ເຂດພັດທະນາກວມລວມໄຊເຊດຖາ ເປັນໂຄງການຮ່ວມມືລະດັບຊາດ ທີລັດຖະບານ ສອງປະເທດ ລາວ ແລະ ຈີນ ໄດ້ກຳນົດຮ່ວມກັນ, ທັງເປັນເຂດຮ່ວມມືເສດຖະກິດການຄ້າ ລະດັບຊາດ ຂອງ ສປ ຈີນ ໜຶ່ງດຽວຢູ່ ສປປ ລາວ ແລະ ເປັນໂຄງການທຳອິດທີ່ໄດ້ຈັດເຂົ້າໃນແຜນຍຸດທະສາດ ໜຶ່ງແລວ ໜຶ່ງເສັ້ນທາງ ທີ່ໄດ້ຮັບຄວາມເອົາໃຈໃສ່ ແລະ ສະໜັບສະໜູນ ຈາກລັດຖະບານທັງສອງປະເທດ.
ທ່ານ ຫວາງຊາງ ອຸປະທູດແຫ່ງ ສປ ຈີນ ປະຈຳ ສປປ ລາວ ໃຫ້ສຳພາດຕໍ່ສື່ມວນຊົນ ເນື່ອງໃນໂອກາດການປະຕິບັດຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ຄົບຮອບ 10 ປີ ໃນວັນທີ 19 ກັນຍາ 2023 ນີ້ວ່າ: ເຂດພັດທະນາກວມລວມໄຊເສດຖາ ແມ່ນອີງໃສ່ທ່າແຮງຂອງທີ່ຕັ້ງ, ໄດ້ປັບປຸງການສ້າງພື້ນຖານໂຄງລ່າງ ແລະ ການບໍລິການທີ່ກ່ຽວຂ້ອງໃຫ້ດີຂຶ້ນຢ່າງບໍ່ຢຸດຢັ້ງ ແລະ ໄດ້ກາຍເປັນຈຸດສຳຄັນຂອງນະ ຄອນຫລວງວຽງຈັນ ໃນການດຶງດູດການລົງທຶນຂອງຕ່າງປະເທດ, ສາມາດສ້າງວຽກເຮັດງານທຳ ແລະ ປັບປຸງຊີວິດການເປັນຢູ່ຂອງປະຊາຊົນ ເປັນຈຳນວນຫລາຍ. ປັດຈຸບັນ, ມີວິສາຫະກິດ 129 ຫົວໜ່ວຍ ໄດ້ເຂົ້າປະຈຳຢູ່ເຂດພັດທະນາກວມລວມໄຊເສດຖາ, ໃນນີ້ ມີ 65 ແຫ່ງໄດ້ສ້າງສຳເລັດ ແລະ ເລີ່ມການຜະລິດ, ຄາດວ່າຖ້າວິສາຫະກິດທັງໝົດ 129 ຫົວໜ່ວຍ ເລີ່ມດຳເນີນການຜະລິດ ມູນຄ່າການຜະລິດຈະບັນລຸເຖິງ 7,8 ຕື້ໂດລາສະຫະລັດ ແລະ ຈະສາມາດສ້າງວຽກເຮັດງານທຳໄດ້ປະມານ 10.000 ກວ່າຕໍາແໜ່ງ.
ແຜນແມ່ບົດການພັດທະນາ ໄດ້ກຳນົດສ້າງເປັນ ໜຶ່ງເມືອງ ສີ່ເຂດ ຄື: ຕົວເມືອງໃໝ່ອຸດສະຫະກຳນິເວດວິທະຍາ ນະຄອນຫລວງວຽງຈັນ; ເຂດຮອງຮັບການຮ່ວມມືຄວາມອາດສາມາດດ້ານການຜະລິດສາກົນ, ເຂດຮ່ວມມືພັດທະນາຕົວແບບ ລາວ-ຈີນ, ເຂດສູນກາງຕົວເມືອງໃໝ່ນະຄອນຫລວງວຽງຈັນ ແລະ ເຂດທີ່ຢູ່ອາໄສ ທີ່ມີສະພາບແວດລ້ອມດີ, ມີຄວາມສະຫງົບ ແລະ ໜ້າຢູ່.
ສໍາລັບ ເປົ້າໝາຍການພັດທະນາ ແມ່ນເລີ່ມຈາກການພັດທະນາແບບໂດດດ່ຽວ ໄປສູ່ການພັດ ທະນາທີ່ປະສົມປະສານ ໂດຍພັດທະນາໃຫ້ກາຍເປັນຕົວເມືອງປະສົມປະສານກົມກືນກັນ ລະຫວ່າງເຂດທີ່ພັກອາໄສ ແລະ ການຜະລິດ; ເອົາຄວາມໂດດເດັ່ນຂອງ ໄຊເຊດຖາ-ນະຄອນຫລວງວຽງຈັນ ເປັນຫົວໃຈຫລັກໃນການຂັບເຄື່ອນ; ຢຶດຖືເອົາ ເຂດສີຂຽວ, ລະບົບນິເວດ, ຄວາມສະຫງົບສຸກ, ທັນສະໄໝ ເຊິ່ງເຂດພັດທະນາ ໄດ້ແບ່ງເປັນ 3 ໄລຍະຄື: ໄລຍະທີ 1 ພັດທະນາ 400 ເຮັກຕາ ໂດຍພັດທະນາອຸດສາຫະກຳການຜະລິດ; ໄລຍະທີສອງ ແລະ ທີສາມ ແມ່ນພັດທະນາເປັນເຂດການຄ້າ, ການທ່ອງທ່ຽວ ແລະ ພະຍາຍາມສ້າງເປັນຕົວເມືອງໃໝ່ ຂອງນະຄອນຫລວງວຽງຈັນ.
ສ່ວນວິສາຫະກິດທີ່ເຂົ້າມາລົງທຶນຢູ່ເຂດດັ່ງກ່າວ, ແມ່ນມາຈາກຫລາຍປະເທດ ແລະ ພາກພື້ນ ລວມມີ: ສປ ຈີນ, ຍີ່ປຸ່ນ, ສະຫະລັດອາເມລິກາ, ໄທ, ມາເລເຊຍ ແລະ ເຂດປົກຄອງພິເສດຮົງກົງ ຄາດຄະເນການລົງທຶນທັງໝົດມີມູນຄ່າ 1 ຕື້ໂດລາສະຫະລັດ, ເນື້ອທີ່ລົງທຶນທັງໝົດຫລາຍກວ່າ 133,2 ເຮັກຕາ, ຂະແໜງການລົງທຶນລວມມີການຜະລິດ, ຜະລິດຕະພັນເອເລັກໂຕຣນິກ, ພະລັງງານສະອາດ, ຢາປົວພະຍາດ, ການປຸງແຕ່ງຜະລິດຕະພັນກະສິກຳ, ການຜະລິດເຄື່ອງນຸ່ງຫົ່ມ ແລະ ຂະແໜງການ ອື່ນໆ.
