ສູນກາງອົງການພຸດທະສາສະໜາສຳພັນລາວ (ອພສ) ໄດ້ເຜີຍແຜ່ທຳມະນູນສົງສະບັບປັບປຸງຂຶ້ນໃນວັນທີ 18 ກັນຍາ ຜ່ານມາ ທີ່ສະໂມສອນແຂວງສາລະວັນ ໂດຍການເຂົ້າຮ່ວມຂອງພະອາຈານໃຫຍ່ ບຸນສ່ວນ ພັນທະວົງ ຮອງປະທານສູນກາງອົງການພຸດທະສາສະໜາສຳພັນແຫ່ງ ສປປ ລາວ, ມີພະອາຈານ ສອນໄຊ ແກ້ວເມືອງໃຕ້ ປະທານ ອພສ ແຂວງ ແລະ ທ່ານ ຄຳຕາ ໂຣ່ຊົງເລືອງ ປະທານແນວລາວສ້າງຊາດແຂວງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທຳມະນູນທີ່ນຳມາເຜີຍແຜ່ໃນຄັ້ງນີ້ມີທັງໝົດ 13 ໝວດ, 74 ມາດຕາ ຈຸດປະສົງໃນການເຜີຍແຜ່ທຳມະນູນເພື່ອໃຫ້ຮັບຮູ້ກ່ຽວກັບຫຼັກການ, ລະບຽບການ, ມາດຕະການກ່ຽວກັບການຈັດຕັ້ງ ແລະ ການເຄື່ອນໄຫວຂອງພະສົງລາວ ເພື່ອຮັບປະກັນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃຫ້ມີປະສິດທິຜົນສູງ ແນໃສ່ເຕົ້າໂຮມຄວາມສາມັກຄີຂອງບັນພະຊິດ, ພຸດທະສາສະນິກະຊົນ ແລະ ປະຊາຊົນລາວບັນດາເຜົ່າທັງພາຍໃນ ແລະ ຕ່າງປະເທດ ໂດຍຖືເອົາຫຼັກພະທຳມະວິໃນ, ລັດຖະທຳມະນູນ, ກົດໝາຍ, ລະບຽບການ ແລະ ຮີດຄອງປະເພນີໃນການຜັນຂະຫຍາຍເຂົ້າໃນທຸກຂົງເຂດວຽກງານ, ການດຳລົງຊີວິດປະຈຳວັນ ແລະ ຮັບປະກັນຄວາມເປັນເອກະພາບ ໃນການຈັດຕັ້ງປະຕິບັດໃຫ້ເໝາະສົມກັບກາລະໂອກາດ ແລະ ຄວາມເປັນຈິງຢູ່ ສປປ ລາວ.
ຂ່າວ-ພາບ: ສິດຕາ ເພັດວົງສາ
