ການສົ່ງເສີມການຜະລິດກະສິກຳເປັນສິນຄ້າ ເພື່ອສະໜອງແກ່ພາຍໃນ ແລະ ສົ່ງອອກເພື່ອນໍາເຂົ້າເງິນຕາຕ່າງປະເທດມາ ສປປ ລາວ ແມ່ນໜຶ່ງໃນມາດຕະການໃນການແກ້ໄຂບັນຫາເສດຖະກິດ-ການເງິນ ທີ່ເປັນວາລະແຫ່ງຊາດຂອງປະເທດເຮົາ ຊຶ່ງຜ່ານມາລັດຖະບານ ກໍຄື ກະຊວງກະສິກຳ ແລະ ປ່າໄມ້ ໄດ້ເອົາໃຈໃສ່ຊຸກຍູ້ປະຊາຊົນ ແລະ ບໍລິສັດທີ່ກ່ຽວຂ້ອງ ຜະລິດກະສິກຳເປັນສິນຄ້າ, ຄຽງຄູ່ກັນ ກໍສຸມໃສ່ເຈລະຈາເພື່ອເປີດຕະຫຼາດກັບຄູ່ຄ້າ ລວມທັງການເຈລະຈາ ຊ່ວຍແກ້ໄຂບັນຫາຂໍ້ຫຍຸ້ງຍາກໃນການສົ່ງອອກ.
ໃນວາລະກອງປະຊຸມພົບປະ ລະຫວ່າງນາຍົກລັດຖະມົນຕີ ແລະ ຜູ້ປະກອບການຂະແໜງກະສິກຳ ແລະ ປ່າໄມ້ ຄັ້ງທີ 1 ຊຶ່ງໄດ້ຈັດຂຶ້ນເມື່ອກາງເດືອນກັນຍາຜ່ານມາ, ທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະ ປ່າໄມ້ ລາຍງານວ່າ: ລັດຖະບານ ໄດ້ຊຸກຍູ້ການຜະລິດກະສິກໍາເປັນສິນຄ້າ ເປັນຕົ້ນ ດ້ານການປູກຝັງ ປະຕິບັດໄດ້ ສະເລ່ຍ 7,46 ລ້ານໂຕນ/ປີ, ການລ້ຽງສັດ ແລະ ການປະມົງ ມາຮອດປັດຈຸບັນ, ມີຟາມລ້ຽງສັດທັງໝົດ 2.252 ຟາມ ມີສັດລ້ຽງ 5,62 ລ້ານກວ່າໂຕ, ດ້ານປ່າໄມ້ ໄດ້ສົ່ງເສີມປູກໄມ້ເປັນສິນຄ້າ ປະຕິບັດໄດ້ 65.600 ເຮັກຕາ, ສະໜອງໄມ້ປູກພາຍໃນ ໃຫ້ບັນດາໂຮງງານ ໄດ້ 450.000 ແມັດກ້ອນ.
ພ້ອມດຽວກັນນີ້, ກໍໄດ້ສຸມໃສ່ການເຈລະຈາດ້ານສຸຂານາໄມພືດ-ສັດ ເພື່ອເປີດຕະຫຼາດ ກັບປະເທດຄູ່ຄ້າໄດ້ແລ້ວ 48 ລາຍການ. ໃນນັ້ນ, ສປ ຈີນ ມີຈໍານວນ 16 ພືດ ແລະ 1 ສັດໃຫຍ່ (ເຂົ້າສານ, ສາລີແຂງ, ມັນຕົ້ນ, ກ້ວຍ, ໝາກໂມ, ມັນດ້າງ, ຖົ່ວເບີ, ຖົ່ວຍາວ, ຖົ່ວເຫຼືອງຝັກສົດ, ໝາກນອດສົດ, ໝາກກ້ຽງເປືອກໜາ, ໝາກພຸກ ແລະ ໝາກນາວເຫຼືອງ, ຢາຫົວ, ເຄືອແດງດ່າງ, ໃບຢາສູບແຫ້ງ ແລະ ສັດໃຫຍ່: ງົວ-ຄວາຍ); ສສ ຫວຽດນາມ: ຈໍານວນ 16 ພືດ (ສາລີ, ມັນຕົ້ນ, ໝາກກ້ວຍ, ເຂົ້າສານ, ຫົວກະລົດ, ຫົວຜັກບົວ ໃຫຍ່, ຫຍ້າເນເປຍ, ໝາກມັງກອນ, ໝາກນອດ, ໝາກກ້ຽງຂຽວ, ໝາກມ່ວງ, ໝາກກ້ຽງນ້ອຍ, ໝາກພຸກ, ໝາກມີ້, ຜັກກາດຂາວ ແລະ ຜັກສະລັດ); ປະເທດ ໄທ: ຈໍານວນ 15 ພືດ (ສາລີ, ແກນສາລີ, ໝາກເລັ່ນ, ຢາສູບເສັ້ນແຫ້ງ, ໝາກກ້ຽງ, ໝາກກ້ວຍນໍ້າ, ມັນຝຣັ່ງ, ໝາກຫຸ່ງ, ໝາກນອດ, ມັນຕົ້ນ (ເສັ້ນ ແລະ ແປ້ງ), ໝາກຖົ່ວດິນ, ໝາກເຍົາ, ໝາກເຜັດ, ໃບຢາສູບແຫ້ງ, ພືດຜັກສົດຕາມສັນຍາ.
