ໃນວັນທີ 19 ກັນຍາ 2023. ທີ່ສະຖານທູດຈີນ ປະຈໍາລາວ, ນະຄອນຫລວງວຽງຈັນ, ທ່ານ ຫວາງຊາງ ອຸປະທູດສະຖານທູດຈີນ ປະຈຳລາວ ໄດ້ໃຫ້ສໍາພາດຕໍ່ສື່ມວນຊົນລາວ ແລະ ຈີນ ໃນໂອກາດຂໍ້ລິເລີມໜຶ່ງແລວໜຶ່ງເສັ້ນທາງ ຄົບຮອບ 10 ປີ ທ່ານໄດ້ຍົກໃຫ້ເຫັນວ່າ: ໄລຍະ10 ປີຜ່ານ ມາ, ສາຍພົວພັນຈີນ-ລາວ ໄດ້ກ້າວເຂົ້າສູ່ຍຸກສະໄໝທີ່ດີທີ່ ສຸດໃນຄັ້ງປະຫວັດສາດ, ການກໍ່ສ້າງຄູ່ຮ່ວມຊາຕາກໍາລະ ຫວ່າງສອງປະເທດໄດ້ບັນລຸໝາກຜົນທີ່ອຸດົມສົມບູນ ແລະ ຈັດຢູ່ໃນແຖວໜ້າຂອງການຮ່ວມມືກໍ່ສ້າງໜຶ່ງແລວໜຶ່ງເສັ້ນທາງ ໃນນີ້:
+ ດ້ານການແລກປ່ຽນນະໂຍບາຍ: ການນໍາສູງສຸດສອງພັກ -ສອງລັດໄດ້ຮັກສາການໄປມາຫາສູ່ກັນຢ່າງແໜ້ນແຟ້ນ ເຊິ່ງໄດ້ຊີ້ທິດເຍືອງທາງໃຫ້ແກ່ການຮ່ວມມືກໍ່ສ້າງໜຶ່ງແລວໜຶ່ງເສັ້ນທາງລະຫວ່າງຈີນ-ລາວດ້ວຍຄຸນນະພາບສູງ. ທ້າຍປີກາຍນີ້, ທ່ານ ສີ ຈິ້ນຜິງ, ເລຂາທິການໃຫຍ່, ປະທານປະ ເທດ ແຫ່ງ ສປ ຈີນ ກັບ ທ່ານ ທອງລຸນ ສີສຸລິດ, ເລຂາທິ ການໃຫຍ່, ປະທານປະເທດ ແຫ່ງ ສປປ ລາວ ທີ່ໄປຢ້ຽມ ຢາມ ສປ ຈີນ ໄດ້ບັນລຸຄວາມເປັນເອກະພາບກັນດ້ານຍຸທະສາດອັນໃໝ່ກ່ຽວກັບການເຊື່ອມໂຍງເຂົ້າກັນທາງດ້ານຜົນປະໂຫຍດ ແລະ ຍຸດທະສາດການພັດທະນາ, ຊຸກຍູ້ການເຊື່ອມໂຍງເຊື່ອມຈອດກັນ ແລະ ການພັດທະນາແບບກົມ ກຽວກັນຂອງພາກພື້ນ, ອັນໄດ້ສ້າງພະລັງແຮງອັນໃໝ່ເຂົ້າໃນການສົ່ງເສີມຮ່ວມກັນສ້າງໜຶ່ງແລວໜຶ່ງເສັ້ນທາງ ແລະ ອື່ນໆ.
+ ດ້ານການເຊື່ອມໂຍງດ້ານໂຄງລ່າງ. ສອງປະເທດຈີນ -ລາວໄດ້ຮ່ວມແຮງຮ່ວມໃຈເພື່ອສ້າງທາງລົດໄຟຈີນ-ລາວ ມາຮອດເດືອນ 8 ປີ 2023, ທາງລົດໄຟຈີນ-ລາວຕອນປະ ເທດລາວໄດ້ຂົນສົ່ງຜູ້ໂດຍສານທັງໝົດ 3,102 ລ້ານຄົນ, ໃນນັ້ນມີຜູ້ໂດຍສານຂ້າມຊາດ 29,000 ຄົນ, ຂົນສົ່ງສິນຄ້າໄດ້ 5,191 ລ້ານໂຕນ, ໃນນັ້ນມີ 4,399 ລ້ານໂຕນແມ່ນສິນ ຄ້າຂ້າມຊາດ, ໄດ້ສ້າງວຽກເຮັດງານທຳໃຫ້ປະຊາຊົນທີ່ຢູ່ລຽບຕາມແລວທາງ 1 ແສນຄົນ ແລະ ອື່ນໆ.
