ເຈົ້າໜ້າທີ່ ປກສ ເມືອງໄຊທານີ ນະຄອນຫຼວງວຽງຈັນ ເປີດເຜີຍຂໍ້ມູນ ເມື່ອວັນທີ 20 ກັນຍາ 2023 ວ່າ: ເວລາປະມານ 23 ໂມງ ຂອງວັນທີ 17 ກັນຍາ ຜ່ານມາ ໄດ້ຮັບແຈ້ງເຫດຄົນຮ້າຍປຸ້ນຊັບເກີດຂຶ້ນຢູ່ແຖວໄຟແດງ ຫຼັກ 21 ບ້ານໂຄກສີວິໄລ ເມືອງໄຊທານີ ນະຄອນຫຼວງວຽງຈັນ ຫຼັງຈາກນັ້ນ ປກສ ເມືອງໄຊທານີ ຈຶ່ງໄດ້ເຂົ້າກວດກາສະຖານທີ່ເກີດເຫດຕົວຈິງ ພົບເຫັນຜູ້ຖືກເຄາະຮ້າຍ 1 ຄົນ ຊື່: ທ້າວ ຈັນດີ ອາຍຸ 30 ປີ ພະນັກງານ ຢູ່ບ້ານໜອງປີງ ເມືອງຈັນທະບູລີ ນະຄອນຫຼວງວຽງຈັນ.
ເວລາ 16:00 ໂມງຂອງວັນທີ 18 ກັນຍາ 2023 ເຈົ້າໜ້າທີ່ສາມາດຈັບຕົວຜູ້ກໍ່ເຫດໄດ້ ຊື່: ທ້າວ ບຸນໜາຍ ສັກດາ ອາຍຸ 30 ປີ ພັກເຊົາຢູ່ບ້ານໂນນທອງ ເມືອງໄຊທານີ ນະຄອນຫຼວງວຽງຈັນ.
ພາຍຫຼັງກັກຕົວທ້າວ ບຸນໜາຍ ສັກດາ ໄດ້ແລ້ວ ຜູ້ກ່ຽວໃຫ້ການຮັບສາລະພາບວ່າ: ໃນໄລຍະເດືອນສິງຫາ 2023 ຜູ້ກ່ຽວໄດ້ມີການພົວພັນກັບທ້າວ ຈັນດີ ແບບຊູ້ສາວ (ຊາຍຮັກຊາຍ) ຈາກນັ້ນພວກກ່ຽວທັງສອງຈຶ່ງໄດ້ພາກັນເປີດບ້ານພັກຮ່ວມຮັກກັນພ້ອມທັງຖ່າຍຮູບພາບ ແລະ ຄຣິບວິດິໂອ. ໃນມື້ເກີດເຫດວັນທີ 17 ກັນຍາ 2023 ພວກກ່ຽວທັງສອງເກີດມີການຜິດຖຽງກັນຂັ້ນຮ້າຍແຮງຍ້ອນການຫຶງຫວງ ທ້າວ ຈັນດີ ບໍ່ໃຫ້ທ້າວ ບຸນໜາຍ ໄປພົວພັນກັບບຸກຄົນອື່ນ, ຖ້າບອກບໍ່ຟັງຈະໂພດຄຣິບວິດິໂອ ແລະ ຮູບພາບລົງສື່ສັງຄົມອອນລາຍ.
ຫຼັງຈາກນັ້ນ, ທ້າວ ບຸນໜາຍ ຈຶ່ງເກີດມີແນວຄຽດແຄ້ນຢາກຄາດຕະກໍາເພື່ອປິດປາກ ແລະ ເອົາຊັບສິນຂອງທ້າວ ຈັນດີ ແກ້ວດີ, ເວລາ 22:30 ນາທີຂອງວັນດຽວກັນ ພວກກ່ຽວທັງສອງຈຶ່ງໄດ້ນັດພົບກັນຢູ່ຈຸດໄຟແດງຫຼັກ 21 ເພື່ອຈະປັບຄວາມເຂົ້າໃຈກັນ, ທ້າວ ບຸນໜາຍ ໄດ້ຊ້ອນທ້າຍລົດຈັກຂອງທ້າວ ຈັນດີ ຂັບຂີ່ມຸ້ງໜ້າໄປເຮືອນພັກແຫ່ງໜຶ່ງ ຕັ້ງຢູ່ບ້ານໂຄກສີວິໄລ ເມືອງໄຊທານີ ນະຄອນຫຼວງວຽງຈັນ ທີ່ທ້າວ ຈັນດີ ເປີດໄວ້ແລ້ວ, ພໍຂັບຂີ່ລົດໄປຮອດຈຸດເກີດເຫດ ທ້າວ ບຸນໜາຍ ຈຶ່ງໄດ້ເຮັດໃຫ້ລົດຈັກລົ້ມລົງແຄມທາງ ຈາກນັ້ນ ທ້າວ ບຸນໜາຍ ຈຶ່ງໄດ້ຈົກເອົາມີດແຫຼມທີ່ກະກຽມມາພັນໃສ່ຫົວ ແລະ ແທງໃສ່ຕົນໂຕຂອງທ້າວ ຈັນດີ ຈໍານວນຫຼາຍບາດ. ທ້າວ ຈັນດີ ລຸກແລ່ນຂ້າມທາງເພື່ອໄປຂໍຄວາມຊ່ວຍເຫຼືອ ແຕ່ທ້າວ ບຸນໜາຍ ໄດ້ແລ່ນຕາມໄປເອົາມີດພັນ ແລະ ແທງຕື່ມຈຳນວນຫຼາຍບາດເຮັດໃຫ້ທ້າວ ຈັນດີ ລົ້ມລົງ ຄິດວ່າຜູ້ກ່ຽວເສຍຊີວິດແລ້ວ ຈຶ່ງໄດ້ດຶງເອົາຊັບສິນປະເພດສາຍຄໍຄໍາ 1 ເສັ້ນບໍ່ຮູ້ນໍ້າໜັກ, ແຫວນຄໍາ 1 ວົງບໍ່ຮູ້ນໍ້າໜັກ ແລ້ວເອົາຕົວລົບໜີ, ເອົາມີດທີ່ໃຊ້ກໍ່ເຫດຖິ້ມລົງຫ້ວຍນໍ້າໃນປ່າ, ເຄື່ອງທີ່ເປື້ອນເລືອດນໍາໄປຈູດໄຟຖິ້ມ.
ປັດຈຸບັນທາງເຈົ້າໜ້າທີ່ ປກສ ສາມາດເກັບກູ້ຊັບສິນທີ່ເສຍຫາຍຄືນໄດ້ໜົດແລ້ວ ແລະ ຍັງຢູ່ໃນຂັ້ນຕອນການດຳເນີນຄະດີກັບຜູ້ກໍ່ເຫດຕາມຂັ້ນຕອນລະບຽບກົດໝາຍຕໍ່ໄປ.
ໂດຍ: ຄວາມສະຫງົບ
