ໃນລະຫວ່າງວັນທີ 14-17 ກັນຍາ ຜ່ານມາ, ຄະນະຜູ້ແທນຄະນະສະມາຊິກສະພາແຫ່ງຊາດໜຸ່ມ ສະພາແຫ່ງຊາດລາວ ນໍາໂດຍທ່ານ ແກ້ວຈະເລີນ ເຊ່ຍຢິ້ງຢ່າງ ຮອງປະທານກໍາມາທິການບັນດາເຜົ່າ ປະທານຄະນະສະມາຊິກສະພາແຫ່ງຊາດໜຸ່ມ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມກອງປະຊຸມສະມາຊິກລັດຖະສະພາໜຸ່ມໂລກ ຄັ້ງທີ 9 ຂອງສະຫະພັນລັດຖະສະພາສາກົນ (IPU) ທີ່ ຮ່າໂນຍ, ສສ ຫວຽດນາມ. ກອງປະຊຸມດັ່ງກ່າວ, ມີຄະນະຜູ້ແທນຈາກປະເທດສະມາຊິກສະຫະພັນລັດຖະສະພາສາກົນ (IPU) ເຂົ້າຮ່ວມທັງໝົດ 69 ປະເທດ ພ້ອມດ້ວຍຕົວແທນຈາກຄະນະເລຂາທິການໃຫຍ່ສະມັດຊາລັດຖະສະພາລະຫວ່າງຊາດອາຊຽນ (AIPA), ເລຂາທິການໃຫຍ່ສະມັດຊາລັດຖະສະພາປະເທດທີ່ໃຊ້ພາສາຝຣັ່ງ (APF) ແລະ ອົງການສາກົນຕ່າງໆ ລວມທັງໝົດຈໍານວນ 300 ທ່ານ; ກອງປະຊຸມຄັ້ງນີ້ ດຳເນີນໄປພາຍໃຕ້ຫົວຂໍ້ຫຼັກ “ບົດບາດຂອງໄວໜຸ່ມໃນການເລັ່ງລັດການບັນລຸເປົ້າໝາຍການພັດທະນາແບບຍືນຍົງ (SDGs) ຜ່ານການຫັນເປັນດີຈີຕອນ ແລະ ນະວັດຕະກໍາ” ຊຶ່ງຄະນະຜູ້ແທນທີ່ເຂົ້າຮ່ວມກໍໄດ້ຮ່ວມກັນແລກປ່ຽນຄໍາຄິດຄໍາເຫັນ ແລະ ປຶກ ສາຫາລືໃນ 3 ຫົວຂໍ້ຍ່ອຍທີ່ສໍາຄັນ ແລະ ພົ້ນເດັ່ນຢ່າງຕັ້ງໜ້າ, ໂດຍ ທ່ານ ກໍລະກັນ ພົມມະວົງ ສະມາຊິກສະພາແຫ່ງຊາດ ຄະນະສະມາຊິກສະພາແຫ່ງຊາດໜຸ່ມ ໄດ້ປະກອບຄໍາເຫັນໃນຫົວຂໍ້ທີ 1 “ການຫັນເປັນດີຈີຕອນ (Digital transformation)” ແລະ ຫົວຂໍ້ທີ 2 “ນະວັດຕະກໍາ ແລະ ການເລີ່ມຕົ້ນທຸລະກິດ (Innovation and startups)” ຊຶ່ງເປັນການແລກປ່ຽນຄໍາເຫັນຢ່າງກົງໄປກົງມາໂດຍໄດ້ເວົ້າເຖິງການເລີ່ມຕົ້ນຫັນເປັນດີຈີຕອນ ແລະ ສົ່ງເສີມນະວັດຕະກຳໃໝ່ ໃນ ສປປ ລາວ, ວິໄສທັດ, ແຜນຍຸດທະສາດ, ການຈັດຕັ້ງປະຕິບັດ ແລະ ການຄຸ້ມຄອງ ເພື່ອດໍາເນີນທຸລະກິດດີຈີຕອນ, ການນໍາໃຊ້ເຕັກໂນຊີທີ່ທັນສະໄໝເຂົ້າໃນການພັດທະນາ ໂດຍສະເພາະແມ່ນການສົ່ງເສີມໄວໜຸ່ມໃນການພັດທະນາເສດທະກິດ-ສັງຄົມ.
