ສູນສະຖານປະກອບການຄູ່ຮ່ວມງານ ສະພາການຄ້າ ແລະ ອຸດສາຫະກຳແຫ່ງຊາດ ຈັດພິທີຖະແຫຼງຂ່າວການອອກໃບຢັ້ງຢືນໃຫ້ສະຖານປະກອບການຄູ່ຮ່ວມງານອາຊີວະສຶກສາແບບຄວບຄູ່ (ອສຄ) ຂຶ້ນໃນວັນທີ 21 ກັນຍາ ນີ້ ທີ່ສະພາການຄ້າ ແລະ ອຸດສາຫະກຳແຫ່ງຊາດ (ສຄອຊ) ເປັນກຽດຖະແຫຼງໂດຍ ທ່ານ ໄຊບັນດິດ ຣາຊະພົນ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດ ມີຜູ້ປະກອບການສະຖາບັນການສຶກສາ ແລະ ຂະແໜງການກ່ຽວຂ້ອງເຂົ້າຮ່ວມ.
ທ່ານ ໄຊບັນດິດ ຣາຊະພົນ ກ່າວວ່າ: ການປະຕິຮູບວຽກງານອາຊີວະສຶກສາ ແລະ ຝຶກອົບຮົມວິຊາຊີບໂດຍການນໍາສະເໜີຮູບແບບອາຊີວະສຶກສາແບບຄວບຄູ່ໄດ້ສະແດງໃຫ້ເຫັນເຖິງທ່າແຮງໃນການຈັດການ ແກ້ໄຂການຂາດເຂີນແຮງງານທີ່ມີທັກສະໃນປະເທດ ເມື່ອພາກລັດ ແລະ ພາກທຸລະກິດຮ່ວມມືກັນ ແລະ ເຮັດວຽກຮ່ວມກັນຢ່າງໃກ້ຊິດ. ສະນັ້ນ; ອາຊີວະສຶກສາ ແລະ ຝຶກອົບຮົມວິຊາຊີບຕ້ອງມີຄວາມຮັບຜິດຊອບຮ່ວມກັນລະຫວ່າງສອງຝ່າຍ ຄວາມມຸ່ງໝັ້ນຕັ້ງໃຈຂອງ ສຄອຊ ທີ່ມີຕໍ່ວຽກງານອາຊີວະສຶກສາ ແລະ ອົບຮົມວິຊາຊີບແມ່ນສະທ້ອນໃຫ້ເຫັນໄດ້ດີໃນແຜນພັດທະນາ 5 ປີ ທີ່ໄດ້ນຳເອົາວຽກງານອາຊີວະສຶກສາມາເປັນບຸລິມະສິດ ແລະ ໄດ້ບັນຈຸເຂົ້າໃນແຜນຍຸດທະສາດ ດັ່ງນັ້ນ ສຄອຊ ໄດ້ຕັດສິນໃຈສ້າງສູນບໍລິການອາຊີວະສຶກສາແບບຄວບຄູ່ຂຶ້ນໂດຍໄດ້ຮັບການສະໜັບສະໜູນຈາກ GIZ-VELA ສູນບໍລິການອາຊີວະສຶກສາແບບຄວບຄູ່, ມີເປົ້າໝາຍເພື່ອເສີມສ້າງຄວາມເຂັ້ມແຂງໃຫ້ ອສຄ ຜ່ານການບໍລິການທີ່ຫຼາກຫຼາຍກ່ຽວຂ້ອງກັບການສະໜັບສະໜູນ ສົ່ງເສີມ ແລະ ໂຄສະນາຮູບແບບອາຊີວະສຶກສາແບບຄວບຄູ່ ໂດຍມີ 6 ການບໍລິການຫຼັກຄື: ການສະໜອງປ່ອງບໍລິການປະຕູດຽວ ການຝຶກອົບຮົມ ການຢັ້ງຢືນ ການຮ່ວມຈັດງານຕ່າງໆທີ່ກ່ຽວກັບອາຊີວະສຶກສາແບບຄວບຄູ່ ການສົ່ງເສີມ ແລະ ສົນທະນາລະຫວ່າງພາກລັດ ແລະ ພາກທຸລະກິດ ແລະ ການໂຄສະນາ ແລະ ຍ້ອງຍໍ.
