຮັກຕາ ເທົ່າກັບ 98,99%. ໃນນີ້, ເນື້ອທີ່ນາຫັນເປັນດິນປະເພດອື່ນ 1,8 ເຮັກ ຕາ ແລະ ມີເນື້ອທີ່ນາຂະຫຍາຍໃໝ່ 2,20 ເຮັກຕາ, ປູກພືດເປັນສະບຽງອາຫານມີ: ປູກສາລີແຂງ 812,08 ເຮັກຕາ, ສາລີຫວານ 338 ເຮັກຕາ, ຫອມບົວ 1,81 ເຮັກຕາ ແລະ ພືດຜັກ 340,80 ເຮັກຕາ, ປູກພືດ ແລະ ຕົ້ນໄມ້ອຸດສາຫະກຳຕາມທ່າແຮງພາຍໃນເມືອງປະກອບມີ ໝາກແໜ່ງກວາງຕຸງ ເນື້ອທີ່ເກັບກ່ຽວ 1.567,89 ເຮັກຕາ, ຜົນຜະລິດໄດ້ 478,72 ໂຕນ, ຢາງພາລາ ເນື້ອທີ່ເກັບກ່ຽວໄດ້ 2.573,44 ເຮັກຕາ, ຜົນຜະລິດສົ່ງອອກ 650 ໂຕນ. ພ້ອມນີ້, ຍັງໄດ້ສົ່ງເສີມປູກຊາ ເນື້ອທີ່ເກັບກ່ຽວ 368,90 ເຮັກຕາ, ສົ່ງອອກ 145 ໂຕນ, ຊາປ່າ ຜະລິດໄດ້ 443,90 ໂຕນ, ຜົນຜະລິດແຫ້ງ 88,78 ໂຕນ, ສົ່ງອອກ 85,78 ໂຕນ; ສົ່ງເສີມປູກກາເຟ: ເນື້ອທີ່ 31,52 ເຮັກຕາ, ຜົນຜະລິດສົ່ງອອກ 23,32 ໂຕນ; ສົ່ງເສີມປຸກອ້ອຍ: ເນື້ອທີ່ເກັບກ່ຽວ 1.500 ກວ່າເຮັກຕາ, ຜົນຜະລິດສົ່ງອອກ 50 ກວ່າໂຕນ;ສົ່ງເສີມປຸກກ້ວຍ: ເນື້ອທີ່ເກັບກ່ຽວ 443 ເຮັກຕາ, ສົ່ງອອກ 11.480 ໂຕນ ແລະ ປູກໄມ້ໃຫ້ໝາກເນື້ອທີ່ເກັບກ່ຽວ 76,13 ເຮັກຕາ, ຜົນຜະລິດ 208,52 ໂຕນ.
ຄຽງຄູ່ກັບການປູກພືດເປັນສິນຄ້າ, ກະສິກອນພາຍໃນເມືອງຍອດອູ ຍັງໄດ້ສຸມໃສ່ລ້ຽງສັດໃຫຍ່ ແລະ ສັດນ້ອຍເປັນສິນຄ້າ ເປັນຕົ້ນ ລ້ຽງງົວ, ຄວາຍ, ແບ້, ໝູ, ປາ ແລະ ສັດປີກຈຳນວນໜຶ່ງ. ປັດຈຸບັນ, ການລ້ຽງງົວ, ຄວາຍ ກຳລັງເປັນໜໍ່ແໜງ ລິເລີ່ມເປັນສິນຄ້າ ແລະ ທ່ວງທ່າຂະຫຍາຍຕົວ, ໃນນີ້ ມີຄວາຍ 8.470 ໂຕ, ງົວ 5.025 ໂຕ, ແບ້ 3.040 ໂຕ, ໝູ 26.497 ໂຕ, ສັດປີກ 520.963 ໂຕ, ມີໜອງປາທັງໝົດ 349 ໜອງມີເນື້ອທີ່ 78,23 ເຮັກຕາ ປ່ອຍປາທັງໝົດ 2.346.900 ໂຕຜົນຜະລິດປາໄດ້ 469,28 ໂຕນ.
ໃນຂະນະດຽວກັນ, ກະສິກອນພາຍໃນເມືອງຍອດອູ ບາງເຂດກໍໄດ້ພົບກັບບັນຫາການສົ່ງອອກສິນຄ້າ ຂອງຜູ້ປະກອບການ ເນື່ອງຈາກສະພາບການລະບາດຂອງພະຍາດໂຄວິດ-19 ແລະ ບັນຫາການລະບາດຂອງພະຍາດສັດຕາມລະດູການ ຄື: ພະຍາດຜິວໜັງອັກເສບ ທີ່ເກີດຂື້ນກັບງົວ-ຄວາຍ ເຮັດໃຫ້ສັດລ້ຽງຂອງປະຊາຊົນຕາຍ ສົ່ງຜົນກະທົບຕໍ່ຜູ້ປະກອບການໂຮງຂ້າສັດ ແລະ ຜູ້ບໍລິໂພກ, ການລະບາດຂອງສັດຕູພືດທຳລາຍຜົນລະປູກ, ໜູ, ບົ້ງ ແລະ ຕັກແຕນຝູງໄມ້ປ່ອງ ທຳລາຍເຂົ້າໄຮ່ເຂດເນີນສູງ, ເຂົ້ານາ ແລະ ສາລີຂອງກະສິກອນຢູພາຍໃນເມືອງ. ຕໍ່ກັບເຫດການດັ່ງກ່າວ, ຫ້ອງການກະສິກຳ ແລະ ປ່າໄມ້ ເມືອງຍອດອູ ໄດ້ສົມທົບກັບພາກສ່ວນທີ່ກ່ຽວຂ້ອງ ແລະ ປະຊາຊົນສຸມໃສ່ແກ້ໄຂເຮັດໃຫ້ການຜະລິດຂອງກະສິກອນກັບຄືນສູ່ສະພາບປົກກະຕິ ໂດຍລວມແລ້ວຄາດວ່າຜົນຜະລິດທົ່ວເມືອງ ຍອດອູ ປີນີ້ຈະໄດ້ຮັບຜົນດີ ເນື່ອງຈາກສະພາບດິນຟ້າອາກາດເອື້ອອຳນວຍ.
