ກອງປະຊຸມຊີ້ນຳລະດັບຊາດກະກຽມຄວາມພ້ອມເປີດປີທ່ອງທ່ຽວລາວ 2024 ໄດ້ຈັດຂຶ້ນໃນວັນທີ 22 ກັນຍາ ນີ້ ຢູ່ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໂດຍພາຍໃຕ້ການເປັນປະທານ ຂອງ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ປະທານຄະນະຊີ້ນຳລະດັບຊາດ ເພື່ອເປີດປີທ່ອງທ່ຽວ 2024, ໂດຍມີທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ, ທ່ານຮອງລັດຖະມົນຕີ, ທ່ານຮອງເຈົ້າຄອງນະຄອນຫຼວງວຽງຈັນ ແລະ ຮອງເຈົ້າແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມກອງປະຊຸມທັງແບບປົກກະຕິ ແລະ ແບບທາງໄກ.
ໂອກາດນີ້, ທ່ານນາງ ສວນສະຫວັນ ວິຍະເກດ ກ່າວວ່າ: ສໍາລັບກິດຈະກຳປີທ່ອງທ່ຽວລາວ 2024 ໂດຍສົມທົບນຳບັນດາພະແນກ ຖວທ ນະຄອນຫຼວງ ແລະ ແຂວງ ໃນຂອບເຂດທົ່ວປະເທດ ສັງລວມລາຍການກິດຈະກໍາປີທ່ອງທ່ຽວລາວ 2024 ໄດ້ທັງໝົດ 75 ກິດຈະກຳ ຊຶ່ງແບ່ງອອກເປັນ 2 ລະດັບຄື: ກິດຈະກຳລະດັບຊາດ ຈຳນວນ 14 ກິດຈະກຳ ແລະ ລະດັບແຂວງ ຈຳນວນ 61 ກິດຈະກຳ ສ່ວນແຜນວຽກປັບປຸງສິ່ງອຳນວຍຄວາມສະດວກດ້ານການທ່ອງທ່ຽວ ໄດ້ປັບປຸງບັນດາສະຖານທີ່ທ່ອງທ່ຽວ ໃຫ້ໄດ້ມາດຕະຖານການຈັດລະດັບສະຖານທີ່ທ່ອງທ່ຽວຂອງ ສປປ ລາວ ຢູ່ບັນດາສະຖານທີ່ເປົ້າໝາຍ ໃຫ້ໄດ້ຕິດປ້າຍດາວ ຢັ້ງຢືນມາດຕະຖານສ້າງ ແລະ ຕິດຕິດຕັ້ງປ້າຍຊີ້ບອກ ຕາມເສັ້ນທາງເຊື່ອມຕໍ່ແຕ່ລະພາກ, ເຊື່ອມຕໍ່ກັບປະເທດໃກ້ຄຽງ ແລະ ຕາມເສັ້ນທາງເຂົ້າສະຖານທີ່ທ່ອງທ່ຽວ ປັບປຸງເມືອງທ່ອງທ່ຽວໃຫ້ໄດ້ມາດຕະຖານ ແລະ ປັບປຸງສິ່ງອຳນວຍຄວາມສະດວກຈຸດຊົມວິດຕ່າງໆ ປັບປຸງສິ່ງອໍານວຍຄວາມສະດວກ ກິດຈະກໍາການທ່ອງທ່ຽວແບບອະນຸລັກ (Ecotourism) ເຊັ່ນ: ເສັ້ນທາງຍ່າງປ່າ-ປີນພູ ທາງຂຶ້ນ-ລົງເຮືອ ຈຸດຕັ້ງແຄ້ມ ແລະ ບ່ອນຈອດລົດທົວນອນ, ອອກໃບຢັ້ງຢືນດ້ານເຕັກນິກ ແລະ ຄວາມປອດໄພ ຂອງກິດຈະກໍາການທ່ອງທ່ຽວພະຈົນໄພ ເຊັ່ນ: ກິດຈະກໍາຂີ່ສະລິງ ປີນຜາ, ບໍລູນ, ເຮືອບິນຂະໜາດນ້ອຍ ແລະ ລ່ອງເຮືອ ພ້ອມທັງປັບປຸງສິ່ງອໍານວຍຄວາມສະດວກເຂົ້າຫາ ແລະ ພາຍໃນສະຖານທີ່ທ່ອງທ່ຽວແບບອະນຸລັກປະຊາຊົນມີສ່ວນຮ່ວມ ໃຫ້ໄດ້ມາດຕະຖານ.