ການອອກໃບຢັ້ງຢືນ “ສະຖານປະກອບການທີ່ເປັນຄູ່ຮ່ວມງານ ອສຄ” ແມ່ນເພື່ອຮັບຮູ້ ເຫັນຄຸນຄ່າ ແລະ ສົ່ງເສີມບົດບາດຂອງສະຖານປະກອບການໃນການສ້າງກໍາລັງແຮງງານຜ່ານທາງວຸດທິ ມີຄວາມສາມາດທີ່ເໝາະສົມໃນການເຮັດວຽກ ແລະ ປະກອບອາຊີບ ການຮັບຮອງຈະຕ້ອງປະກອບດ້ວຍເຄື່ອງໝາຍສັນຍາລັກ (Seal) ແລະ ໃບຢັ້ງຢືນການຮັບຮູ້ (Certificate of Acknowledgment) ແລະ ສະຕິກເກີ້ ສຄອຊ ຈະຢັ້ງຢືນການເຂົ້າຮ່ວມ ອສຄ ຂອງສະຖານປະກອບການຂອງທ່ານໂດຍບໍ່ເສຍຄ່າໃນເບື້ອງຕົ້ນ ແລະ ເກນການຮັບຮອງຢັ້ງຢືນກໍຍັງຢູ່ໃນລະດັບຂັ້ນພື້ນຖານເຊັ່ນ: ເປັນສະຖານປະກອບການທີ່ຂຶ້ນຖະບຽນຖືກຕ້ອງຕາມລະບຽບກົດໝາຍຂອງ ສປປ ລາວ ມີນັກຮຽນ ອສຄ ຢ່າງນ້ອຍ 2 ຄົນ ທີ່ຜ່ານການຝຶກປະຕິບັດໃນໄລຍະໜຶ່ງປີຜ່ານມາ ຫຼື ກໍາລັງຝຶກປະຕິບັດຢູ່ມີຄູຝຶກຂອງສະຖານປະກອບການທີ່ມີຄຸນວຸດທິ ຫຼື ຜ່ານການຝຶກອົບຮົມຢ່າງນ້ອຍ 2 ຄົນ ມີການຕົກລົງຮ່ວມມືຮູບແບບຕ່າງໆລະຫວ່າງສະຖານປະກອບການ ແລະ ສະຖານການສຶກສາ ມີສິ່ງອໍານວຍຄວາມສະດວກໃນການຝຶກປະຕິບັດ ແລະ ຄວາມສາມາດໃນການຝຶກອົບຮົມມີພຽງພໍ (ສະຖານທີ່ເຮັດວຽກ ບຸກຄະລາກອນຝຶກສອນທີ່ມີວຸດທິ ແລະ ຄຸນສົມບັດທີ່ເໝາະສົມ ແລະ ມີປະສົບການ) ຕາມຂໍ້ກໍານົດການຝຶກພາກປະຕິບັດຕາມໜ່ວຍຄວາມສາມາດ.
ໃນພິທີຖະແຫຼງຂ່າວດັ່ງກ່າວ ຍັງໄດ້ແລກປ່ຽນຄຳຄິດຄຳເຫັນ ຢ່າງກົງໄປກົງມາ ແລະ ທ່ານຍັງໄດ້ເຊີນຊວນບັນດາທ່ານ, ສະຖານປະກອບການເຂົ້າມາມີສ່ວນຮ່ວມ ໃນການສະໜັບສະໜູນວຽກງານອາຊີວະສຶກສາແບບຄວບຄູ່ໃຫ້ຫຼາຍຂຶ້ນ.
(ຂ່າວ-ພາບ: ພັດ ລໍວັນໄຊ)