ພ້ອມດຽວກັນນີ້, ໃນມື້ທີສອງຊຶ່ງເປັນຫົວຂໍ້ສຸດທ້າຍຂອງກອງປະຊຸມ ທ່ານ ອຸດົມ ວົງໄກສອນ ສະມາຊິກສະພາແຫ່ງຊາດ ຄະນະສະມາຊິກສະພາແຫ່ງຊາດໜຸ່ມ ກໍໄດ້ປະກອບຄໍາເຫັນໃນຫົວຂໍ້ “ຊຸກຍູ້ການເຄົາລົບ ຄວາມຫຼາກຫຼາຍດ້ານວັດທະນະທຳ ເພື່ອສະໜັບສະໜູນການພັດທະນາແບບຍືນຍົງ” ຊຶ່ງໄດ້ເປັນການແລກປ່ຽນຄໍາເຫັນຕໍ່ກັບການພັດທະນາທາງດ້ານວັດທະນະທໍາ, ຮີດຄອງປະເພ ນີ, ໂດຍໄດ້ເນັ້ນເຖິງບົດບາດ ແລະ ຄວາມສໍາຄັນຂອງໄວໜຸ່ມໃນການປະກອບສ່ວນເຂົ້າໃນການປົກປັກຮັກສາ ແລະ ເຜີຍແຜ່ຮີດຄອງປະເພນີ ແລະ ວັດທະນະທໍາຜ່ານການຫັນເປັນດີຈີຕອນທັນສະໄໝຫຼາຍຂຶ້ນ.
ໃນໂອກາດເຂົ້າຮ່ວມກອງປະຊຸມດັ່ງກ່າວ, ຄະນະຜູ້ແທນກໍຍັງໄດ້ເຂົ້າຮ່ວມກອງປະຊຸມປຶກສາຫາລື ກັບສະມາຊິກລັດຖະສະພາໜຸ່ມ ຂອງບັນດາປະເທດສະມາຊິກສະມັດຊາລັດຖະສະພາລະຫວ່າງຊາດອາຊຽນ (AIPA) ຊຶ່ງໃນພິທີເປີດ ທ່ານ ແກ້ວຈະເລີນ ເຊຍຢິ້ງຢ່າງ ກໍໄດ້ຮັບກຽດປະກອບຄໍາເຫັນກ່າວເປີດງານ ໃນນາມທີ່ ສປປ ລາວ ໄດ້ຮັບໜ້າທີ່ເປັນເຈົ້າພາບກອງປະຊຸມສຸດຍອດລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ຢູ່ນະຄອນຫຼວງວຽງຈັນ ໃນທ້າຍປີ 2024.
ນອກຈາກນັ້ນ, ຄະນະຜູ້ແທນລາວ ຍັງໄດ້ມີໂອກາດການພົບປະໂອ້ລົມກັບສະມາ ຊິກລັດຖະສະພາໜຸ່ມ ຂອງບັນດາປະເທດສະມາຊິກ IPU ຈາກປະເທດ ທັນຊາເນຍ ແລະ ປະເທດ ເບລາຣຸດ ເປັນຕົ້ນ. ພ້ອມທັງ ຍັງໄດ້ໃຫ້ສໍາພາດກັບສໍານັກຂ່າວແຫ່ງຊາດ ຂອງ ສສ ຫວຽດນາມ ຈໍານວນ 2 ຊ່ອງ ແລະ ໃນວາລະສຸດທ້າຍ, ກໍໄດ້ເຂົ້າຮ່ວມຊົມການສະແດງວັດທະນະທໍາ ແລະ ເດີນທາງໄປທ່ຽວຊົມສະຖານທີ່ສໍາຄັນ ແລະ ມີຊື່ສຽງຈໍານວນໜຶ່ງຂອງ ສສ ຫວຽດນາມ ເຊັ່ນ: ຮ່າລອງເບ ແລະ ອື່ນໆ.
(ຂ່າວ: ສພຊ)