ການຊຸກຍູ້ສົ່ງເສີມການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ໃນຂະແໜງກະສິ ກໍາ ແລະ ປ່າໄມ້ ທົ່ວປະເທດມີທັງໝົດ 2.065 ບໍລິສັດ. ໃນນັ້ນ, ການລົງທຶນພາຍໃນ 1.434 ບໍລິສັດ ຕ່າງປະເທດ 593 ບໍລິສັດ ແລະ ຮ່ວມທຶນພາຍໃນ ກັບ ຕ່າງປະເທດ 38 ບໍລິສັດ. ມີມູນຄ່າການລົງທຶນທັງໝົດ 5,53 ຕື້ໂດລາ, ທຶນຈົດທະບຽນ 3,77 ຕື້ໂດລາ, ມີເນື້ອທີ່ດິນສໍາປະທານ ປະມານ 407.075 ເຮັກຕາ ແລະ ສົ່ງເສີມປະຊາຊົນປະມານ 91.646 ເຮັກຕາ. ບໍລິສັດສົ່ງອອກສິນຄ້າໄປ ສປ ຈີນ ໃນ ປີ 2023 ມີ 233 ຫົວໜ່ວຍ ຊຶ່ງໃນນັ້ນມີ ບໍລິສັດສົ່ງອອກ ເຂົ້າ 2 ຫົວໜ່ວຍ, ມັນດ້າງ 8 ຫົວໜ່ວຍ, ສາລີ 28 ຫົວໜ່ວຍ, ມັນຕົ້ນ 33 ຫົວໜ່ວຍ, ກ້ວຍ 44 ຫົວໜ່ວຍ, ໝາກໂມ 28 ຫົວໜ່ວຍ, ໝາກນາວ 18 ຫົວໜ່ວຍ, ໝາກນອດ 22 ຫົວໜ່ວຍ, ພືດຕະກຸນຖົ່ວ 2 ຫົວໜ່ວຍ, ໝາກອຶ-ໝາກໂຕ່ນ 9 ຫົວໜ່ວຍ, ໝາກພຸກ 12 ຫົວໜ່ວຍ, ຢາຫົວເຄືອແດງດ່າງ 20 ຫົວຫນ່ວຍ ແລະ ແປ້ງມັນຕົ້ນ 7 ຫົວໜ່ວຍ. ໃນ 2.065 ບໍລິສັດ ຈັດແບ່ງອອກເປັນ ໂຄງການປູກຝັງ ມີທັງໝົດ 861 ໂຄງການ, ໂຄງການ ລ້ຽງສັດ 534 ໂຄງການ ແລະ ໂຄງການປ່າໄມ້ 670 ໂຄງການ.
ຈາກການຊຸກຍູ້ສົ່ງເສີມການຜະລິດ ເຮັດໃຫ້ມີສິນຄ້າກະສິກໍາ ແລະ ປ່າໄມ້ ສົ່ງອອກຕ່າງປະເທດ ໃນປີ 2022 ທັງໝົດ 1.733,11 ລ້ານໂດລາ; ໃນນັ້ນ, ພືດ 855,31 ລ້ານໂດລາ, ສັດ 80,93 ລ້ານ ໂດລາ ແລະ ຜະລິດຕະພັນໄມ້ 796,87 ລ້ານໂດລາ ຊຶ່ງສິນຄ້າທີ່ສົ່ງອອກສ່ວນຫຼາຍ ປະກອບມີ: ຢາງພາລາ 407.112 ໂຕນ, ມູນຄ່າ 386,46 ລ້ານໂດລາ; ໝາກກ້ວຍ 908.777 ໂຕນ, ມູນຄ່າ 246,39 ລ້ານໂດລາ; ມັນຕົ້ນແຫ້ງ 1.679.312 ໂຕນ, ມູນຄ່າ 236,98 ລ້ານໂດລາ; ແປ້ງມັນຕົ້ນ 197.723 ໂຕນ, ມູນຄ່າ 78,02 ລ້ານໂດລາ; ກາເຟ 26.911 ໂຕນ, ມູນຄ່າ 71,78 ລ້ານໂດລາ; ສາລີ 190.315 ໂຕນ, ມູນຄ່າ 46,19 ລ້ານໂດລາ; ໝາກໂມ 116.371 ໂຕນ, ມູນຄ່າ 31,75 ລ້ານໂດລາ; ອ້ອຍ 265.216 ໂຕນ, ມູນຄ່າ 13,97 ລ້ານໂດລາ ແລະ ອື່ນໆ.