+ ດ້ານການສ້າງຄວາມສະດວກທາງດ້ານການຄ້າ: ຈີນເປັນຕະຫຼາດສົ່ງອອກໃຫຍ່ສຸດຂອງປະເທດລາວ, ຜະລິດ ຕະພັນກະສິກຳທີ່ສົ່ງອອກສູ່ຕ່າງປະເທດຂອງລາວ 80% ແມ່ນສົ່ງໄປສູ່ປະເທດຈີນ, ສອງຝ່າຍໄດ້ເຊັນອະນຸສັນຍາວ່າດ້ວຍການສົ່ງອອກຜະລິດຕະພັນກະສິກຳຂອງປະເທດລາວໄປສູ່ປະເທດຈີນ 17 ປະເພດ, ລວມທັງເຂົ້າສານ, ສາ ລີ,ໝາກກ້ວຍ,ງົວແລະອື່ນໆ.ໃນເດືອນ 10 ປີ 2022, ສອງຝ່າຍໄດ້ເຊັນບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານລະບົບການຄ້າເອເລັກໂຕຣນິກ,ສືບຕໍ່ເພີ່ມທະວີການປືກສາຫາລືນະໂຍບາຍແລະການແລກປ່ຽນບົດຮຽນເຊິ່ງກັນແລະກັນເພື່ອສະໜັບສະໜູນວິສາຫະກິດເປີດກວ້າງການນຳເຂົ້າແລະສົ່ງອອກສິນຄ້າຜ່ານລະບົບການຄ້າເອເລັກໂຕຣນິກ. ສອງຝ່າຍຍັງໄດ້ເພີ່ມທະວີການໂຄສະນາກາເຟ, ຊາ, ເບຍລາວ ແລະ ຜະລິດຕະພັນລາວອື່ນໆທີ່ຂາຍດີຢູ່ຈີນໂດຍຜ່ານເວທີການຄ້າພາຍໃນ ແລະ ສາກົນ ເຊັ່ນ: ງານວາງສະແດງສິນຄ້ານຳເຂົ້າສາກົນຂອງຈີນ, ງານວາງສະແດງສິນຄ້າອາຊຽນ-ຈີນເປັນຕົ້ນ,ເພື່ອຕອບສະໜອງຄວາມຮຽກຮ້ອງຕ້ອງການຂອງຕະຫຼາດພາຍໃນປະເທດຈີນ.
ນອກຈາກນີ້, ດ້ານການເຊື່ອມໂຍງທຶນຮອນ ແລະ ດ້ານການສ້າງຄວາມຜູກພັນລະຫວ່າງປະຊາຊົນສອງປະເທດຈີນ-ລາວ ໄດ້ຮັບຜົນສໍາເລັດຢ່າງຕໍ່ເນື່ອງເຊັ່ນດຽວກັນ.
ທ່ານ ຫວາງຊາງ ຍົກໃຫ້ເຫັນຕື່ມວ່າ: ການຮ່ວມສ້າງໜຶ່ງແລວທາງໜຶ່ງເສັ້ນທາງທີ່ມີຄຸນນະພາບສູງລະຫວ່າງຈີນ -ລາວ ບໍ່ພຽງແຕ່ເປັນການປະຕິບັດອັນສຳຄັນໃນການສ້າງຄູຮ່ວມຊາຕາກໍາສອງປະເທດ, ຍັງເປັນແບບຢ່າງໃຫ້ແກ່ຂໍ້ລິເລີ່ມໜຶ່ງແລວທາງໜຶ່ງເສັ້ນທາງ ທີ່ໄດ້ແຕກດອກອອກຜົນໃນທົ່ວໂລກ. ໃນຕໍ່ໜ້າ ພວກຂ້າພະເຈົ້າຍິນດີຮ່ວມມືກັບຝ່າຍລາວ ປະຕິບັດຕາມຄວາມເຫັນເອກະພາບຂອງການນໍາຂັ້ນສູງ ແລະຂໍ້ລິ້ເລີ່ມທົ່ວໂລກຕ່າງໆ ເພືື່ອຊຸກຍູ້ການເຊື່ອມຈອດລະຫວ່າງ ຂໍ້ລິເລີ່ມໜຶ່ງແລວທາງໜຶ່ງເສັ້ນທາງ ແລະ ຍຸດທະສາດທີ່ການຫັນປະເທດທີ່ບໍ່ມີທະເລ ເປັນປະເທດເຊື່ອມຍອມເຊື່ອມຈອດ, ຮ່ວມກັນຮັກສາ ແລະດໍາເນີນບໍລິການ ລົດໄຟຈີນ-ລາວໃຫ້ດີ ແລະສ້າງສາພັດທະນາບັນດາເຂດແຂວ້ນຕາມເສັ້ນທາງລົດໄຟໃຫ້ດີ, ເປີດກວ້າງການເຊື່ອມຕໍ່ໂຄງລ່າງພື້ນຖານອື່ນຢ່າງຕັ້ງໜ້າ.