ໂອກາດດຽວກັນນີ້, ທ່ານ ກິແກ້ວ ໄຂຄຳພິທູນ ກ່າວວ່າ: ກອງປະຊຸມຄັ້ງນີ້ ພວກເຮົາຈະໄດ້ພ້ອມພາກັນປຶກສາຫາລືບັນຫາສຳຄັນຈຳນວນໜຶ່ງເປັນຕົ້ນ: ສ້າງຄວາມເອກະພາບດ້ານສັນຍາລັກປີທ່ອງທ່ຽວ, ຄຳຂວັນປີທ່ອງທ່ຽວ ບັນດາກິດຈະກຳຂອງປີທ່ອງທ່ຽວ, ດ້ານງົບປະມານ, ດ້ານສິ່ງອຳນວຍຄວາມສະດວກໃຫ້ປີທ່ອງທ່ຽວ ແລະ ສິ່ງອຳນວຍຄວາມສະດວກດ້ານພື້ນຖານໂຄງລ່າງ ໃນໄລຍະປີທ່ອງທ່ຽວ ແລະ ຍາວນານ ຊຶ່ງສ່ວນໜຶ່ງຄະນະຮັບຜິດຊອບ ກໍຄືກະຊວງ ຖວທ ລວມທັງບັນດາແຂວງໃນຂອບເຂດທົ່ວປະເທດ ກໍໄດ້ເລີ່ມກະກຽມຄວາມພ້ອມໃນການຈັດປີທ່ອງທ່ຽວ 2024 ໄດ້ມີຄວາມຄືບໜ້າຫຼາຍພໍສົມຄວນ. ດັ່ງທີ່ໄດ້ລາຍງານໃນກອງປະຊຸມລັດຖະບານທີ່ຜ່ານມາແລ້ວ. ດັ່ງທີ່ເຮົາຮັບຮູ້ນຳກັນແລ້ວວ່າ ສະພາບເສດຖະກິດໂລກ ກໍຄືປະເທດເຮົາ ໄດ້ມີການທົດຖອຍ ສືບເນື່ອງມາຈາກການຄວາມຂັດແຍ່ງຂອງບັນດາປະເທດຕ່າງໆຢູ່ໃນໂລກ ຊຶ່ງເຮັດໃຫ້ນຳມັນແພງຂຶ້ນ ການຂາດແຄນ ແລະ ລາຄາດ້ານສະບຽງອາຫານເພີ່ມຂຶ້ນ, ຄວາມເຊື່ອໝັ້ນໃນການລົງທຶນຫຼຸດລົງ ແລະ ບັນຫາອື່ນໆ ໂດຍສະເພາະໃນ 3 ປີກວ່າ ຂອງການລະບາດຂອງພະຍາດໂຄວິດ-19 ໄດ້ສົ່ງຜົນກະທົບຕໍ່ວຽກງານການທ່ອງທ່ຽວ ທີ່ເປັນເສດຖະກິດປາຍແຫຼມ ເພື່ອປະກອບສ່ວນເຂົ້າໃນການຟື້ນຟູເສດຖະກິດຂອງ ສປປ ລາວ; ສະນັ້ນ ການຈັດປີທ່ອງທ່ຽວ 2024 ນີ້ ຖືເປັນວຽກງານອັນສຳຄັນຍິ່ງ ເພື່ອເປັນການກະຕຸກຊຸກຍູ້ການພັດທະນາ, ຄຸ້ມຄອງ ໂຄສະນາ ແລະ ສົ່ງເສີມການທ່ອງທ່ຽວ ທັງສົ່ງເສີມສ້າງຜະລິດຕະພັນສະໜອງໃຫ້ກັບການທ່ອງທ່ຽວ ໃຫ້ມີຄວາມຫຼາກຫຼາຍຂຶ້ນ ແລະ ສ້າງມູນຄ່າເພີ່ມດ້ານຜະລິດຕະພັນພາຍໃນ ຍົກລະດັບຄຸນນະພາບການບໍລິການເຂົ້າເຖິງກຸ່ມຕະຫຼາດເປົ້າໝາຍ ເຊື່ອມໂຍງກັບພາກພື້ນ ແລະ ສາກົນ ສົ່ງເສີມກິດຈະກຳທາງດ້ານວັດທະນະທຳ, ບຸນປະເພນີ ເເລະ ເທດສະການຕ່າງໆ ຢູ່ສູນກາງ ເເລະ ທ້ອງຖິ່ນ ໂດຍການມີສ່ວນຮ່ວມຂອງທຸກພາກສ່ວນ; ສົ່ງເສີມການທ່ອງທ່ຽວພາຍໃນ ແລະ ດຶງດູດນັກທ່ອງທ່ຽວສາກົນເຂົ້າມາທ່ຽວລາວນັບມື້ນັບຫຼາຍຂຶ້ນ. ແນໃສ່ສ້າງວຽກເຮັດງານທຳໃຫ້ເເກ່ສັງຄົມ ເເລະ ສ້າງລາຍຮັບເງິນຕາເຂົ້າສູ່ປະເທດ.
ສະນັ້ນ, ກອງປະຊຸມໃນມື້ນີ້ ພວກເຮົາຈະໄດ້ຮັບຟັງການລາຍງານຄວາມຄືບໜ້າ ການກະກຽມຄວາມພ້ອມ ໃນການຈັດປີທ່ອງທ່ຽວ ທັງຢູ່ສູນກາງ ແລະ ທ້ອງຖິ່ນ ພ້ອມທັງປຶກສາຫາລືກ່ຽວກັບການກຳນົດຫົວຂໍ້ ໂຄສະນາປີທ່ອງທ່ຽວ ການກຳນົດກິດຈະກຳທີ່ຈະຈັດຂຶ້ນໃນປີ 2024 ສັນຍາລັກ ຫຼື ໂລໂກ້ ທີ່ຈະນຳໃຊ້ເຂົ້າການໂຄສະນາປີທ່ອງທ່ຽວ ແລະ ງົບປະມານທີ່ຕອບສະໜອງໃຫ້ແກ່ການຈັດປີທ່ອງທ່ຽວ 2024 ນອກຈາກນີ້ ຄະນະພວກເຮົາກໍຈະໄດ້ປຶກສາຫາລື ກ່ຽວກັບວຽກງານຂອງຂະແໜງການປິ່ນອ້ອມ ເຮັດແນວໃດເພື່ອເຮັດໃຫ້ການຈັດປີທ່ອງທ່ຽວຂອງພວກເຮົາປະສົບຜົນສຳເລັດສາມາດດຶງດູດນັກທ່ອງທ່ຽວເກີນລະດັບຄາດໝາຍ.
ຂ່າວ: ຍຸພິນທອງ, ພາບ:ວັນເພັງ