ສໍາລັບ 6 ເດືອນຕົ້ນປີນີ້, ປະຕິບັດໄດ້ 901,72 ລ້ານກວ່າໂດລາ ຊຶ່ງໃນນັ້ນ ພືດ 736 ລ້ານໂດລາ, ສັດ 0,76 ລ້ານໂດລາ ແລະ ຜະລິດຕະພັນໄມ້ 164,96 ລ້ານໂດລາ. ສິນຄ້າທີ່ພົ້ນເດັ່ນໃນການສົ່ງອອກມີ: ມັນຕົ້ນ (ດິບ, ແຫ້ງ, ແປງມັນຕົ້ນ) 408,14 ລ້ານໂດລາ, ໝາກກ້ວຍ 136,67 ລ້ານໂດລາ, ເຍື່ອໄມ້ 106,87 ລ້ານໂດລາ, ຢາງພາລາ 58,08 ລ້ານໂດລາ, ກາເຟ 40,31 ລ້ານໂດລາ ແລະ ອື່ນໆ. ກ່ຽວກັບການສົ່ງອອກສັດໃນໄລຍະຜ່ານມາ, ນອກຈາກທີ່ລາຍງານໂຕເລກສົ່ງອອກສັດ ຢ່າງເປັນ ທາງການ ຄືດັ່ງຂ້າງເທິງນັ້ນ, ຍັງມີການຄ້າຂາຍສັດກັບ ສປ ຈີນ ແລະ ສສ ຫວຽດນາມ ທີ່ບໍ່ເປັນທາງການ ຕາມຊາຍແດນເຂດພາກເໜືອ ຄື: ແຂວງຜົ້ງສາລີ, ແຂວງຫົວພັນ ແລະ ແຂວງຊຽງຂວາງ ປະມານ 70.000 ໂຕຕໍ່ປີ.
ສະຫຼຸບລວມແລ້ວ ເຫັນໄດ້ວ່າ ລັດຖະບານເຮົາໄດ້ຊຸກຍູ້ສົ່ງເສີມການຜະລິດກະສິກຳເປັນສິນຄ້າດ້ວຍຄວາມເອົາໃຈໃສ່ ຊຶ່ງສະແດງອອກຕາມໂຕເລກ ທີ່ເປັນສະຖິຕິຂ້າງເທິງ ຊຶ່ງເປັນການສະແດງເຖິງຄວາມພະຍາຍາມຂອງພາກລັດ ເພື່ອຊຸກຍຸ້ສົ່ງເສີມໃຫ້ທຸກພາກສ່ວນມີສ່ວນຮ່ວມ ເພື່ອຜະລິດກະສິກຳເປັນສິນຄ້າ ຮັບປະກັນການຄໍ້າປະກັນດ້ານສະບຽງອາຫານ, ມີແຮໄວ້ ແລະ ສົ່ງອອກນໍາເງິນຕາຕ່າງປະເທດ ເຂົ້າມາປະເທດເຮົາໃຫ້ຫຼາຍຂຶ້ນ ຢ່າງເປັນລະບົບ ເພື່ອປະກອບສ່ວນແກ້ໄຂບັນບັນຫາເສດຖະກິດ-ການເງິນ ຢ່າງຈິງຈັງ ເຮັດໃຫ້ປະເທດຊາດຜ່ານຜ່າຄວາມຫຍຸ້ງຍາກ ສືບຕໍ່ພັດທະນາເສດຖະກິດ-ສັງຄົມ ໃຫ້ບັນລຸຕາມແຜນການທີ່ວາງໄວ້.
ໂດຍ: ສ.ບຸດປະຊາ