ຈີນ ຍິນດີຮ່ວມມືກັບຝ່າຍລາວ ສົ່ງເສີມການຮ່ວມມືໃນຂົງເຂດຕ່າງໆ ເຊັ່ນ: ຂົງເຂດພະລັງແຮງໄຟຟ້າ ບໍ່ແຮ່ ກະສິກໍາ ການທ່ອງທ່ຽວ ແລະອື່ນໆ, ສືບຕໍ່ເພີ່ມທະວີການລົງ ທຶນກ່ຽວກັບຂົງເຂດຊີວິດການເປັນຢູ່ຂອງປະຊາຊົນ,ຊຸກຍູ້ສາຍພົວພັນມິດຕະພາບລະຫວ່າງປະຊາຊົນສອງຊາດ, ຮ່ວມສ້າງຄູ່ຮ່ວມຊາຕາກໍາຈີນ-ລາວທີ່ມີມາດຕະຖານສູງ ຄຸນນະພາບສູງ ແລະລະດັບສູງ ເຊິ່ງນໍາເອົາຜົນປະໂຫຍດອັນແທ້ຈິງໃຫ້ແກ່ສອງປະເທດແລະປະຊາຊົນສອງຊາດແລະພະຍາຍາມປະກອບສ່ວນເຂົ້າໃນການສ້າງປະຊາຄົມຮ່ວມຊາຕາກໍາ.
ສໍາລັບຂໍ້ລິເລີ່ມຫນຶ່ງແລວ ຫນຶ່ງເສັ້ນທາງ ແມ່ນຂໍ້ລິເລີ່ມທີ່ ທ່ານ ສີ ຈິ້ນຜິງ ປະທານປະເທດຈີນ ໄດ້ສະເໜີກ່ຽວກັບການຮ່ວມກັນສ້າງແລວເສດຖະກິດແຫ່ງເສັ້ນທາງສາຍໄໝ ແລະ ເສັ້ນທາງສາຍໄໝແຫ່ງສັດຕະວັດທີ 21 ຕາມລຳດັບໃນໂອກາດໄປຢ້ຽມຢາມປະເທດກາຊັກສະຖານ ແລະອິນໂດເນເຊຍ ໃນປີ 2013.
ຂໍ້ລິເລີ່ມດັ່ງກ່າວ ໄດ້ຮັບການສະໜັບສະໜູນຢ່າງຕັ້ງໜ້າຈາກບັນດາປະເທດແລະອົງຈັດຕັ້ງສາກົນນັບມື້ນັບຫຼາຍຂຶ້ນ, ປະເທດຈີນໄດ້ລົງນາມເອກະສານຮ່ວມມື200ກວ່າສະບັບກັບ 151 ປະເທດ ແລະ 32 ອົງການຈັດຕັ້ງສາກົນ, ຊຶ່ງເນື້ອໃນກວມເອົາຂົງເຂດການເຊື່ອມຈອດເຊື່ອມໂຍງ, ການຄ້າ, ການລົງທຶນ, ການທະນາຄານ ສັງຄົມ ຊີວິດການເປັນຢູ່ຂອງປະຊາຊົນ ວັດທະນະ ທຳແລະອື່ນໆ. ລະດັບການເຊື່ອມຈອດເຊື່ອມໂຍງໃນດ້ານໂຄງລາງພື້ນຖານຢູ່ລຽບຕາມໜຶ່ງແລວທາງໜຶ່ງເສັ້ນທາງໄດ້ຮັບການຍົກລະດັບຂຶ້ນເປັນກ້າວໆ, ເຮັດໃຫ້ປະເທດລາວ, ເນປານ ແລະປະເທດອື່ນໆ ທີ່ເປັນປະເທດບໍ່ມີຊາຍແດນຕິດຈອດກັບທະເລນັ້ນຫັນມາເປັນປະເທດເຊື່ອມຈອດເຊື່ອມໂຍງກັບພາກພື້ນແລະສາກົນ.
ຂ່າວ: BT
ພາບ: ສຸກສະຫວັນ
